Fota BiełTA.
Alaksandr Łukašenka 7 žniŭnia pravioŭ naradu pa prajekcie zakona, jaki praduhledžvaje kompleksnuju karekciroŭku kryminalnaha i kryminalna-pracesualnaha zakanadaŭstva, paviedamili ŭ pres-słužbie kiraŭnika dziaržavy.
Prajekt hetaha zakona ŭžo abmiarkoŭvaŭsia ŭ žniŭni minułaha hoda.
U pryvatnaści, razmova išła ab prymianieńni dasudovaha pahadnieńnia ab supracoŭnictvie, ukaranieńni kryminalna-pravavoj kampiensacyi, vyklučeńni procipraŭnaści dziejańnia pry dziełavoj ryzycy. Prapanoŭvałasia taksama dekryminalizavać asobnyja dziejańni, jakija nie ŭjaŭlajuć vialikaj hramadskaj niebiaśpieki, pašyryć prymianieńnie štrafu i pavialičyć jaho pamier za ekanamičnyja złačynstvy, unieści šerah inšych źmianieńniaŭ.
Pry hetym Łukašenka daručaŭ deputatam sumiesna z pravaachoŭnymi orhanami, a taksama ź biźnies-supolnaściu dadatkova detalova abmierkavać prajekt.
Jak padkreśliŭ u chodzie narady Alaksandr Łukašenka, pryncyp niepaźbiežnaści pakarańnia za ŭčynienyja złačynstvy pavinien zastavacca nieparušnym: «Paturać biespakaranaści my nie majem nijakaha prava».
Alaksandr Łukašenka pacikaviŭsia, ci nie stanuć prapanavanyja novaŭviadzieńni na spravie tolki prałazam dla niačystych na ruku ludziej, u pryvatnaści, u vypadku ŭviadzieńnia miechanizma dasudovaha pahadnieńnia ab supracoŭnictvie. Pa jaho ŭmovach złačyncu, kab źmienšyć termin svajho pakarańnia, treba budzie paviedamić ab čužych złačynstvach.
«Adnak adrazu ŭźnikajuć pytańni: ci nie zavalać złačyncy śledčyja orhany «kazkami» pra vydumanych saŭdzielnikaŭ? Ci nie buduć nahavorvać na luboha dziela ŭratavańnia svajoj škury?
Ci nie stanie takoje pahadnieńnie dla asabliva niebiaśpiečnych krymalnych elemientaŭ sposabam paźbiehnuć strohaj zasłužanaj adkaznaści? — adznačyŭ Alaksandr Łukašenka. —
I davajcie ščyra: ci ŭpeŭnieny my ŭ svaich pravaachoŭnikach, u tym, što jany buduć prymianiać takoje pahadnieńnie tolki ŭ zakonnych metach? A nie dla ŭłasnaj nažyvy, atrymlivajučy adkaty pry zaklučeńni pahadnieńniaŭ ab supracoŭnictvie za całkam lehalnaje ablahčeńnie losu złačyncaŭ».
Alaksandra Łukašenku zapeŭnili, što heta daść dadatkovyja mahčymaści ŭ baraćbie z pravaparušeńniami ŭ takich śfierach, jak, naprykład, karupcyja abo narkatrafik, dzie važna vyjavić usie źviony złačynnaha łancuha. Zakonaprajekt taksama praduhledžvaje niekalki stupieniaŭ kantrolu taho, nakolki efiektyŭna realizujecca takoje pahadnieńnie, i ci sapraŭdy abvinavačany zasłuhoŭvaje bolš miakkaha pryhavoru suda.
Na heta Alaksandr Łukašenka zaŭvažyŭ, što zaklučeńnie dasudovych pahadnieńniaŭ ab supracoŭnictvie nie pavinna praźmierna abmiežavać mahčymaści sudoŭ i faktyčna apuścić častku sudovaha rasśledavańnia na ŭzrovień prakurora. Ź inšaha boku, złačynca, jaki zasłuhoŭvaje samaha strohaha pakarańnia za ŭčynienaje im ciažkaje abo asabliva ciažkaje złačynstva, nie pavinien atrymać mahčymaść z dapamohaj takoha pahadnieńnia ŭchilicca ad adkaznaści.
