Staršynia Minharvykankama Mikałaj Ładućka daručyŭ uzmacnić u Minsku rekłamu biełaruskich tavaraŭ. Adpaviednaje daručeńnie jon daŭ siońnia na apieratyŭnaj naradzie.
«Siońnia nie chapaje rekłamy tavaraŭ ajčynnych vytvorcaŭ. U pryvatnaści, niedastatkova rekłamy chlebazavodaŭ, vytvorcaŭ piačeńnia i inšych pradpryjemstvaŭ», — ličyć Mikałaj Ładućka. Staršynia Minharvykankama taksama zaklikaŭ čaściej źviartać uvahu spažyŭca na adsutnaść škodnych štučnych dabavak u ajčynnych tavarach.
U suviazi z hetym Mikałaj Ładućka daručyŭ upraŭleńniu handlu i pasłuh Minharvykankama raspracavać dadatkovyja miery pa pavieličeńni doli ajčynnych tavaraŭ u minskich mahazinach. «Pradstaŭcie kankretny płan, u jakim buduć prapisany dakładnyja dziejańni. Supracoŭničajcie ź Ministerstvam handlu, inšymi strukturami», — skazaŭ jon.
Načalnik upraŭleńnia handlu i pasłuh Minharvykankama Nina Jemialjanava adznačyła, što ŭ I paŭhodździ ŭ Minsku rost udzielnaj vahi charčovych tavaraŭ ajčynnaj vytvorčaści naziraŭsia pa takich pazicyjach, jak piva, ryba, słabaałkaholnyja napitki, śmietankovaje masła, aŭsianyja krupy. Razam z tym, nie ŭdałosia źnizić impart lekavych srodkaŭ, chleba, piačeńnia, šakaładu, mučnych kandytarskich vyrabaŭ, abutku i adzieńnia. U niecharčovaj hrupie dola ajčynnych tavaraŭ u I paŭhodździ pavialičvałasia za košt parfumieryi, kaśmietyki, chaładzilnikaŭ, marazilnikaŭ.
Za studzień-červień 2014 hoda temp rostu roźničnaha tavaraabarotu ŭ Minsku skłaŭ 112,5 pracenta, aptovaha - 113,7 pracenta. Pryrost tavaraabarotu zabiaśpiečany ŭ pieršuju čarhu za košt adkryćcia ŭ stalicy ŭ I paŭhodździ 150 mahazinaŭ, troch handlovych centraŭ, 97 abjektaŭ hramadskaha charčavańnia amal na 4,5 tys. pasadačnych miesc. U I paŭhodździ na madernizacyju handlovych arhanizacyj i pradpryjemstvaŭ hramadskaha charčavańnia nakiravana Br38,4 młrd, što skłała 54,8 pracenta ad ahulnaha abjomu finansavańnia na hod.
