Ministr abarony Ukrainy Valeryj Hieletej raskazaŭ, što pa nieaficyjnych kanałach Rasija pahražała prymianić taktyčnuju jadziernuju zbroju.
Pra heta jon napisaŭ na svajoj staroncy ŭ Facebook.
«Rasija prajhrała hibrydnuju vajnu Ukrainie.
Našy Uzbrojenyja Siły ŭpeŭniena ciaśnili bandy rasijskich najmitaŭ, źniščali dyviersantaŭ i śpiecnazaŭcaŭ. Mienavita tamu Kreml vymušany byŭ pierajści da poŭnamaštabnaha ŭvarvańnia svaich rehularnych vojskaŭ na terytoryju Danbasa.
Siońnia my ŭžo majem spravu z dyvizijami i pałkami. Zaŭtra heta mohuć być karpusy», — padkreśliŭ Hieletej.
Jon adznačyŭ, što apieracyja pa vyzvaleńni Uschodu Ukrainy ad terarystaŭ zavieršana. «My pavinny terminova vybudoŭvać abaronu ad Rasii, jakaja sprabuje nie tolki zamacavacca na terytoryjach, raniej akupavanych terarystami, ale i ažyćciaŭlać nastup na inšyja terytoryi Ukrainy», — ličyć ministr abarony.
Jon ličyć, što ŭ krainu pryjšła vajna, jakuju Jeŭropa nie bačyła z časoŭ Druhoj suśvietnaj. U takoj vajnie straty buduć vyličvacca nie sotniami, a dziasiatkami tysiač.
«Pa nieaficyjnych kanałach rasijski bok užo niekalki razoŭ pahražaŭ, što ŭ vypadku praciahu supracivu jany hatovyja ŭžyć suprać nas taktyčnuju jadziernuju zbroju. Dla taho, kab vystajać, nam nieabchodnaja poŭnaja kansalidacyja ŭsich najaŭnych sił», — padkreśliŭ jon.
Pa słovach ministra abarony, zakliki da źniaćcia z pasady Načalnika Hienieralnaha Štaba hienierała Muženka źjaŭlajucca pravakacyjaj RF, pakolki, pa słovach ministra, mienavita Muženka byŭ «architektaram ukrainskich pieramoh na Uschodzie».
«Mienavita jon spłanavaŭ i ažyćciaviŭ bliskučuju apieracyju pa faktyčnym vyzvaleńni ŭkrainskaha Danbasa. Kali b nie rasiejskaje ŭvarvańnie, my b niepaźbiežna zaviaršyli b aktyŭnuju fazu ATA ŭžo ŭ pačatku kastryčnika, vyzvaliŭšy ŭsiu terytoryju. Kadravyja źmieny pavinny być nakiravany na ŭzmacnieńnie, a nie pasłableńnie armii. Za apošni tydzień ad kamandavańnia byli adchilenyja 6 starejšych aficeraŭ. Na ich miesca pastaŭlenyja maładyja kamandziry, jakija dakazali svaju zdolnaść u bajach», — havorycca ŭ paviedamleńni.
Hieletiej ličyć, što siońnia Ukraina pavinna prademanstravać hatoŭnaść dać adpor ahresaru.
«Rasija ŭžo zapłaciła darahuju canu za ŭvarvańnie. Sotni rasijskich sałdat i aficeraŭ nazaŭždy znajšli prytułak va ŭkrainskim čarnaziomie. Krytyčnaja kolkaść strat niepaźbiežna praćviarezić Rasiju. Ale dla hetaha my pavinny admovicca ad panikiorstva i pakazać, što ŭkraincy nie źbirajucca zdavacca. Heta — naša Vialikaja Ajčynnaja Vajna i my ŭ joj abaviazkova pieramožam», — padsumavaŭ ministr u svaim zvarocie.
