Šmatlikija hieroi Majdanu iduć na vybary ŭ składzie Narodnaha Frontu Jacaniuka-Turčynava

Partyja «Narodny front», jakuju zhurtavali premjer-ministr krainy Arsień Jacaniuk i staršynia Viarchoŭnaj Rady Alaksandr Turčynaŭ, nazvała svaich kandydataŭ na vybarach u Viarchoŭnuju Radu

Jak paviedamlaje karespandent «Ukrainskaj praŭdy», uznačaliŭ śpis lidar partyi Arsień Jacaniuk.

U śpis taksama ŭvajšli daradca ministra ŭnutranych spraŭ Taćciana Čarnavił, muž jakoj zahinuŭ pad Danieckam, a taksama eks-sakratar RNBA Andrej Parubij. Pobač ź imi stajać proźviščy Andreja Ciecieruka — kambata śpiecbataljona «Miratvorac», ministra unutranych spravaŭ Arsiena Avakava, kambata Juryja Biarozy (bataljon «Dniapro-1»). Iduć ad Narodnaha Frontu taksama Michaił Bodnar z bataljona imia Kulčyckaha, Ihar Łapin z bataljona «Ajdar». U śpis uvajšli i historyk Uładzimir Vjatrovič, spartoviec Vasil Vyraściuk.

Ad partyi iduć taksama ministr justycyi Pavieł Piatrenka i eks-kiraŭnik administracyi prezidenta Siarhiej Pašynski, ministr sacyjalnaj palityki Ludmiła Dzianisava, eks-ministr finansaŭ Ukrainy Viktar Pinzenik i multymiljanier, prezident hrupy kampanij «Arłan-Trans» Jaŭhien Čyrvonienka.

 A kazak — hieroj Jeŭramajdanu — Michaił Haŭryluk prysutničaje nie tolki ŭ śpisie, ale i kandydatam pa mažyrytarnaj akruzie.

Sacyjołahi miarkujuć, što Narodny Front moža zaniać druhoje miesca na vybarach paśla Błoka Piatra Parašenki. U paraŭnańni z partyjaj prezidenta partyja Jacaniuka zajmaje bolš radykalnyja pazicyi jak u pytańniach ekanamičnych reformaŭ, tak i ŭ staŭleńni da Rasii. Asabistaja papularnaść Piatra Parašenki maje harantavać pieramohu i jahonamu vybarčamu śpisu.

U pieršuju dziasiatku Błoka Piatra Parašenki ŭvojduć mer Kijeva baksior Kličko, były ministr unutranych spraŭ, a paśla palitviazień Juryj Łucenka, doktarka Volha Bahamolec, vice-premjer Uładzimir Hrojsman i lidar krymskich tataraŭ Mustafa Džemileŭ. Akramia taho, ŭ viersie śpisa prysutničajuć vajskoviec Julij Mamčur, jaki pa-hierojsku pavioŭ siabie ŭ časie anieksii Kryma, i piśmieńnica ź Lvova Maryja Macios.

Siensacyjaj stała prysutnaść u śpisie Parašenki viadučych ukrainskich niezaležnych žurnalistaŭ Mustafy Najema i Siarhieja Leščanki, jaki prasłavilisia rasśledavańniami karupcyi ŭ viarchach. U prezidencki śpis uvajšli taksama zasnavalnica ruchu za prazrystaść vybaraŭ «Česna» i staršynia Kamiteta vybarcaŭ Ukrainy.

Ale pa mažarytarnych akruhach ad Błoku pojduć i šmatlikija miljaniery, i niamała asobaŭ z «byłoha režymu».

Dobryja šancy trapić u parłamient maje taksama Radykalnaja partyja na čale z Aleham Laško. U rejtynham zaŭvažnaja taksama «Samapomač», stvoranaja sajuzam hramadzianskich aktyvistaŭ z dapamohaj mera Lvova Andreja Sadovaha.

«Baćkaŭščyna» Julii Cimašenki i «Hramadzianskaja siła» byłoha ministra abarony Hrycenki trymajucca za košt papularnaści svaich kiraŭnikoŭ. Uvohule, vybarcy Ukrainy schilnyja hałasavać za asobaŭ, a nie za ideałohiju.

Častka byłoj Partyi rehijonaŭ pojdzie na vybary pad łejbłam «Apazicyjny błok». Sama ŭłasna Partyja rehijonaŭ na vybary nie pojdzie. A jašče ž 9 miesiacaŭ nazad kiravała va ŭsiu…

Parłamienckija vybary va Ukrainie adbuducca 26 kastryčnika. Paśla ich palityčny krajavid u krainie całkam źmienicca. Kamunisty, što ŭvachodzili va ŭradavuju kaalicyju, buduć zmahacca za prachadny za barjer. Raspałasia i asnoŭnaja apazicyjnaja «Baćkaŭščyna» Julii Cimašenki. Mienavita ŭ jaje ŭvachodzili raniej Jacaniuk i Turčynaŭ.

• 0
• 0
• 0
• 0
• 0
• 0
• 0
• 0