16 červienia BČ adnaŭlaje prodaž biletaŭ u Krym

Biełaruskaja čyhunka adnaŭlaje prodaž biletaŭ z 16 pa 30 červienia ŭ Krym, paviedamlaje aficyjny sajt BČ. 

«Pa ŭzhadnieńni z čyhunačnymi administracyjami, što majuć da hetaha dačynieńnie, Biełaruskaja čyhunka adnaŭlaje prodaž biletaŭ z 16 pa 30 červienia na nastupnyja ciahniki: № 100/99 Minsk — Simfieropal, № 160/159 Minsk — Jeŭpatoryja, № 486/485 Baranavičy — Fieadosija», — havorycca ŭ paviedamleńni. 

Ciahnik № 100/99 Minsk — Simfieropal budzie adpraŭlacca sa stancyi Minsk-Pasažyrski štodnia ŭ 07.45 i prybyvać na stancyju Simfieropal-Pasažyrski na nastupny dzień u 13.05. Čas adpraŭleńnia ciahnika nazad ź Simfieropala — 19.20, prybyćcia ŭ Minsk — 23.17 nastupnaha dnia. U sastaŭ ciahnika ŭklučanyja bieśpierasadačnyja vahony Brest — Simfieropal, Viciebsk — Simfieropal, Mahiloŭ — Simfieropal, Hrodna — Simfieropal. 

Ciahnik № 160/159 Minsk — Jeŭpatoryja budzie kursiravać adzin raz na čatyry dni. Ź Minska jon budzie adpraŭlacca sa stancyi Minsk-Pasažyrski ŭ 20.03 i prybyvać na stancyju Jeŭpatoryja ŭ 04.10 praz sutki. Čas adpraŭleńnia ciahnika ŭ zvarotnym napramku ź Jeŭpatoryi — 09.49, prybyćcia ŭ Minsk — 15.40 nastupnaha dnia. 

Ciahnik № 486/485 Baranavičy — Fieadosija budzie kursiravać adzin raz na čatyry dni. Adpraŭlacca sa stancyi Baranavičy-Paleskija ŭ 18.07 i prybyvać u Fieadosiju ŭ 05.00 praz sutki. U zvarotnym napramku ciahnik budzie adpraŭlacca ź Fieadosii ŭ 09.00 i prybyvać u Baranavičy ŭ 18.05 nastupnaha dnia. 

U BČ prosiać pasažyraŭ uvažliva sačyć za abnaŭleńniem infarmacyi ab źmianieńni ŭmoŭ prodažu prajaznych dakumientaŭ na ciahniki na aficyjnym sajcie Biełaruskaj čyhunki, a taksama na infarmacyjnych stendach i kasach čyhunačnych vakzałaŭ. 

Varta adznačyć, što ŭ kancy krasavika va Ukrainie byŭ pryniaty zakon «Ab zabieśpiačeńni pravoŭ i svabod hramadzian i pravavym režymie na časova akupavanaj terytoryi Ukrainy». Dakumient vyznačaje status akupavanych terytoryj i ŭstanaŭlivaje na ich admysłovy pravavy režym. Časova akupavanymi terytoryjami z abmiežavanym dostupam, pavodle zakona, źjaŭlajucca Krym i Sievastopal. «Dla hramadzian Ukrainy, zamiežnikaŭ i asob biez hramadzianstva ŭjezd na časova akupavanuju terytoryju i vyjezd ź jaje dapuskajecca tolki pa śpiecyjalnym dazvole i praz punkty ŭjezdu-vyjezdu ŭ paradku, ustanoŭlenym Kabinietam ministraŭ Ukrainy», — havorycca ŭ dakumiencie. 

Tym časam nijakich aficyjnych apaviaščeńniaŭ ab uviadzieńni dadatkovych patrabavańniaŭ pry pieravozcy pasažyraŭ u Krym na adras BČ ad ukrainskaha boku dahetul nie pastupała.

• 0
• 0
• 0
• 0
• 0
• 0
• 0
• 0