Sajt Krynica.INFO apublikavaŭ daśledvańnie relihijnaści nasielnictva Biełarusi ŭ rehijanalnym razrezie.
Daśledvańnie zroblenaje na padstavie aficyjnych dadzienych pra kolkaść zarehistravanych relihijnych hramadaŭ u krainie.
Publikacyja nie maje na mecie pakazać pryvatnuju relihijnaść kankretnych hramadzianaŭ, ale vyśvietlić, u jakich rehijonach i hramady jakich kanfiesij zarehistravanyja, pieravažajuć pa kolkaści, a taksama ich ahulnuju kolkaść, u tym liku adnosna kolkaści nasielnictva.
Va ŭmovach adsutnaści aficyjnaj statystyki kanfiesijnaj situacyi ŭ Biełarusi daśledvańnie moža dapamahčy ŭ analizie dadzienaj śfiery.
Kolkaść zarehistravanych hramadaŭ adnosna kolkaści nasielnictva.
Analiz najaŭnych dadzienych dazvalaje śćviardžać, što najbolšaja kolkaść relihijnych hramadaŭ zarehistravanaja ŭ Bresckaj vobłaści.
Tut, u siarednim na adnu zarehistravanuju supolnaść viernikaŭ prychodzicca 1981 čałaviek. Adnosna blizkija pakazčyki ŭ Minskaj vobłaści (2145 čałaviek), Hrodzienskaj (2355) i Viciebskaj (2371). Dalej iduć Homielskaja (4004 čałavieki) i Mahiloŭskaja vobłaści (4308). Najmienšaja zabiaśpiečanaść hramadami ŭ Minsku, dzie na adnu zarehistravanuju supolnaść prychodzicca 14236 čałaviek.
Siarod rajonaŭ Biełarusi pa kolkaści zarehistravanych na ich terytoryi hramadaŭ znoŭ lidziruje Bresckaja vobłaść.
Ź dziesiaci rajonaŭ krainy, na terytoryi jakich aficyjna dziejničajuć bolš za 50 hramadaŭ, pałova znachodzicca mienavita na Bieraściejščynie: Baranavicki, Brescki, Kobrynski, Pinski i Stolinski. Aproč taho, najbolšaja kolkaść hramadaŭ u krainie zarehistravanaja ŭ Viciebskim, Homielskim, Hrodzienskim, Maładziečanskim i Minskim rajonach.
Razam z tym Mahiloŭskaja vobłaść źjaŭlajecca aŭtsajderam pa dadzienym pakazčyku. Tut z 21 rajonu na terytoryi 14-ci zarehistravana tolki ad 1 da 10 hramadaŭ (pieravažna na ŭschodzie vobłaści). U Homielskaj vobłaści takich rajonaŭ naličvajecca tolki 9 z 21. U Viciebskaj vobłaści ich 4 (z 21), Minskaj — 1 (z 22).U Hrodzienskaj i Bresckaj abłaściach takich rajonaŭ niama.
Pieravažajučyja kanfiesii pavodle kolkaści hramadaŭ pa rajonach.
Pa kolkaści zarehistravanych hramadaŭ absalutnym lidaram źjaŭlajecca Biełaruskaja Pravasłaŭnaja Carkva, čyje prychody pieravažajuć u absalutnaj bolšaści rajonaŭ.
Vyklučeńnie składajuć vosiem pamiežnych ź Litvoj rajonaŭ Hrodzienskaj i Viciebskaj abłaściej, dzie pieravažajuć ryma-katalickija parafii, Łuniniecki, Salihorski i Chojnicki rajony, dzie pieravažajuć hramady chryścijanaŭ viery jevanhielskaj, a taksama Białynciki rajon, dzie lidarstva trymajuć hramady jevanhielskich chryścijanaŭ-baptystaŭ.
Aproč taho, kolkaść prychodaŭ BPC supadaje z kolkaściu parafijaŭ RKC u Ščučynskim i Smarhonskim rajonach, z hramadami CHVIE – u Hancavickim, Lachavickim, Kličaŭskim, Kaściukovickim, Karmianskim, Śvietłahorskim i Rasonskim rajonach, z hramadami JECHB – u Bychaŭskim, Krasnapolskim, Kruhlanskim i Čerykaŭskim rajonach Mahiloŭščyny.
Pieravažajučyja nakirunki pavodle kolkaści hramadaŭ pa rajonach.
