Andrej Ścienin fatahrafavaŭ zachoplenaha ŭ pałon ukrainskaha sałdata Andreja Panasiuka, što dało padstavy vinavacić u dapamozie bajevikam. Paźniej paranieny Panasiuk napisaŭ list mamie Ścienina: «Mamie Andreja Ścienina ad sałdata Andreja Panasiuka. Ja chaču vam raskazać, što vašaha syna, kali ja byŭ paranieny, ja drenna pamiataju, ale vaš syn mianie nie biŭ, nie katavaŭ, jon prosta vykonvaŭ svaju pracu fatohrafa. Mnie škada, što tak vyjšła. Ja dumaju, što kali-niebudź nastanie mir»
Źnikły ŭ pačatku žniŭnia va Ukrainie fotakarespandent ahienctva «Rośsija siehodnia» (RIA Naviny) Andrej Ścienin zahinuŭ u rajonie Daniecka kala miesiaca tamu, paviedamiŭ hienieralny dyrektar ahienctva Dźmitryj Kisialoŭ sa spasyłkaj na ekśpiertyzu Śledčaha kamiteta Rasii.
«Naš kaleha fotakarespandent Andrej Ścienin zahinuŭ. Akazvajecca, jon nie byŭ u pałonie. Akazvajecca, jaho nie źbiralisia ni mianiać na kahości z ukrainskich vajskoŭcaŭ, ni vinavacić u terarystyčnaj dziejnaści», - havorycca ŭ zajavie Kisialova.
Jak havorycca na sajcie śledčaha kamiteta Rasii, śmierć Ścienina ŭstanavili paśla zaklučeńnia sudova-miedycynskaj i malekularna-hienietyčnaj ekśpiertyz zahinułych na paŭdniovym uschodzie Ukrainy.
Pavodle infarmacyi SKR, uviečary 6 žniŭnia žurnalist na aŭtamabili «Reno-Łohan» u składzie kałony biežancaŭ ruchaŭsia pa darozie Śniežnaje — Dźmitraŭka. Ukrainskaja armija adkryła ahoń na paražeńnie, u vyniku čaho było źniščana bolš za 10 mašyn, u tym liku aŭtamabil Ścienina, śćviardžajuć rasijskija śledčyja.
«Tolki 27 žniŭnia pradstaŭnikam apałčeńnia ŭdałosia pieradać u rasparadžeńnie rasijskaha śledstva pakiet z frahmientami abharełych astankaŭ piaci čałaviečych ciełaŭ, vyjaŭlenych u zharełaj mašynie «Reno-Łohan», - paviedamlaje SKR.
Ukrainski bok pakul nie prakamientavaŭ vysnovy rasijskich śledčych.
33-hadovy fotakarespandent Andrej Ścienin nie vychodziŭ na suviaź z 5 žniŭnia.
