Asudžany na piać sutak aryštu homielski hramadski aktyvist Kanstancin Žukoŭski abjaviŭ haładoŭku ŭ izalatary časovaha ŭtrymańnia UUS Homielskaha abłvykankama. Pra heta paviedamlaje pravaabarončy sajt spring96.org.
Žonka aktyvista Alena Žukoŭskaja pasprabavała pieradać mužu ciopłyja rečy, butelku z vadoj i vitaminy, adnak u IČU ničoha nie pryniali, rastłumačyŭšy heta tym, što «Žukoŭski maje drobnaje parušeńnie».
Nahadajem, žychar Homiela byŭ zatrymany 25 žniŭnia supracoŭnikami AMAP u dvary ŭłasnaha doma. Pryčym milicyju, a mienavita supracoŭnikaŭ DAI, Žukoŭski sam ža i vyklikaŭ: hruzavyja aŭtamabili z susiedniaj budoŭli zabłakavali jamu ŭjezd u dvor, a na prośby vyzvalić prajezd ich vadzicieli nie reahavali. Na vyklik razam z supracoŭnikami DAI pryjechali supracoŭniki AMAP, jakija potym i zatrymali aktyvista, pastaviŭšy jamu ŭ vinu «niepadparadkavańnie zakonnym patrabavańniam supracoŭnikaŭ milicyi» (art. 23.4 KoAP).
Na sudzie Žukoŭski zajaviŭ, što nie ŭčyniaŭ pravaparušeńnia. Supracoŭnik DAI adrazu ž paśla pryjezdu zapatrabavaŭ ad aktyvista prajści ŭ słužbovy aŭtamabil, nie tłumačačy pryčyn. Kali Žukoŭski admoviŭsia, supracoŭniki AMAP «pravodzili» jaho ŭ słužbovy aŭtamabil, dastavili ŭ Centralny RAUS, a zatym u IČU.
Sud nad aktyvistam adbyŭsia 28 žniŭnia. Sudździa suda Centralnaha rajona Homiela Volha Kazłova pryhavaryła Žukoŭskaha da piaci sutak administracyjnaha aryštu ŭ IČU.
Kamientary