Kali ž ličyć hramady pavodle asnoŭnych nakirunkaŭ (katalictva, pravasłaŭje, pratestantyzm), to katalickija parafii (ryma- i hreka-katalickija) pa-raniejšamu pieravažajuć la litoŭskaj miažy, chacia ŭ Brasłaŭskim rajonie kankurencyju im pačynajuć składać pravasłaŭnyja prychody i hramady (BPC i staraabradniki). Razam z tym roznyja płyni pratestantyzmu (CHVIE, JECHB, CHPIE, luteranstva, kalvinizm i h.d.) aproč aznačanych rajonaŭ (Łuniniecki, Salihorski, Chojnicki, Białynciki) pieravažajuć tady taksama ŭ Minsku, Pinskim, Lachavickim, Śvietłahorskim, Karmianskim, Čačerskim, Rasonskim, Kličaŭskim, Mahiloŭskim, Słaŭharadskim, Čerykaŭskim, Krasnapolskim i Kaściukovickim rajonach. Pratestanckija hramady składajuć taksama kankurencyju pravasłaŭnym u Lachavickim, Połackim, Słuckim, Uździenskim, Hłuskim, Biarezinskim, Kryčaŭskim, Pietrykaŭskim i Jelskim. Cikava, što pratestanty nie pieravažajuć u nivodnym z rajonaŭ tolki Hrodzienskaj vobłaści, dzie kankurecyja razhortvajecca pamiž pravasłaŭnymi i katalickimi parafijami.
Varta adznačyć, što pieravaha pratestanckich hramadaŭ na Mahiloŭščynie i ŭschodniaj Homielščynie tłumačycca nie stolki vialikaj kolkaściu pratestanckich hramadaŭ, kolki małoj kolkaściu pravasłaŭnych.
Pravasłaŭnych prychodaŭ pa rajonach najbolš naličvajecca na ziemlach byłoj Zachodniaj Biełarusi, tady jak najmienš u Mahiloŭskaj vobłaści i ŭ najbolš paciarpiełych ad avaryi na ČAES rajonach Homielščyny.
Najbolš pravasłaŭnych prychodaŭ (bolš za 30) zarehistravana u Minsku i vakoł bujnych centraŭ: u Minskim, Homielskim i Viciebskim rajonach (apošnija ŭličvajucca razam z abłasnymi centrami), a taksama ŭ Bresckim, Kobrynskim, Pinskim i Stolinskim rajonach Bresckaj vobłaści.
Ryma-katalickija parafii najbolš pradstaŭlenyja na poŭnačy Hrodzienskaj vobłaści, zachadzie Minskaj i Viciebskaj.
Pry hetym šerah rajonaŭ u Mahiloŭskaj i Homielskaj abłaściach uvohule nie majuć zarehistravanych katalickich parafij. Najbolš katalickich parafij (bolš za 15) dziejničaje ŭ Hrodzienskim (razam z Hrodna), Brasłaŭskim, Lidskim rajonach i Minsku.
Chryścijanie viery jevanhielskaj pradstaŭlenyja va ŭsich rajonach Biełarusi, pryčym raŭnamierna i ŭ adnosna nievialikaj kolkaści (1…5 hramadaŭ).
Najbolš ža hramadaŭ CHVIE skancetravałasia na Paleśsi na miažy Bresckaj, Minskaj i Homielskaj abłaściej. Bolš za 30 supolnaściaŭ chryścijanaŭ viery jevanhielskaj dziejničajuć u Pinskim rajonie i Minsku.
Jevanhielskija chryścijanie-baptysty jak i ryma-kataliki na aficyjnym uzroŭni pradstaŭlenyja nie va ŭsich rajonach Biełarusi.
Pryčym rajony, dzie nie zarehistravanyja hramady JECHB, majucca va ŭsich abłaściach. Pieravažajuć ža jany na Brestčynie. Bolš za 15 ich u Minsku i Kobrynskim rajonie.
Astatnija kanfiesii Biełarusi značna sastupajuć pradstaŭlenym pa kolkaści zarehistravanych hramadaŭ i nie akazvajuć značnaha ŭpłyvu na kanfiesijnuju situacyju.
Takim čynam, jak bačym, asnoŭnaja kolkaść chryścijanskich hramadaŭ usich biez vyklučeńniaŭ kanfiesijaŭ prypadaje na Zachodniuju Biełaruś – rehijon, jaki, dziakujučy adnosna poźniamu dałučeńniu da SSSR, najmienš paciarpieŭ ad kamunistyčnych hanieńniaŭ.
Pry hetym na ŭschodzie Biełarusi ŭ suviazi z małoj kolkaściu prychodaŭ najbolš tradycyjnaj dla hetaha rehijonu Pravasłaŭnaj carkvy pavodle zarehistravanych hramadaŭ pačynajuć pieravažać pratestanckija supolnaści.
Z zarehistravanych u Biełarusi relihijnych ab»iadnańniaŭ tolki dva – BPC i CHVIE – pradstaŭlenyja va ŭsich rajonach krainy.
Pravasłaŭje, miarkujučy z kolkaści hramadaŭ, pa-raniejšamu zastajecca viadučaj kanfiesijaj Biełarusi, pieravažajučy absalutna va ŭsich abłaściach.
Pry hetym ćvierdžańni pra «Katalickuju Hrodzienščynu» i «Pratestanckuju Bieraściejščynu» daśledvańniem nie paćviardžajucca.
Chacia ŭ Hrodzienskaj vobłaści i zarehistravana najbolš katalickich parafij, a ŭ Bresckaj — pratestanckich, adnak pieravažajuć jany tolki ŭ kankretnych častkach abłaściej (paŭnočnaja Hrodzienščyna i ŭschodniaja Bieraściejščyna), tady jak u astatnich vidavočnaja pieravaha pravasłaŭnych prychodaŭ.