«Niachaj jon navat pra dziasiatak inšych złačynstvaŭ raskaža, ale kali jon, naprykład, zhvałciŭ i zarezaŭ dziaŭčynu, takomu daravańnia być nie pavinna. Jon pavinien adkazvać. I kab zrazumieć mianie, vy pasprabujcie siabie pastavić u stanovišča tych baćkoŭ (achviary złačynstva)», — padkreśliŭ kiraŭnik dziaržavy.
Jon taksama vykazaŭ mierkavańnie, što kali dasudovyja pahadnieńni ab supracoŭnictvie buduć vykarystoŭvacca tolki dla raboty pa niejkich kankretnych składach złačynstvaŭ, to, mahčyma, varta ich dakładna prapisać, kab nie pakidać heta pytańnie na asabistaje vyrašeńnie prakurora.
Na naradzie taksama razhladalisia miery adkaznaści, nie źviazanyja ź izalacyjaj ad hramadstva, — štrafy, kryminalna-pravavaja kampiensacyja.
«My ich aktyŭna pašyrajem u hetym prajekcie. Ale ci jość harantyja, što hetyja miery buduć prymianiacca mienavita da tych, chto dastojny pabłažki, kaho i sapraŭdy lepš pakarać rublom, a nie adsiedžvańniem?» — zadaŭ pytańnie Łukašenka. Jon taksama pacikaviŭsia, ci zmoža materyjalnaje ŭździejańnie zamiest realnaha terminu zabiaśpiečyć vypraŭleńnie hetych asob i ci treba ŭvodzić takija paturańni pa ŭsich składach złačynstvaŭ, jakija karekcirujucca prajektam u adpaviednaj častcy.
Alaksandr Łukašenka rastłumačyŭ, što aceńvaje ŭsie prapanujemyja zakonaprajektam novaŭviadzieńni z punktu hledžańnia ich nieabchodnaści prymianialna da ciapierašniaj situacyi i raźvićcia pravaadnosin u Biełarusi.
«Tak, u nas nie ŭsio dobra. My jašče ŭ niečym adstajom, ale my nie Ukraina, nie Rasija i navat nie Zachad. U nas usio ž taki pravaachoŭnyja orhany bolš-mienš stroha pracujuć.
Nie mahu skazać, što ŭ nas pryncyp niepaźbiežnaści pakarańnia pracuje horš, čym u inšych krainach, — adznačyŭ biełaruski lidar. — Pry hetym u nas za čas «dyktatury» Łukašenki siadzielcaŭ u turmie ŭ paraŭnańni z «demakratyčnymi časami» stała ŭ dva razy mienš.
Heta značyć my z našym zakanadaŭstvam całkam paśpiachova zmahajemsia sa złačynstvami, i nas nichto nie moža abvinavacić u tym, što my pierasadžali ŭsich u turmu».
Kiraŭnik dziaržavy taksama padkreśliŭ, što prablema dziejsnaści luboha zakanadaŭstva ŭ značnaj stupieni zaklučajecca i ŭ asabistym staŭleńni kadraŭ, u pieršuju čarhu kiraŭnikoŭ viedamstvaŭ pravaachoŭnaha błoka, kantralujučych orhanaŭ, da vyrašeńnia tych ci inšych zadač. Pavodle acenki kiraŭnika dziaržavy, dziejnaść kiraŭnikoŭ šeraha adpaviednych viedamstvaŭ nie ŭ poŭnaj miery adpaviadaje jaho čakańniam, što vymušaje jaho niaredka asabista ŭmiešvacca ŭ vyrašeńnie pytańniaŭ, źviazanych z vykanańniem zakonnaści i pravaparadku ŭ krainie.
Pa vynikach narady Alaksandr Łukašenka daručyŭ pradstavić jamu karotki i dakładny supastaŭny analiz prapanujemych źmianieńniaŭ pa najbolš važnych artykułach. «Ale jašče raz chaču skazać, što my nie pavinny spraščacca. Ni ŭ jakim razie, — padkreśliŭ jon. — U nas vielmi šmat parušeńniaŭ, asabliva ŭ śfiery karupcyi, dzie treba ŭzmacniać baraćbu, i my tam taksama razhladajem navieły, i ŭ častcy ciažkich złačynstvaŭ u ekanamičnaj śfiery. My tut stračvajem kuču hrošaj».
