Ruch «Za Svabodu» vykazvaje rašučy pratest suprać udziełu rasijskich vajskoŭcaŭ ŭ paradzie 3 Lipienia.
Praz svaje dziejańni ŭłady Biełarusi haniebna i papaŭźliva robiać našu krainu dziaržavaj-maryjanietkaj i placoŭkaj dla demanstracyi siły rasijskaj vajenščyny.
Zaprašeńnie rasijskaj armii na parad u Minsku supiarečyć niejtralnamu statusu Biełarusi, stavić pad pahrozu stabilnaść i dabrabyt biełaruskaha narodu, pahražaje rehijanalnaj biaśpiecy.
Rasijskija ściahi i čorna-aranžavyja stužki ŭ siońniašniaj Jeŭropie i va ŭsim śviecie atajasamlivajucca z ahresijaj suprać susiedniaj ź Biełaruśsiu suvierennaj dziaržavy — Ukrainy. Rasijskaja paradnaja kałona siońnia moža značyć naŭprostavuju akupacyju zaŭtra. Heta taksama viadzie da ŭciahvańnia biełarusaŭ u vajnu suprać braterskaha ŭkrainskaha naroda.
Niejtralnaja Biełaruś pavinna šanavać svajo vojska, zachoŭvać histaryčnuju pamiać i pamiatać uroki Druhoj Suśvietnaj vajny. A hetyja ŭroki kažuć pra toje, što nielha hulać u niebiaśpiečnyja hulni z ahresaram.
Ruch «Za Svabodu» dapuskaje ŭdzieł u paradach u niejtralnaj Biełarusi vajskoŭcaŭ ź inšych krainaŭ dobraj voli.
Takija parady pavinny ŭmacoŭvać rehijanalnuju biaśpieku i ŭzajemaparazumieńnie. Na ich varta zaprašać pradstaŭnikoŭ usich susiednich krainaŭ — Ukrainy, Polščy, Łatvii, Litvy, Rasii, a taksama dziaržavaŭ antyhitleraŭskaj kaalicyi.
My ŭśviedamlajem, što takija parady siońnia niemahčymyja ŭ aŭtarytarnaj napaŭizalavanaj ad cyvilizavanaha śvietu Biełarusi. Tamu my padzialajem spraviadlivaje abureńnie mnohich biełarusaŭ prysutnaściu rasijskich vajskoŭcaŭ, techniki i simvoliki na vulicach stalicy našaj krainy.
Ruch «Za Svabodu» zaklikaje hramadzianaŭ Biełarusi pamiatać pra ŭroki historyi i rabić usio nieabchodnaje, kab Biełaruś stała niejtralnaj dziaržavaj, što buduje pryjaznyja adnosiny z usimi susiedziami.
