…Drukavanyja adbitki hladzieli navat na śviatło ŭ pošukach zamaskavanaj syjanisckaj symboliki:) Zhadvaje ŭ svaim błohu Alaksandar Kłaskoŭski.
Kali mierkavany novy paradak selekcyi dla achvotnych stać žurnalistami, jurystami i h.d. paraŭnać z savieckaj zaviadzionkaj, dyk varta pryznać, što pry kamunistyčnym tatalitaryźmie było valniej :)
Ja pastupaŭ na žurfak BDU ŭ 75-m. Tre' było mieć nia mieniej za try publikacyi dy charaktarystyku-rekamendacyju z taje redakcyi, ź jakoj supracoŭničaŭ. Ja tady ŭžo stała drukavaŭsia ŭ svajoj rajoncy i patrebnuju papieru atrymaŭ biez prablem i biez anijakaj pratekcyi (dyj nie było ŭ baćkoŭ-viaskoŭcaŭ niejkaj "vałasataje ruki").
Karaciej, uładnaja "vertykal" da hetaj spravy nijakaha dačynieńnia nia mieła. Kaniešnie, sam tahačasny druk byŭ całkam kiravany partyjna-dziaržaŭnym aparatam. Ale asabista mnie ŭ rajoncy dali kart-blanš, i pisaŭ ja pieravažna humareski. U ich dazvalałasia navat trochi krytykavać asobnyja niedachopy savieckaj rečaisnaści.
Dziadźki-rajonščyki, stomlenyja svaim kanvejeram, byli ščyra radyja niaštatnamu aŭtaru, jaki jašče i sam piša. Chto nia viedaje: za tymi časami ad medyjaŭ patrabavałasia mieć šyroki aktyŭ z pradstaŭnikoŭ roznych słajoŭ hramadztva, kab ilustavać tezu, što hazeta ŭ savieckaj krainie jość trybunaju dy tvorčaściu masaŭ. I navat hanararny fond byŭ stroha padzieleny ŭ praporcyi 40:60. Bolšuju častku naležała tak ci inačaj vypłočvać niaštatnikam. A pakolki ŭ rajonku nichto nadta nie pisaŭ, to karespandenty mieli tak zvanuju adpracoŭku — klapali dubovyja artykuły za podpisami dajarak, kambajneraŭ, bryhadziraŭ i h.d.
Tak što, sami razumiejecie, maju tvorčaść pryniali na ŭra. Ź idealahičnym vyčvarenstvam daviałosia sutyknucca paźniej, kali ŭ jakaści studenta-praktykanta inšym razam zanosiŭ pałosy z drukarni ŭ hałoŭlit — cenzuru. Tam drukavanyja adbitki hladzieli navat na śviatło ŭ pošukach zamaskavanaj syjanisckaj symboliki:) Ale heta ŭžo asobny siužet, mo' jak-niebudź raspaviadu.
Što ž da ciapierašnich mierkavanych navacyj, to žadanaha dla inicyjataraŭ efektu jany nie daduć. Uźniknie novaja karupcyjnaja zona: hetuju niebiaśpieku, pavodle "Eŭraradyjo", pryznaje navat dobra viadomy amataram artahrafii:) deputat Zdanovič. Zrazumieła taksama, što atrymanyja za chabar ci pa znajomstvie rekamendacyi nia buduć harantam addanaści režymu.
Śviadoma ž apazycyjnaja moładź budzie atrymlivać adukacyju za miažoj (jak heta robicca ŭžo i zaraz). Nie zabyvajma: da Vilni, dzie mieścicca EHU, ad Miensku bližej, čym da našych abłasnych centraŭ. Pryčym adukacyja tam eŭrapiejskaja, biez saŭkovych zamaročak.
Voś pra heta ŭ 75-m navat i nia maryłasia:)
Ciapier čytajuć
Chto taki Maćviej Bialaj, jakoha nibyta departavali ŭ Biełaruś? Raskazvajem historyju dziŭnaha aktyvista z padazronym minułym6
Kamientary