25 listapada — dzień naradžeńnia Kazulina

25 listapada lideru Biełaruskaj sacyjał-demakratyčnaj partyi (Hramada), eks-kandydatu ŭ prezidenty Biełarusi Alaksandru Kazulinu spaŭniajecca 52 hady.

Alaksandr Kazulin naradziŭsia 25 listapada 1955 hoda ŭ Minsku. Prafiesar, doktar navuk, akademik Akademii adukacyi Respubliki Biełaruś, akademik Mižnarodnaj akademii vyšejšaj škoły, hanarovy prafiesar Maskoŭskaha dziaržaŭnaha univiersiteta imia M.V.Łamanosava, vice-prezident Piatroŭskaj akademii navuk i mastactvaŭ. Adzin z aŭtaraŭ zakona "Ab adukacyi Respubliki Biełaruś".

U 1996 hodzie A.Kazulin byŭ pryznačany rektaram BDU, a ŭ 2000-m — abrany na hetu ž pasadu bolšaściu Abjadnanaha savieta univiersiteta ŭ składzie pradstaŭnikoŭ prafiesarska-vykładčyckaha składu, navukovych supracoŭnikaŭ, aśpirantaŭ i studentaŭ.

U 2003 hodzie A.Kazulin byŭ zvolnieny ŭ suviazi z kryminalnaj spravaj, što była zaviedziena ŭ adnosinach da słužbovych asob pradpryjemstva "Unikaštmiet BDU". Spačatku jon prachodziŭ pa spravie ŭ jakaści padazronaha, adnak nieŭzabavie abvinavačańni z byłoha rektara byli źniatyja.

U 2006 hodzie bałatavaŭsia na pasadu prezidenta Biełarusi i zapomniŭsia vybarščykam rezkimi vykazvańniami na adras dziejnaj ułady.

25 sakavika byŭ zatrymany ŭ čas masavaj akcyi z nahody śviatkavańnia hadaviny abviaščeńnia Biełaruskaj Narodnaj Respubliki ŭ Minsku.

13 lipienia 2006 hoda sud pryznaŭ A.Kazulina vinavatym u "naŭmysnych dziejańniach, što hruba parušajuć hramadski paradak, <...> jaki supravadžajecca prymianieńniem nasilla i źniščeńniem čužoj majomaści", a taksama ŭ "arhanizacyi hrupavych dziejańniaŭ, što hruba parušajuć hramadski paradak, spałučanych ź jaŭnym niepadparadkavańniem zakonnym patrabavańniam pradstaŭnika ŭłady, što paciahnuli parušeńnie raboty transpartu, pradpryjemstvaŭ, i aktyŭnym udziele ŭ takich dziejańniach". Palityka pryhavaryli da pazbaŭleńnia voli na piać z pałovaj hadoŭ. Pakarańnie jon adbyvaje ŭ viciebskaj papraŭčaj kałonii ahulnaha režymu "Vićba-3".

Z 20 kastryčnika pa 11 śniežnia 2006 hoda A.Kazulin pravodziŭ u kałonii haładoŭku z metaj pryciahnuć uvahu Savieta biaśpieki AAN da situacyi ŭ Biełarusi. Heta meta była dasiahnuta — pa inicyjatyvie ZŠA biełaruskaje pytańnie abmiarkoŭvałasia Savietam biaśpieki AAN. "Mižnarodnaja amnistyja" abjaviła A.Kazulina palitźniavolenym.

Zhodna z apytańniem Niezaležnaha instytuta sacyjalna-ekanamičnych i palityčnych daśledavańniaŭ (Vilnius, Litva), što pravodziŭsia ŭ mai 2007 hoda, 34,9% hramadzian Biełarusi ličać, što A.Kazulin asudžany pa palityčnych matyvach i pavinien być vyzvaleny.

Ciapier u kałonii "Vićba-3" znachodzicca siamja Alaksandra Kazulina — rodnym dazvolena doŭhaterminovaje (trochdzionnaje) spatkańnie sa źniavolenym.

• 0
• 0
• 0
• 0
• 0
• 0
• 0
• 0