U Biełarusi ŭ najbližejšy čas možna budzie zdavać skarystanyja tavary i taru ŭ handlovych abjektach. Jak paviedamiŭ 24 lipienia na pres-kanfierencyi ŭ Minsku namieśnik ministra žyllova-kamunalnaj haspadarki Anatol Šahun, padrychtavany adpaviednyja źmieny i dapaŭnieńni va ŭkaz prezidenta.
Prajektam dakumienta praduhledžvajecca nadańnie prava ŭradu vyznačać vidy tavaraŭ i tary, jakija buduć abaviazkova prymacca ŭ handlovych abjektach.
«Heta značyć, pry handlovych abjektach buduć stvaracca pryjomnyja punkty. Heta ŭ asnoŭnym buduć punkty pa zbory enierhaźbierahalnych lamp, batarejek, šklanoj tary. My bačym, što najbolš aptymalny sposab pryjomki hetych adchodaŭ — tam, dzie ich pradajuć. Moža być i abmien na novy tavar. Dumajem, što hetaja norma budzie padtrymanaja i budzie ŭviedzienaja. Heta ŭ tym liku dazvolić nam palepšyć i situacyju z pryjomam šklanoj tary ŭ nasielnictva. Siońnia kompleksnyja pryjomnyja punkty druhasnaj syraviny pracujuć, ale ich niedastatkova. Adkryćcio ich u handli dazvolić stać im bolš dastupnymi i pavialičyć abjomy zboru», — ličyć Šahun.
Pavodle jaho słoŭ, u 2014 hodzie dziaržzakaz na zbor škła składaje 79 tys. ton i heta źviazana z realnymi patrebami šklanoj pramysłovaści. «Našy zavody mohuć vypuskać i bolš škłatary», — adznačyŭ namieśnik ministra. Na jaho dumku, «pierachod piŭnoj pramysłovaści ad PET-tary da škła vialikich prablem nie vykliča». Jon paviedamiŭ, što ciapier razhladajecca pytańnie pierachodu na depazitnuju sistemu pry prodažy tavaraŭ u tary. «Depazitnaja sistema — heta lepšy sposab sabrać i viarnuć u abarot jak maha bolšy pracent vypuščanaj tary na rynku. Hetaja sistema pakazvaje najlepšyja vyniki. U Hiermanii, naprykład, da 90% šklanoj tary viartajecca tolki dziakujučy tamu, što na jaje ŭstanoŭlena załohavaja cana ŭ 9, 14, 25 jeŭracentaŭ u zaležnaści ad cany butelki», — patłumačyŭ Šahun.
Što da zboru adpracavanych batarejek, to hetaja rabota pravodzicca z 2010 hoda, kali ŭ miescach prodažu stali ŭstanaŭlivacca adpaviednyja kantejniery, adznačyŭ namieśnik ministra. Z hetaha pieryjadu na zachoŭvańnie było sabrana 20 ton batarejek. «Jość dva varyjanty, što ź imi zrabić. Pieršy — adpravić na pierapracoŭčyja pradpryjemstvy za miežy krainy, u Rasiju abo Ukrainu, tamu što ŭ nas niama pierapracoŭčych mahutnaściej. Pytańnie prapracoŭvajecca. Pryčym heta mahčyma pry finansavańni DU «Apieratar druhasnych materyjalnych resursaŭ». Pry raźvićci sistemy zboru prykładna da 100 ton jość ekanamičnaja metazhodnaść adkryvać pierapracoŭku adchodaŭ u Biełarusi. Letaś BNTU pravioŭ navukovyja i daśledčyja raboty i vybraŭ aptymalnuju technałohiju pierapracoŭki. Dla taho kab pačać hetuju rabotu, treba pavialičyć abjomy zboru. Ja dumaju, z raźvićciom sistemy zboru batarejek praz abjekty handlu heta dazvolić nam pierajści da ich pierapracoŭki na svajoj terytoryi, i heta sprava najbližejšych hadoŭ», — ličyć Šahun.
Pavodle jaho słoŭ, pa pierapacoŭcy luminiescentnych lamp jość dastatkova mahutnaściej, u tym liku na Bresckim elektralampavym zavodzie. «Ale dla arhanizacyj i pradpryjemstvaŭ prablemy zboru niama, a voś drobnymi partyjami ad nasielnictva — prablematyčna. My raźličvajem, što źmieny ŭ zakanadaŭstvie dazvolać vybudavać sistemu. Hałoŭnaje — jak zacikavić ludziej i jak zrabić, kab sistema pracavała pastajanna i biez zbojaŭ», — ličyć namieśnik kiraŭnika viedamstva.
