Stvaryć Mižparlamenckuju asambleju rehijona Bałtyi, u jakuju uvajšli b i pradstaŭniki demakratyčnych siłaŭ Biełarusi, prapanavaŭ ministar zamiežnych spravaŭ Litvy Piatras Vajciakunas. Hetuju inicyjatyvu jon ahučyŭ u Ryzie na kanferencyi “Palityka dobrasusiedztva Eŭraźviazu: pa šlachu da Eŭropy z ahulnymi kaštoŭnaściami”. Na dumku ministra, heta dapamoža raźvivać dyjaloh Biełarusi z Eŭraźviazam.
Udzielnik kanferencyi, były kandydat u prezydenty Biełarusi Alaksandar Milinkievič pa viartańni ŭ Miensk zajaviŭ:
“Lubaja ideja, jakaja pavialičvaje zacikaŭlenaść mižnarodnaj supolnaści da Biełarusi, sama pa sabie pazytyŭnaja. Mahčyma jana padšturchnie biełaruskija ułady da dyjalohu – uzajemapavažlivaha i raŭnapraŭnaha -- z hramadztvam”.
U svajoj pramovie na kanferencyi Alaksandar Milinkievič vykazaŭsia za pašyreńnie kantaktaŭ krainaŭ Eŭraźviazu ź biełaruskaj hramadzianskaj supolnaściu, za vykanańnie 12 umovaŭ EZ, jakija adpaviadajuć biełaruskamu nacyjanalnamu intaresu. Vyzvaleńnie usich palityčnych viaźniaŭ i spynieńnie represijaŭ – heta pieršy krok, jaki pavinien zrabić aficyjny Minsk na hetym šlachu.
