U Minsku adkryŭsia śpiecyjalny punkt pa vydačy pasyłak

RUP «Biełpošta» ŭ Minsku adkryła śpiecyjalny punkt pa vydačy mižnarodnych paštovych adpraŭleńniaŭ, jaki raźmiaściŭsia na vulicy Adzincova, 36/1.

Ab hetym paviedamiła namieśnik hienieralnaha dyrektara pa kamiercyjnych pytańniach RUP «Biełpošta» Taćciana Hvoździeva.

Pavodle jaje słoŭ, u punkcie buduć vydavacca mižnarodnyja pasyłki i drobnyja pakiety, jakija pastupajuć na adrasy, što znachodziacca ŭ zonie absłuhoŭvańnia 55-ha, 17-ha i 136-ha staličnych adździaleńniaŭ paštovaj suviazi. «Adkryćcio punktaŭ pa vydačy mižnarodnych paštovych adpraŭleńniaŭ daść mahčymaść pavysić jakaść absłuhoŭvańnia klijentaŭ u adździaleńniach paštovaj suviazi, dastupnaść paštovych pasłuh, stvaryć kamfortnyja ŭmovy pry atrymańni paštovych adpraŭleńniaŭ, što asabliva važna i aktualna z raźvićciom rynku dystancyjnaha handlu, rostam abjomaŭ mižnarodnych adpraŭleńniaŭ», — padkreśliła jana.

Punkt asnaščany ŭsimi nieabchodnymi techničnymi i prahramnymi srodkami. Raspracavanaje śpiecyjalnaje prahramnaje zabieśpiačeńnie dla ŭliku i fiksavańnia miesca raźmiaščeńnia paštovych adpraŭleńniaŭ na stełažach daje mahčymaść ažyćciaŭlać praces vydačy paštovych adpraŭleńniaŭ adrasatu za niekalki minut. «Vyvučyŭšy mierkavańnie klijentaŭ, dla zručnaści nasielnictva punkt pa vydačy mižnarodnych paštovych adpraŭleńniaŭ budzie pracavać štodzień: paniadziełak — piatnica — z 8.00 da 22.00, subota, niadziela — z 9.00 da 20.00», — adznačyła Taćciana Hvoździeva.

Pavodle słoŭ śpiecyjalista, da kanca hoda ŭ Minsku płanujecca adkryć jašče try takija punkty. Nastupny punkt pa vydačy mižnarodnych paštovych adpraŭleńniaŭ adkryjecca ŭ bližejšy čas u mikrarajonie Uručča. «Biełpošta» źviartaje ŭvahu klijentaŭ na toje, kab jany ŭvažliva čytali atrymanyja paviedamleńni na paštovyja adpraŭleńni — u ich paznačany adras vydačy», — papiaredziła Taćciana Hvoździeva.

U svaju čarhu viadučy śpiecyjalist pa suviaziach z hramadskaściu «Biełpošta» Alena Arłova skazała, što z metaj pavyšeńnia jakaści absłuhoŭvańnia nasielnictva kampanija pravodzić štomiesiačnyja akcyi «Bližej da klijenta». Śpiecyjalisty pradpryjemstva vučać naviedvalnikaŭ adździaleńniaŭ paštovaj suviazi karystacca płaciežna-daviedačnymi terminałami. «Takim čynam pryciahvajecca ŭvaha nasielnictva da sučasnych sposabaŭ apłaty płaciažoŭ, što daje mahčymaść klijentam sekanomić ich čas. Z dapamohaj płaciežnych terminałaŭ klijent moža apłacić pasłuhi ŭ režymie online i biez kamisii: kamunalnyja pasłuhi luboha nasielenaha punkta krainy, haradskuju telefonnuju suviaź, rachunki mabilnych telefonaŭ, internet-pravajdaraŭ, padatki i štrafy DAI, aformić padpisku na pieryjadyčnyja vydańni, pahasić bankaŭskija kredyty i inšyja pasłuhi», — rastłumačyła Alena Arłova. Dla zručnaści klijentaŭ na ekranie raźmieščana pakrokavaja instrukcyja pa ŭniasieńni płaciažoŭ. Apłacić pasłuhi možna bankaŭskaj płastykavaj kartkaj abo najaŭnymi hrašyma.

• 0
• 0
• 0
• 0
• 0