Prezident Ukrainy Piatro Parašenka pa vynikach pasiadžeńnia Rady nacyjanalnaj biaśpieki i abarony pryniaŭ rašeńnie prypynić dziejańnie režymu adnabakovaha spynieńnia ahniu na Danbasie.
«My budziem nastupać i budziem vyzvalać našu ziamlu, — havorycca ŭ jahonaj zajavie. — Niepadaŭžeńnie režymu spynieńnia ahniu — heta naš adkaz terarystam, bajevikam, maradzioram, usim tym, chto ździekiujecca ź mirnaha nasielnictva, chto paralizuje pracu ekanomiki rehijonu, chto zryvaje vypłaty zarobkaŭ, piensij, stypiendyj, chto padryvaje čyhunku, razburaje vadapravody, chto zabraŭ u ludziej narmalnaje mirnaje žyćcio», — adznačyŭ prezident Ukrainy ŭ svaim zvarocie.
Za 10 dzion zamireńnia bajeviki parušali jaho 108 razoŭ. U vyniku zahinuła 27 i było paraniena 58 ukrainskich siłavikoŭ. U tym liku byŭ źbity ŭkrainski viertalot. Akurat u časie zamireńnia bajeviki ŭpieršyniu ŭžyli tanki.
Patrabavańniem Ukrainy było viarnuć kantrol nad zachoplenymi pamiežnymi punktami i adpuścić zakładnikaŭ. Bajeviki ničoha hetaha nie zrabili.
«Na praciahu dziesiaci sutak my prademanstravali Danbasu, Ukrainie, usiamu śvietu svaju prychilnaść da mirnaha sposabu ŭrehulavańnia spravakavanaha zvonku kanfliktu. Žycharam Danieckaj i Łuhanskaj abłaściej my prademanstravali dobruju volu ŭkrainskaj ułady. Pracavityja i mirnyja ludzi, jakija składajuć bolšaść dančan i łuhančan, adčuli našu simpatyju, luboŭ i pavahu. Jany ŭbačyli ščyruju hatoŭnaść Kijeva ličycca ź ich admysłovymi dumkami i śpiecyfičnymi intaresami. I jany zrazumieli, što ich biaśpieka źjaŭlajecca našym hałoŭnym pryjarytetam», — adznačyŭ Parašenka ŭ svaim zvarocie.
Pavodle jaho słoŭ, jašče macniejšaj stała mižnarodnaja padtrymka Ukrainy.
«Mienavita padčas spynieńnia ahniu ja padpisaŭ Pahadnieńnie ab asacyjacyi i pahłyblenaj i ŭsioabdymnaj zonie svabodnaha handlu ź Jeŭrapiejskim Sajuzam. Adnak, unikalny šaniec pa ažyćciaŭleńni mirnaha płana nie realizavany. Tak adbyłosia z-za złačynnych dziejańniaŭ bajevikoŭ. Jany publična dekłaravali svajo niežadańnie padtrymlivać mirny płan u cełym i spynieńnie ahniu ŭ pryvatnaści. Z vyklikam, bolš za sto razoŭ, parušyli režym pieramirja», — zajaviŭ Parašenka.
«Palityčnaje kiraŭnictva sieparatystaŭ prademanstravała niežadańnie i niazdolnaść kantralavać dziejańni svaich terarystyčnych padraździaleńniaŭ i band maradzioraŭ. Admiena rašeńnia Rady Fiederacyi ab dazvole ŭvodzić rasiejskija vojski va Ukrainu mieła stanoŭčaje, ale simvaličnaje značeńnie. My tak i nie dačakali kankretnych krokaŭ pa deeskałacyi situacyi. U tym liku i ŭ častcy ŭmacavańnia kantrolu za miažoj. Niahledziačy na heta, mir byŭ, zastajecca i budzie majoj metaj. Źmianiajucca tolki instrumienty jaje dasiahnieńnia», — padkreśliŭ prezident.
«Paśla abmierkavańnia situacyi, ja, jak Viarchoŭny Hałoŭnakamandujučy, pryniaŭ rašeńnie nie praciahvać režymu adnabakovaha spynieńnia ahniu. Abarona terytaryjalnaj cełasnaści Ukrainy, biaśpieki i žyćcia mirnych hramadzian patrabuje nie tolki abarončych, ale i nastupalnych dziejańniaŭ suprać terarystaŭ-bajevikoŭ. Uzbrojenyja Siły, Nacyjanalnaja hvardyja, Dziaržaŭnaja pamiežnaja słužba, Słužba biaśpieki atrymali adpaviednyja zahady», — zajaviŭ prezident.
