Biełaruś i Ekvador padpisali pahadnieńnie ab biaźvizavych pajezdkach hramadzian

20—21 červienia ministr zamiežnych spraŭ Biełarusi Uładzimir Makiej naviedaŭ Respubliku Ekvador z aficyjnym vizitam.

Jak paviedamlaje pres-słužba MZS, Makiej pravioŭ sustreču ź vice-prezidentam Ekvadora Chorchie Hłasam, padčas jakoj pieradaŭ asabistaje pasłańnie Alaksandra Łukašenki ŭ adras kiraŭnika krainy Rafaela Karea Delhada. U sustrečy taksama brali ŭdzieł kiraŭniki šerahu klučavych ekvadorskich ministerstvaŭ, zacikaŭlenych u naroščvańni dvuchbakovaha supracoŭnictva ź Biełaruśsiu.

«Adbyŭsia hruntoŭny abmien dumkami ab zroblenym pa vykanańni damoŭlenaściaŭ kiraŭnikoŭ dźviuch krain, dasiahnutych padčas vizitaŭ prezidenta Biełarusi ŭ Ekvador u červieni 2012 hoda i prezidenta Ekvadora ŭ Minsk u kastryčniku 2013 hoda. Namiečany kankretnyja šlachi naroščvańnia supracoŭnictva pa roznych kirunkach», — havorycca ŭ paviedamleńni MZS.

U prysutnaści vice-prezidenta kiraŭniki ministerstvaŭ zamiežnych spraŭ padpisali pahadnieńnie ab biaźvizavych pajezdkach hramadzian Biełarusi i Ekvadora.

Padčas sustrečy ź ministram zamiežnych spraŭ Ekvadora Rykarda Pacińjo Aroka ŭ vuzkim składzie abmierkavanyja pytańni raźvićcia palityčnych kantaktaŭ, u tym liku na vyšejšym uzroŭni. 

Surazmoŭcy vykazali ŭpeŭnienaść u tym, što novuju dynamiku dvuchbakovamu ŭzajemadziejańniu nadaduć niadaŭniaje adkryćcio pasolstva Biełarusi ŭ Ekvadory, a taksama adkryćcio pasolstva Ekvadora ŭ Biełarusi, jakoje maje adbycca ŭ chutkim časie. Ministry padrabiazna abmierkavali situacyju ŭ jeŭrapiejskim rehijonie, u Centralnaj i Łacinskaj Amierycy, pytańni ŭmacavańnia ŭzajemadziejańnia na mižnarodnaj arenie z ulikam daviernaha charaktaru adnosinaŭ pamiž dźviuma krainami.

U metach aktyvizacyi dvuchbakovaha handlova-ekanamičnaha supracoŭnictva ministry zamiežnych spraŭ Biełarusi i Ekvadora praviali pašyranuju naradu z udziełam pradstaŭnikoŭ šyrokaha koła ekvadorskich ministerstvaŭ i biełaruskich pradpryjemstvaŭ (MAZ, «Biełarusnafta», «Biełzamiežbud»). Praanalizavanyja najaŭnyja prablemy pry realizacyi prajektaŭ u dźviuch krainach u roznych śfierach, namiečany šlachi ich likvidacyi. Dasiahnuta damoŭlenaść ab vychadzie na novyja kirunki ŭzajemadziejańnia da druhoha pasiadžeńnia biełaruska-ekvadorskaj kamisii pa handli i ekanamičnym supracoŭnictvie, jakoje zapłanavana pravieści ŭ Kita ŭ pačatku vosieni 2014 hoda.

Padčas znachodžańnia biełaruskaj delehacyi ŭ Ekvadory padpisany miemarandum ab uzajemarazumieńni i supracoŭnictvie ŭ śfiery sielskaj haspadarki, žyviołahadoŭli, akvakultury i rybałoŭstva. Ź biełaruskaha boku dakumient padpisaŭ pieršy namieśnik ministra sielskaj haspadarki i charčavańnia Leanid Marynič.

Makiej naviedaŭ taksama «Horad viedaŭ Jačaj», jaki zaklikany stać unikalnym dla Łacinskaj Amieryki technałahičnym i adukacyjnym centram. Z kiraŭnictvam administracyi centra abmierkavany mahčymyja varyjanty supracoŭnictva z adukacyjnymi ŭstanovami Biełarusi. Ekvadorski bok vykazaŭ asablivuju zacikaŭlenaść u raźvićci ŭzajemadziejańnia ź biełaruskim Parkam vysokich technałohij, paviedamlaje MZS.

• 0
• 0
• 0
• 0
• 0
• 0
• 0
• 0