Polskaja palicyja ličyć biełarusaŭ biezadkaznymi
Pavodle dadzienych polskaj palicyi, biełarusy časta pakidajuć dziaciej u zakrytych mašynach. Apošni vypadak, kali palicyja pryciahnuła da administracyjnaj adkaznaści biełaruskich baćkoŭ, jakija zamknuli svaich dziaciej u sałonie aŭtamabila na parkoŭcy bujnoha handlovaha centra, adbyŭsia 17 červienia.
Hramadzianie Biełarusi pryjechali «na zakupy» ŭ adzin z handlovych centraŭ Biełastoka i pakinuli svoj Fiat Brava ŭ padziemnym parkinhu. U mašynie zastalisia chłopčyki 2 i 5 hadoŭ, a kab im było čym dychać, baćki pryspuścili škło na 2 santymietry.
Palaki, ubačyŭšy heta, vyklikali palicyjantaŭ. Tyja patłumačyli starejšamu chłopčyku, jak adčynić dźviery znutry, i zastalisia čakać baćkoŭ, da jakich źviarnulisia praź infarmacyjny centr pa hučnaj suviazi. 29-hadovaja maci i 28-hadovy baćka pryjšli da mašyny praz 15 chvilin. Jany patłumačyli ŭsio tym, što małodšaje dzicia spała, jany nie chacieli jaho budzić. Za niedastatkovuju apieku nad dziećmi palicyja aštrafavała biełarusaŭ na 500 złotych (kala 1,7 młn rubloŭ).
Heta ŭžo nie pieršy vypadak za biahučy miesiac. 10 i 11 červienia padobnyja situacyi byli zafiksavanyja na parkoŭkach kala Kavaleryjskaha rynku i hipiermarkieta Auchan. U abodvuch vypadkach palicyju vyklikali ludzi, jakija prachodzili mima aŭtamabilaŭ. U adnym z vypadkaŭ palicyjantam pryjšłosia raźbić škło ŭ aŭtamabili VW Sharan, kab vyzvalić 8-hadovaha chłopčyka, jaki z-za śpioki pačaŭ hublać prytomnaść. Jamu navat pryjšłosia vyklikać «chutkuju dapamohu».
Palicyja nahadvaje, što pakidać małoje dzicia adno ŭ mašynie niedapuščalna. Niekalki lišnich chvilin, praviedzienych u zakrytym raspalenym aŭtamabili, mohuć kaštavać jamu žyćcia, pakolki pry tempieratury 40°C pierastajuć pracavać jaho ŭnutranyja orhany, a pry tempieratury 41,5°C dzicia moža pamierci. Pa dadzienych amierykanskaj palicyi, u apošnija hady kožnyja 10 dzion u śviecie pamiraje dzicia ad pierahrevu ŭ aŭtamabili.
Ciapier čytajuć
Chto taki Maćviej Bialaj, jakoha nibyta departavali ŭ Biełaruś? Raskazvajem historyju dziŭnaha aktyvista z padazronym minułym5
Kamientary