U realizacyi pastaŭlenych zadač pa abaronie terytaryjalnaj cełasnaści jany bolš nie abmiežavanyja režymam spynieńnia ahniu.
«My budziem nastupać i vyzvalać našu ziamlu. Niepradaŭžeńnie režymu spynieńnia ahniu — heta naš adkaz terarystam, bajevikam, maradzioram. Usim tym, chto ździekujecca ź mirnaha nasielnictva. Chto paralizuje pracu ekanomiki rehijona. Chto zryvaje vypłaty zarobkaŭ, piensij, stypiendyj. Chto padryvaje čyhunku i razburaje vadapravody. Chto zabraŭ u ludziej narmalnaje, mirnaje žyćcio. Uzbrojenyja Siły Ukrainy, Nacyjanalnaja hvardyja, inšyja padraździaleńni nikoli nie dazvolać sabie ŭžyvać siłu suprać mirnych ludziej. Jany nikoli nie buduć bić pa žyłych kvartałach», — dadaŭ Parašenka.
«Na nas — adkaznaść i pieražyvańnie za kožnaje mirnaje žyćcio, jakoje, nie daj Boža, moža abarvacca pry vajennaj ci antyterarystyčnaj apieracyi. Heta patrabuje ad nas nadzvyčajnaj vyvieranaści kožnaha ruchu ŭ praviadzieńni apieracyj. Źviartajusia da kožnaha žychara Danieckaj i Łuhanskaj abłaściej z prośbaj z razumieńniem pastavicca da majho rašeńnia. Prašu stać sajuźnikami ŭ viartańni biaśpieki na Danbas», — adznačyŭ jon.
«Tak, vy nie možacie supraćstajać bandytam fizičnaj siłaj. Ale vašyja siła voli i siła duchu, vaša hramadzianskaje niepadparadkavańnie ŭ tak zvanych «narodnych respublikach», nieciarpimaść i paharda da tych, chto staŭ na šlach bandytyzmu, maradziorstva i teroru, nablizić toj dzień, kali ŭ vašy damy, na vašy vulicy vierniecca mocny mir. Usim, chto staŭ na šlach zbrojnaha supracivu zakonnaj uładzie, ale uśviadomiŭ, što dapuściŭ pamyłku i choča jaje vypravić, ja, jak prezident, harantuju niepryciahnieńnie da kryminalnaj adkaznaści. Umova adna — dobraachvotna skłaści zbroju», — adznačyŭ Parašenka.
«Naš mirny płan jak stratehija dla Ukrainy i Danbasa, zastajecca ŭ sile. I razzbrajeńnie. I decentralizacyja. I svabodnaje vykarystańnie ruskaj movy. I adnaŭleńnie stračanaha žylla za košt dziaržavy. I sumiesnaja ź ES prahrama stvareńnia novych pracoŭnych miescaŭ. I navat da režymu spynieńnia ahniu my hatovyja viarnucca ŭ luby momant. Kali pabačym, što ŭsie baki prytrymlivajucca vykanańnia asnoŭnych punktaŭ mirnaha płana. Što bajeviki vyzvalajuć zakładnikaŭ. Što i pa toj bok uschodniaj miažy zaharełasia čyrvonaje śviatło dyviersantam i pastaŭščykam zbroi, i za vykanańniem režymu na miažy naziraje ABSIE», — zajaviŭ jon.
«Daroha da miru akazałasia trochi składaniejšaj, čym chaciełasia. Nie chaču prycharošvać rečaisnaść. Budzie nialohka i niaprosta. Nam, jak nikoli, varta zhurtavacca dla abarony Ukrainy. Heta patrabuje samaaddačy i dyscypliny nie tolki na pieradavoj, ale i ŭ tyle. Ale nie było jašče ni adnoj vajny, paśla jakoj nie nadychodziŭ by mir. Tak budzie i ŭ hety raz».
Ciapier čytajuć
Žonka Arcioma, jaki emihravaŭ u Ispaniju ź siamjoj i zastaŭsia tam adzin, adkazała, čamu ŭ Baranavičach lepš, čym u Barsiełonie6
Kamientary