«…Jany pryjechali na čatyroch mašynach: mikraaŭtobus ź milicyjaj i «džyp» ź niejkimi dvuma maładymi ludźmi ŭ cyvilnym ź videakameraj. Usie jany sprabavali ŭvajści ŭ naš budynak. Dla nas hetaja sytuacyja vidavočnaja. My j dalej budziem pilna sačyć za ŭsim hetym, kab naš budynak zastaŭsia ŭ našych rukach».
 Viačasłaŭ Hančarenka |
Vierniki pratestanckaj carkvy «Novaje žyćcio» Abjadnańnia supołak chryścijan poŭnaha Evanhiella pryniali rašeńnie časova prypynić naviedvańnie svajho chrama mienskimi čynoŭnikami. Rašeńnie było pryniataje na schodzie viernikaŭ z metaj nie dapuścić zachopu budynku na čas, pakul nia budzie vyrašana pytańnie viernikaŭ u Vyšejšym haspadarčym sudzie.
Pastar carkvy «Novaje žyćcio» Viačasłaŭ Hančarenka paviedamiŭ «Svabodzie», što jon nakiravaŭ list kiraŭniku adździeła ŭ nadzvyčajnych sytuacyjach Maskoŭskaha rajonu Miensku Mikałaju Baranoŭskamu. Jon papiaredziŭ čynoŭnika, što časova pradstaŭnikam jaho ŭstanovy budzie abmiežavany dostup u budynak, pakul nia budzie sudovaha rašeńnia ŭ spravie viernikaŭ.
Nahadajem, u 2002 hodzie vierniki nabyli na ŭskrajku Miensku były kałhasny karoŭnik i adramantavali za svaje hrošy. U 2005 hodzie mienskija ŭłady zabaranili ładzić tam nabaženstvy, a ŭ 2006 — pieraličyli na rachunak carkvy kala 17 tysiač dalaraŭ kampensacyi za budynak. Za hetyja hrošy vierniki nie zmahli b nabyć navat adnapakajovaj kvatery. 9 kastryčnika jany, pavodle pastanovy ŭładaŭ, musili vyzvalić budynak.
Na znak pratestu vierniki raspačali 23‑dzionnuju haładoŭku. U vyniku spravaj viernikaŭ zaniaŭsia Vyšejšy haspadarčy sud. Jon admianiŭ raniejšyja pastanovy ab vysialeńni viernikaŭ i pazbaŭleńni ich ziamielnaha nadziełu, ale kančatkovaje rašeńnie dahetul nie pryniataje.
Pastar Viačasłaŭ Hančarenka havoryć:
«Sytuacyja krychu nas naściarožvaje. Paprostu chaciełasia b vyrašeńnia pytańnia. Nie chaciełasia b napružannaści, bo heta patrabuje šmat resursaŭ. Urešcie rešt, 21 stahodździe. Nastaŭ čas źmianiać svajo myśleńnie ŭ našaj krainie».
Juryst carkvy Siarhiej Łukanin paviedamiŭ «Svabodzie»:
«Ciaham tydnia było niekalki niečakanych vizytaŭ pradstaŭnikoŭ roznych słužbaŭ. Hetaja sytuacyja nam vielmi nahadała toje, što adbyłosia letaś, kali ŭ nas ledź nie adabrali naš budynak. Voś i ciapier jany pryjechali na čatyroch mašynach: mikraaŭtobus ź milicyjaj i «džyp» ź niejkimi dvuma maładymi ludźmi ŭ cyvilnym ź videakameraj. Usie jany sprabavali ŭvajści ŭ naš budynak. Dla nas hetaja sytuacyja vidavočnaja. My j dalej budziem pilna sačyć za ŭsim hetym, kab naš budynak zastaŭsia ŭ našych rukach».
U letašniaj haładoŭcy ŭdzielničali vierniki inšych pratestanckich cerkvaŭ. Jany pilna sočać za sytuacyjaj vakoł budynku na vulicy Kavalova, kab u vypadku novych sprobaŭ pazbavić viernikaŭ chrama, prajavić svaju salidarnaść ź viernikami carkvy «Novaje žyćcio».
Na parłamienckich vybarach u Francyi pieramahajuć ultrapravyja z Maryn Lo Pen. Partyja Makrona treciaja3
Kamientary