«Hazprom» padymie ceny na haz da rekordnych adznak

Eŭrapiejskija spažyŭcy pavinny być hatovyja da taho, što ŭ suviazi z rostam cen na naftu ŭ nastupnym hodzie taryfy na haz vyrastuć na 17% i dasiahnuć novych rekordnych adznak, papiaredziŭ namieśnik kiraŭnika «Hazproma».

Alaksandar Miadźviedzieŭ (Miedviediev), namieśnik staršyni upravy «Hazproma», zajaviŭ, što pavodle jahonych prahnozaŭ, cana na haz, jaki pastaŭlajecca ŭ Zachodniuju Eŭropu, uźnimiecca da 300‑350 dalaraŭ za tysiaču kubametraŭ, bo ŭ kantraktach hety pakaźnik źviazany z rascenkami na naftapradukty, naprykład, na topačny mazut.

Jon dadaŭ, što luboje pavyšeńnie cenaŭ na turkmenski haz u poŭnaj miery adabjecca na ŭkrainskich spažyŭcach.

Učora ŭviečary «Hazprom» abjaviŭ pra toje, što z Turkmenijaj dasiahnutaje pahadnieńnie pra rezkaje pavyšeńnie cenaŭ. Rasiejskaja dziaržaŭnaja kampanija ŭ pieršaj pałovie nastupnaha hodu budzie płacić 130 dalaraŭ za tysiaču kubametraŭ, a ŭ druhoj — 150 dalaraŭ suprać 100 dalaraŭ sioleta. A z studzienia 2009 hodu «Hazprom» piarojdzie na formułu cany, «zasnavanuju na rynkavych pryncypach».

Miadźviedzieŭ abvierhnuŭ ćvierdžańni, što «Hazprom» manipuluje cenami ŭ Zachodniaj Eŭropie, i zajaviŭ, što pavyšeńnie cenaŭ jość vynikam dziejańnia formuły cany.

«Ceny na haz bolš pradkazalnyja i mienš źmienlivyja, čym ceny na naftu, — skazaŭ jon. — Zhodna z acenkami pa kankurentnych praduktach… siaredniaja cana pastavak u Zachodniuju Eŭropu moža dasiahnuć 300‑350 dalaraŭ za tysiaču kubametraŭ. Tak ci inakš, heta ni ŭ jakim razie nia stanie vynikam jakich‑kolviek manipulacyj».

Košt hazu ŭ kantynentalnaj Eŭropie padymiecca na novyja vyšyni. Zrešty, i ciapierašnija ceny — kala 300 dalaraŭ za tysiaču kubametraŭ — jość rekordnymi.

Staršynia Heren Energy Patryk Cheren zajaviŭ, što zaviazanyja na naftu hazavyja kantrakty źjaŭlajucca vynikam adsutnaści kankurencyi na hazavym rynku kantynentalnaj Eŭropy.

«U Eŭropie nie isnuje deficytu hazu, niama nijakaj suviazi miž prapanovaj, popytam i canoj, — skazaŭ jon. — Takaja systema skłałasia z‑za taho, što ŭ nas u Eŭropie faktyčna niama rynku kankurencyi, i heta idzie na karyść pastaŭščykam».

Miadźviedzieŭ skazaŭ, što «spadziajecca» dasiahnuć pahadnieńnia z Ukrainaj nakont formuły cenaŭtvareńnia, jakaja vykarystoŭvajecca dla raźliku cenaŭ na haz z azijackich respublik, ale dadaŭ, što zhodna z tranzytnymi damovami, jakija z 2011 hodu praduhledžvajuć pierachod na hazazabieśpiačeńnie Ŭkrainy pa rynkavych taryfach, luboje pavyšeńnie zakupačnych cen dla «Hazproma» budzie pierakładacca na spažyŭca.

«Adzinaje, što ja mahu vam skazać: «Hazprom» nie hatovy ŭziać na siabie ŭsie cenavyja ryzyki, źviazanyja z zakupkami, jakija my robim u siarednieazijackich respublikach, — skazaŭ Miadźviedzieŭ. — My nie niekamercyjnaja, nie dabračynnaja arhanizacyja. U nas jość abaviazalnictvy pierad našymi akcyjanerami».

Aproč taho, namieśnik staršyni ŭpravy «Hazproma» krytyčna adhuknuŭsia na sproby zablakavać budaŭnictva hazapravodu Nord Stream, jaki musić prajści pa dnie Bałtyjskaha mora j źviazać Rasieju ź Niamieččynaj.

«Kali chto‑niebudź pa niejkich palityčnych matyvach hatovy ŭziać na siabie takuju adkaznaść i pierakryć halinu prapusknoj zdolnaściu 55 młrd kubametraŭ, jakaja źviazvaje nas z Eŭropaj, tady, ja dumaju, jamu daviadziecca adkazać i za niedachop syraviny ŭ hetym rehijonie», — skazaŭ jon.

InoPressa.ru z spasyłkaj na Financial Times

• 0
• 0
• 0
• 0
• 0
• 0
• 0
• 0