Minsk, 21 lipienia. Dla vyrašeńnia prablem z čerhami ŭ litoŭskaje pasolstva ŭ Minsku Ministerstva zamiežnych spraŭ Litvy płanuje adkryć u Biełarusi vizavyja centry.
Čakajecca, što heta adbudziecca ŭžo vosieńniu.
Jak paviedamiła pres-słužba litoŭskaha MZS u adkaz na zapyt partała navin Delfi, «u vizavych centraŭ buduć nieabmiežavanyja mahčymaści z usimi vyhodami pa absłuhoŭvańni asob, jakija źviartajucca pa vizy, a taksama akazańni dadatkovych pasłuh».
Zaraz vydzielenyja dadatkovyja resursy dla pracy dyppradstaŭnictvaŭ Litvy ŭ Biełarusi. «Z pačatku maja pastupova pavialičvajecca lik rabotnikaŭ — ciapier u pasolstva dadatkova pryniata čatyry rabotniki. A na letnija miesiacy dadatkova kamandzirujucca dypłamat i techničny rabotnik», — paviedamlaje pres-słužba litoŭskaha MZS.
Štodnia pasolstva Litvy ŭ Minsku vydaje pryblizna 1.100 viz.
Za pieršaje paŭhodździe hetaha hoda pasolstva ŭ Minsku i konsulstva ŭ Hrodnie vydali 110 tysiač 513 viz, što na 6,8% bolš, čym za anałahičny letašni pieryjad.
«Abjomy vydačy viz adpaviadajuć realnym patokam hramadzian, jakija adpraŭlajucca ź Biełarusi ŭ Litvu, adnak techničnyja mahčymaści pasolstva dasiahnuli miažy.
Elektronnaja sistema rehistracyi pastajanna atakujecca, złamysnyja ci prahnyja da nažyvy asoby stvarajuć dadatkovyja pieraškody dla zładžanaj pracy vizavaj słužby pasolstva.
I choć viz vydajecca bolš, čerhi kala pasolstva nie skaračajucca», — padkreślivajecca ŭ paviedamleńni pres-słužby źniešniepalityčnaha viedamstva Litvy.
Kamientary