Minaki ździŭlena abaročvajucca na dziaŭčynu ŭ viasielnych strojach. Jašče b! U niaviesty liłovy siniak pad vokam, a zamiest tradycyjnaha bukieta ŭ rukach ulotki.
— Vaźmicie ŭlotku, kali łaska, — źviartajecca jana da ludziej. — Spynim hvałt nad žančynami razam!
25 listapada, u Suśvietny dzień baraćby z hvałtam nad žančynami, pradstaŭnicy BCHK dy «Mižnarodnaj amnistyi» pry padtrymcy moładzievych aktyvistaŭ praviali infarmacyjnuju kampaniju.
Dziaŭčyny, pieraapranutyja niaviestami, namalavali na sabie siniaki i apoŭdni pačali razdavać ulotki ŭ handlovym centry «Stalica». Paźniej infarmacyjnaja hrupa pierasunułasia ŭ HUM.
Jak skazała pradstaŭnica «Mižnarodnaj amnistyi», Štefani Bekmann, «mienčuki akazalisia ciaplejšymi za nadvorje». Nasamreč, ludzi byli pryvietnymi, ščyra cikavilisia prablemaj, čytali ŭlotki nie tolki sami, ale abiacali pieradać ich siabram i susiedziam. Tym bolš, što va ŭlotkach akramia aktualnaj infarmacyi pra hvałt nad žančynami ŭ našaj krainie, byli paznačaty telefony davieru MUS, praź jakija pa dapamohu moža źviarnucca luby, kamu jana patrebna.
Siniaki na niaviestach nie raspaznavalisia zdalok, i tamu minaki byli šakiravany, kali padychodzili bližej. Heta i stała sensam kampanii, bo chatni hvałt moža być niezaŭvažnym, navat dla samich achviar.