Biełaruskaja asacyjacyja žurnalistaŭ arhanizavała pres‑kanferencyju z muzykami, jakija dva dni da hetaha sustrakalisia z hałoŭnym ideolaham krainy. Muzyki tak i nie syšlisia ŭ adzinym mierkavańni, ci była pramoŭlenaja Aleham Pralaskoŭskim fraza, što zabarona na kancerty źniataja. Niechta kazaŭ, što čuŭ jaje, inšyja — što nie.
U piatnicu 23 listapada Biełaruskaja asacyjacyja žurnalistaŭ arhanizavała pres‑kanferencyju z muzykami, jakija dva dni da hetaha sustrakalisia z hałoŭnym ideolaham krainy Aleham Pralaskoŭskim. Sustreča z žurnalistami zadumvałasia dziela taho, kab kančatkova rasstavić kropki nad «i» ŭ hetym pytańni.
Lavon Volski (NRM), Pit Paŭłaŭ (NRM), Ihar Varaškievič («Krama»), Alaksandar Kullinkovič («Nejra Dziubel») i Aleh Chamienka («Pałac») źjavilisia pierad žurnalistami ŭ dosyć dobrym nastroi. Šmat žartavali i śmiajalisia.
Lider «Pałacu» Aleh Chamienka adrazu adznačyŭ, što ichniaja sustreča z Pralaskoŭskim — heta nie padzieja.
«Padzieja — taja reakcyja, jakaja źjaviłasia paśla sustrečy. Toje, što pišuć na roznych sajtach i forumach. Nas prosta zaličyli ŭ zdradniki. My daŭno chacieli padobnaj kanstruktyŭnaj razmovy i ciapier adčuli, što jana mahčymaja», — skazaŭ A. Chamienka.
«Mnie plavać, što siońnia pra nas pišuć. My zastalisia tymi, chto jość. Ničoha nie źmianiłasia», — adznačyŭ I.Varaškievič.
Pit Paŭłaŭ karotka raskazaŭ, jak adbyvałasia razmova ź ideolaham:
«Sustreča doŭžyłasia prykładna paŭhadziny. Pralaskoŭski pačaŭ havorku dosyć pryjazna, navat paprasiŭ prabačeńnia za toje, što z hurtami skłałasia takaja sytuacyja. Jon vykazaŭ poŭnuju hatoŭnaść da dyjalohu. Pa słovach čynoŭnika, sustreča prachodziła z asabistaj inicyjatyvy Łukašenki. Kožny z nas atrymaŭ słova, dzie my vykazvali svaje kryŭdy za apošnija try hady. Muzyki havaryli pa‑biełarusku, čynoŭnik taksama čas ad času ŭžyvaŭ niekatoryja biełaruskija słovy. My ad pačatku stavilisia da hetaj sustrečy dosyć skieptyčna, bo nia vieryli, što jana moža skončycca niečym dobrym. Pralaskoŭski prapanavaŭ nam rychtavać pieradaču dla BT, a taksama arhanizavać kancert «Rok za Biełaruś». My, naturalna, admovilisia ad apošniaha, ale možna zładzić kancert pad nazvaj «Rok dla Biełarusi». Nia treba kryŭdzicca na słovy Kullinkoviča, što Pralaskoŭski adekvatny čałaviek — heta sapraŭdy tak. Padčas razmovy asabista ja ŭžyvaŭ takija vyrazy, jak «kryvavy režym» i nichto nie sprabavaŭ mnie zatknuć rot. Zdałosia, što jany pavažajuć našu pazycyju. Tolki ŭ samym kancy razmovy Pralaskoŭski u rekamendacyjnaj formie paraiŭ nam nie hrać na kancertach apazycyi. Ale nijakich pahadnieńniaŭ ź im my nie zaklučali», — skazaŭ Paŭłaŭ.
Kullinkovič paviedamiŭ, što pra palityku razmova nie viałasia ŭvohule, kali nie ličyć frazy «Chłopcy, nia leźcie ŭ palityku, zajmajciesia muzykaj».
«Niezaležna ad vyniku sustrečy nas abvinavačvajuć u niejkim kryminale. Ale zabyvajucca, što my try hady nie mahli nidzie narmalna dać kancert. Što davodziłasia vystupać na niajakasnych placoŭkach, paśla čaho ŭsie kazali pra kiepski huk, pra toje, što kancert byŭ drenny. Tak nie mahło praciahvacca viečna», — ličyć Ł.Volski.
Aleh Chamienka raskazaŭ, što na sustrečy abmiarkoŭvaŭsia los taksama maładziejšych hurtoŭ, jakija taksama sutykajucca z prablemami vystupaŭ. Zakranałasia havorka i pra los festyvalaŭ «Rok‑koła» i «Basovišča», jakim dziaržava nie akazvaje nijakaj padtrymki.
«My havaryli pra prablemy va ŭsim biełaruskim mastactvie, nia tolki ŭ muzycy, — u litaratury, žyvapisie, chareahrafii. Nielha ŭsio zvodzić tolki da našych rok‑hurtoŭ. My nie palityki, my — tvorcy, tamu i nadalej my budziem zajmacca tolki kulturnaj palitykaj», — miarkuje Aleh Chamienka.
Na pytańnie, ci budzie mianiacca repertuar hurtoŭ paśla hetych padziej Lavon Volski adkazaŭ u žartaŭlivaj formie:
«Ujavicie, što NRM vykonvaje pieśniu «Majo pakaleńnie» razam z Anatolem Jarmolenkam, a «Nas da chalery» — z choram BRSM»,
Adnosna taho, dziela čaho ŭładam była patrebnaja hetaja sustreča vykazaŭsia Pit Paŭłaŭ:
«Finansavaja i ekanamičnaja kańjunktura dyktuje takija kroki. Ułady hatovyja pajści na niejkija sastupki Eŭropie, chaj choć znoŭ dazvoliŭšy NRM i «Kramu». My razumiejem, što nas zaprasili, kab vykarystać, ale my nie pasunulisia ni na santymetar. My zastalisia na raniejšych pazycyjach».
Naprykancy pres‑kanferencyi muzyki tak i nie syšlisia ŭ adzinym mierkavańni, ci była pramoŭlenaja Aleham Pralaskoŭskim fraza, što zabarona na kancerty źniataja. Niechta kazaŭ, što čuŭ jaje, inšyja — što nie. Adnak ideolah daŭ numar telefonu svajoj pryjomnaj Pitu Paŭłavu i skazaŭ telefanavać jamu, adrazu jak u muzykaŭ uźniknuć prablemy.
Na parłamienckich vybarach u Francyi pieramahajuć ultrapravyja z Maryn Lo Pen. Partyja Makrona treciaja5
Kamientary