Ciapier taki siurpryz ajciec Ihar Anisimaŭ robić šmatlikim param, jakija biaruć šlub u jaho kaściole, paviedamlaje sajt katolik-gomel.by.
Probašč rymska-katalickaj parafii Biezzahannaha Začaćcia Najśviaciejšaj Panny Maryi ŭ Słonimie (Hrodzienskaja vobłaść) ajciec Ihar Anisimaŭ praśpiavaŭ dla maładych padčas viančańnia znakamituju pieśniu «Aliłuja» Leanarda Koena na rasijskaj movie.
Niadaŭna katalicki śviatar ź Irłandyi Rej Kieli staŭ znakamitaściu na YouTube paśla taho, jak praśpiavaŭ «Aliłuja» na viančańni pary ŭ jaho prychodzie i nabraŭ 35 młn prahladaŭ, heta bolej prahladaŭ, čym u vykanańni pieśni samim Koenam.
Jak i ŭ vypadku ź irłandskimi maładymi, biełaruskaja para i vierniki byli ŭ šoku ad siurpryzu. U kancy pieśni niaviesta navat zapłakała, a ŭvieś kaścioł zaplaskaŭ.
Ajciec Ihar ciapier u adjeździe, ale katolik-gomel.by udałosia pahavaryć z prychadžankaj ź Lidy Vieranikaj Vajčyk, jakaja dobra viedaje, jak śpiavaje śviatar. Mienavita jana vykłała ŭ internet videa ź jaho pieśniaj, bolš za toje — mienavita Vieranika paraiła ajcu Iharu praśpiavać na šlubie.
«Jon chacieŭ zrabić niejki asablivy padarunak hetaj pary, i tady ja pakazała videa irłandskaha śviatara. Byŭ tekst pieśni na rasijskj, ajciec Ihar krychu padkarektavaŭ jaho. I na šlubie 7 červienia ŭ kancy słužby niečakana zaśpiavaŭ. Usie byli ŭ šoku!» — raspaviadaje Vieranika.
Paśla hetaha vypadku pa Słonimie pačali chadzić čutki ab niezvyčajnym šlubie, i inšyja pary ŭžo čakali takoha ž padarunka. Kab nie padmanuć ich čakańni, ajciec Ihar znoŭ zaśpiavaŭ. Zaraz heta ŭvajšło ŭ tradycyju.
U hetym hodzie ajcu Iharu spaŭniajecca 40 hadoŭ, a svoj pieŭčy talent jon raźvivaje jašče z maładości. Padčas vučoby ŭ Hrodzienskaj vyšejšaj duchoŭnaj sieminaryi jon śpiavaŭ u składzie hrupy «Ave».
— Ja vielmi caniu i pavažaju ajca Ihara, sam jon vielmi ścipły, ale talenavity čałaviek. U jaho nialohki šlach u śviatarstvie, časam byvaje vielmi ciažka, takich jak jon treba padtrymlivać! — kaža parafijanka.
Ajciec Ihar rodam z Mahnitahorska (Rasija), paśla atrymańnia paśviačeńnia ŭ 2001 hodzie słužyŭ u Lidzie i viaskovaj parafii Hrodzienskaj dyjacezii, ciapier źjaŭlajecca probaščam kaścioła Biezzahannaha Začaćcia Najśviaciejšaj Panny Maryi ŭ Słonimie.
Vykanańnie «Aliłuja» a. Rejem Kieli z hrafstva Mit (Irłandyja) za try miesiacy bolš čym 35 młn prahladaŭ.
Kamientary