Ukrainska‑biełaruskaje pradstaŭnictva Microsoft uznačaliŭ halandziec
Na źmienu Valeryju Łanavienku, jaki syšoŭ u Apple, pryjšoŭ były prezydent rasiejskaj «Komstar‑OTS» Eryk Frankie.
Razam z halandcam Erykam Frankie adkaznaść za dziejnaść Microsoft u našaj krainie niasie menedžar Microsoft pa pracy z partnerami ŭ Biełarusi Andrej Bajuščanka, paviedamlaje «Ježiednievnik». Pavodle źviestak «Je», novy kiraŭnik ukraina‑biełaruskaha pradstaŭnictva Microsoft nieadnarazova vyklikaŭ narakańni z boku ŭłaśnikaŭ «Komstar‑OTS» za marudnyja tempy raźvićcia kampanii. I, nibyta, ukrainski ofis Microsoft čakaje toje samaje. Adznačajecca, što z momantu, kali biełaruski rynak z zony ŭpłyvu maskoŭskaha pradstaŭnictva kampanii farmalna pierajšoŭ pad kiraŭnictva ŭkrainskaha ofisu, u nas spynilisia reformy i finansavańnie softvernych prajektaŭ. Adzinym vyjściem z sytuacyi specyjalisty ličać adkryćcio ŭ Miensku asobnaha rehijanalnaha pradstaŭnictva, što moža adbycca ŭ 2009 h. Adnak usio budzie zaležyć ad abjomaŭ jaho finansavańnia.
Varta nahadać, što nieadnojčy ad pačatku funkcyjanavańnia biełaruskaha pradstaŭnictva Microsoft uzdymałasia pytańnie pra stvareńnie biełaruskamoŭnaj versii Windows. U vieraśni 2006 h. Andrej Bajuščanka paviedamiŭ pra adpaviedny prajekt, paabiacaŭšy biełaruskamoŭnyja Windows u červieni 2007 h. Adnak uletku biahučaha hodu vyśvietliłasia, što sprava tak i skranułasia ź miesca. Adkazvajučy na pytańnie žurnalistaŭ pra los prajektu, tahačasny kiraŭnik pradstaŭnictva kampanii Microsoft pa Ukrainie i krainach SND Valery Łanavienka zaznačyŭ nastupnaje: «Paśla kansultacyj z šeraham dziaržaŭnych ustanovaŭ, a taksama z našymi partnerami my bačym, što popyt na biełaruskamoŭny varyjant našych praduktaŭ budzie nievysoki. Microsoft — kamercyjnaja kampanija. Kali my prymajem rašeńni pa lakalizacyi našych praduktaŭ, my aryjentujemsia na spažyŭcoŭ. Prajekt, napeŭna, budzie raźvivacca, ale nie ŭ tyja terminy, jakija my pieršapačatkova planavali».
***
Eryk Frankie naradziŭsia ŭ 1955 h. Skončyŭ Delfcki ŭniversytet. Pracavaŭ u kampanijach Ericsson, Koning&Hartman, Golden Telecom. U 2001 h. Eryka Frankie pryznačyli Hieneralnym dyrektaram kampanii UMC. U 2005 h. zaniaŭ pasadu pieršaha vice‑prezydenta kampanii MTS.
Ciapier čytajuć
Chto taki Maćviej Bialaj, jakoha nibyta departavali ŭ Biełaruś? Raskazvajem historyju dziŭnaha aktyvista z padazronym minułym3
Kamientary