«Škoła inavacyjnych mieniedžaraŭ» moža źjavicca ŭ Biełarusi ŭ nastupnym hodzie. Ab hetym paviedamiŭ siońnia žurnalistam staršynia Dziaržaŭnaha kamiteta pa navucy i technałohijach Alaksandr Šumilin.
«U nas nie chapaje ŭ krainie inavacyjnych mieniedžaraŭ. Tamu ja liču, što ŭ nastupnym hodzie ŭ Biełarusi moža być stvorana tak zvanaja škoła dla vunderkindaŭ, škoła inavacyjnych mieniedžaraŭ, kudy my adbiarom 20-30 talenavitych maładych ludziej, jakija raźbirajucca pa roznych napramkach i ŭ technicy, i ŭ navucy. I praviadziom dla ich śpiecyjalizavanaje navučańnie nie tolki ŭ Biełarusi, navučym tamu, jak budavać inavacyjny biźnies, tamu što mała mieć ideju i jaje techničnaje rašeńnie, važna ŭsio pravilna arhanizavać», — rastłumačyŭ staršynia DKNT.
Akramia taho, u nastupnym hodzie hrupu biełaruskich studentaŭ płanujecca nakiravać na vučobu ŭ letniuju škołu fondu «Skołkava», dzie zajmajucca pytańniami realizacyi inavacyjnych prajektaŭ. «My z BRSM i inšymi arhanizacyjami pačniom farmiravać hrupy dla mahčymaści našych studentaŭ prajści tam navučańnie», — raskazaŭ staršynia DKNT. Pavodle jaho słoŭ, zhodna ź isnujučymi damoŭlenaściami dla Biełarusi navučańnie budzie biaspłatnym. «Heta dobraja mahčymaść atrymać adukacyju dla arhanizacyi inavacyjnaha biźniesu. U Rasii čytajuć lekcyi viadomyja mieniedžary z usiaho śvietu», — kanstatavaŭ Alaksandr Šumilin.
