Arhanizacyja Abjadnanych Nacyj asudžaje Biełaruś za parušeńnie pravoŭ čałavieka. Adpaviednaja rezalucyja była pryniataja 21 listapada. U padtrymku dakumienta prahałasavali 68 dziaržavaŭ, suprać — 32.
Niahledziačy na toje, što 76 krainaŭ ustrymalisia pry hałasavańni, rezalucyja ličycca pryniataj, bo hałasy «za» pieravyšajuć hałasy «suprać».
Dakumient, suaŭtarami jakoha vystupili 33 dziaržavy, vykazvaje «hłybokuju zaniepakojenaść z nahody dalejšaha vykarystańnia sistemy kryminalnaha pravasudździa dla taho, kab prymusić zamaŭčać palityčnuju apazicyju i pravaabaroncaŭ».
U prajekcie rezalucyi havorycca pra «dalejšuju eroziju demakratyčnaha pracesu» i śćviardžajecca, što miascovyja vybary ŭ Biełarusi ŭ 2007 hodzie prajšli z vykarystańniem mietadaŭ zapałochvańnia apazicyi i ŭcisku niezaležnych ŚMI.
Aŭtary prajektu, siarod jakich ZŠA, krainy ES i Japonija, nahadali Minsku pra hvałtoŭnaje źniknieńnie troch palityčnych apanientaŭ prezidenta krainy Alaksandra Łukašenki ŭ 1999 hodzie i žurnalista ŭ 2000 hodzie.
U vinu Biełarusi pastaŭlena pryciaśnieńnie i zakryćcio niaŭradavych arhanizacyj, arhanizacyj nacyjanalnych mienšaściaŭ, niezaležnych ŚMI, relihijnych hrupaŭ, apazicyjnych palityčnych partyj, niezaležnych prafsajuzaŭ i studenckich arhanizacyj. U rezalucyi zhadvajecca Jeŭrapiejski humanitarny ŭniviersitet, jaki pieraśledujecca ŭładami.