 |
Apošni matč adboračnaha raŭndu da čempijanatu Eŭropy naša zbornaja pravodziła doma z halandcami. Losavańnie nadziva časta zvodzić našy kamandy ŭ adnu adboračnuju hrupu. Hetaja hulnia stała ŭžo šostaj u historyi matčaŭ Biełarusi i Halandyi. Pieramahali ž našy chłopcy tolki adnojčy – u červieni 1995 hodu. Adziny hoł u toj hulni zabiŭ bliskučy Siarhiej Hierasimiec. Mnohija až da siońnia ličać tuju pieramohu najbolš značnaj u historyi suverennaha biełaruskaha futbołu. Usie astatnija sustrečy zbornaja Biełarusi prajhrała “aranžavym”, pryčym nie zabiŭšy navat nivodnaha hołu.
U Miensk halandcy pryjechali ŭžo zabiaśpiečyŭšy sabie vychad u finalnuju pulku kantynentalnaha pieršynstva. Trener Marka van Basten daŭ volnuju zorkam svajoj kamandy – bramniku van der Saru i napadniku van Nistelroju. Ale i biaź ich skład haściej uražvaŭ – Kujt, Snajder, van Bronchorst, van der Vaart, Ojer.
Niahledziačy na maroz, pahladzieć na zornych halandcaŭ pryjšło kala dziesiaci tysiač amataraŭ. Niekalki socień čałaviek prylacieli i z krainy tulpanaŭ. Im vydzielili ceły sektar stadyjonu, i vyhladali jany pa biełaruskich mierkach dosyć kalarytna.
Nad stadyjonam uvieś matč visieŭ mocny tuman, praź jaki navat nie było dobra bačna, što rabiłasia na supraćlehłaj pałovie pola. Razhledzieć numary futbalistaŭ było taksama vielmi ciažka.
Užo na samym pačatku hulni hości mieli niekalki realnych šancaŭ zabić, ale vyratoŭvaŭ bramnik Jury Žaŭnoŭ, ci prosta šancavała. Paśla taho, jak našy spravilisia z startavym chvalavańniem, hulnia vyraŭniałasia. Momanty peryjadyčna ŭźnikali, to ŭ adnych, to ŭ druhich varotaŭ. Zaŭziataram, jakija amal nie na chvilinu nie prysieli za hulniu, sumavać nie davodziłasia.
U pieršym tajmie kamandy navat abmianialisia hałami. Štopraŭda, francuski refery nie zaličyŭ nivodnaha, zafiksavaŭšy ŭ abodvuch vypadkach stanovišča pa-za hulnioj.
Druhi tajm pačaŭsia zamienaj lidera biełaruskaj zbornaj Alaksandra Hleba, ale heta, zdajecca, pajšło kamandzie tolki na karyść. Niefartovy dahetul Bułyha na 49-aj chvilinie hulni znajšoŭ ščylinu ŭ halandzkaj abaronie i nakiravaŭ miač mima bramnika Stekielenburha – 1:0.
Razam z tym, našy chłopcy nie pačali adciskacca pa svajoj bramy, a naadvarot jašče bolšymi siłami pajšła napierad. Niekalki realnych momantaŭ nie realizavaŭ Ramaščanka, Karyćka. Kamanda, što pryjemna, šukała ščaście na čužoj pałovie pola.
Na 65-aj chvilinie Ŭładzimier Karyćka adkryŭsia ŭ centry štrafnoj, atrymaŭ pieradaču ad Bułyhi i mocna ŭdaryŭ u daloki ad hałkipera kut – 2:0.
Za dźvie chviliny da finalnaha śvistka biełarusaŭ uratavała tolki pierakładzina, a praz chvilinu nia vyratavała navat jana, kali halandzkuju ataku zaviaršaŭ van der Vaart – 2:1.
Da asnoŭnaha času matča sudździa dadaŭ try chviliny. Jak doŭha jany išli dla zaŭziataraŭ na “Dynama”, i kolkich spalenych nervovych kletak jany kaštavali! Urešcie, śvistok prahučaŭ.
Stadyjon u adzinym paryvie hukaŭ: “Biełaruś! Biełaruś! Biełaruś!”. Halandzkija amatary taksama adčuli momant, plaskajučy ŭ dałoni ŭ honar pieramožcaŭ.
Biełaruskija zaŭziatary adčuli redkija chviliny radaści. Niachaj hety matč ničoha nie vyrašaŭ, ale vynik usio adno nadzvyčaj pryjemny.
Źmicier Pankaviec
***
Siońnia ŭ našaj adboračnaj hrupie prajšli jašče dźvie hulni: Rumynija razhramiła Ałbaniju – 6:1, Baŭharyja pierajhrała ŭ haściach Słavieniju – 2:0.
Stanovišča kamandaŭ: Rumynija – 29, Halandyja – 26, Baŭharyja – 25, Biełaruś - 13, Słavienija i Ałbanija – pa 11, Luksemburh – 3.
U hetym turniry biełarusy pieramahli ałbancaŭ u haściach i zhulali ŭničyju ź imi doma, pieramahli ŭ haściach Luksemburh (prajhrali im doma), pieramahli Słavieniju (prajhrali ŭ haściach), u Miensku - Halandyju (prajhrali ŭ haściach). Pa dva razy prajhrali Rumynii i Baŭharyi.
25 listapada ŭ Durbanie (Paŭdniovaafrykanskaja Respublika) projdzie losavańnie adboračnych hrupaŭ da čempijanatu śvietu – 2010. dzie vyznačacca novyja supierniki zbornaj Biełarusi.
A losavańnie adboračnych hrupaŭ finalnaha turniru čempijanatu Eŭropy – 2008 projdzie 2 śniežnia.
