Prezident Balivii Eva Marales zaprasiŭ Rasiju dałučycca da «Hrupy 77» (G77), samit jakoj u farmacie «G77 + Kitaj» prachodzić u balivijskim horadzie Santa-Krus, pieradaje balivijskaha ahienctva ABI.
Marales adkryŭ sustreču «Hrupy 77 (G77) + Kitaj» u subotu ŭviečary (Balivija — časovy staršynia G77). Vynikovy dakumient samitu, pa płanach jaho arhanizataraŭ, pavinien stać asnovaj dla raspracoŭki novaj «paviestki dnia» AAN.
«My zaklikajem Rasieju i inšyja krainy dałučycca da G77 z tym, kab vykonvać vysakarodnyja zadačy na karyść narodaŭ <…> My majem patrebu ŭ intehracyi dziela vyzvaleńnia, dziela hodnaha budučaha ŭsich narodaŭ śvietu. Heta supracoŭnictva nie dziela padaŭleńnia», - skazaŭ Marales.
Raniej prezident Balivii ŭžo vykazvaŭ pažadańnie, kab Rasija ŭdzielničała ŭ pracy «Hrupy 77» (G77) - najbujniejšaha miždziaržaŭnaha abjadnańnia krain, jakija raźvivajucca. Na minułym tydni jon navat vykazaŭ zdahadku, što novaja arhanizacyja moža atrymać nazvu «G77 + Kitaj i Rasija». Uviečary ŭ subotu heta zaprašeńnie prahučała ŭžo ŭ ramkach sustrečy ŭdzielnikaŭ arhanizacyi.
«Hrupa 77» była zasnavana 15 červienia 1964 hoda krainami, jakija raźvivajucca, dla prasoŭvańnia ŭłasnych ekanamičnych intaresaŭ. Pieršapačatkova jana naličvała 77 udzielnikaŭ, ciapier u jaje ŭvachodziać 133 dziaržavy. U ciapierašni čas G77 - najbujniejšaja miždziaržaŭnaja arhanizacyja krain, jakija raźvivajucca, jakaja dziejničaje ŭ ramkach AAN i jaje orhanaŭ, paviedamili RIA «Naviny».
Z kłuba dziaržaŭ — suśvietnych lidaraŭ «vialikaja vaśmiorka» Rasiju vyklučyli paśla akupacy Kryma.
