Paśla pratestaŭ rabočych zarobki na «Hranicie» padniali da 20 miljonaŭ

«Šanoŭnaja Redakcyja! Kaliści vy pisali pra rabočaha lidara ź Mikaševič, z «Hranita». Jon arhanizavaŭ rabočych na abaronu svaich pravoŭ, i jaho papiorli za heta z zavoda. Ja jašče padumaŭ: voś, naš Valensa. Taja samaja historyja. Što ź im? Što jon robić? Jak skłałasia jahonaje žyćcio?» — spytaŭsia ŭ nas čytač Ivan Łamanoŭski ź Minska.

U adnoj z pajezdak my zajechali da Aleha Stachajeviča — šafiora z «Hranita».

«Nas «abrubali», zvalniali — ludziej stanaviłasia mienš, ale vynik heta dało. Jany vymušanyja byli padniać zarobak, — raskazvaje Stachajevič. — A ŭžo ź listapada 2012 pa 15—17 miljonaŭ atrymlivali, pra što navat abviaścili na BT».

— Kolki ž ciapier zarablaje kiroŭca BiełaAZa?

— I pa 20 miljonaŭ atrymlivali, i bolš, i mienš — płata ździelnaja. Za 200 rejsaŭ (heta nie tak i šmat) možna atrymać 12,5 miljona.

— Kolki čałaviek u vyniku pratestaŭ zvolnili z «Hranita»?

— Uskosna zvolnili dźviuch žančyn, kab tak paŭpłyvać na ich mužoŭ­pratestoŭcaŭ, jašče 6 rabočych niepasredna za ŭdzieł. Uvieś rajonny KDB tut pracavaŭ — raspracoŭvali nas. A jak pakazvaje historyja z našymi zvalnieńniami, sudami (ni adzin pazoŭ nie byŭ zadavoleny), znajšlisia b tysiačy pryčyn admović nam u rehistracyi.

— I nazad nikoha nie ŭziali?

— Nie. Sprabavali ŭładkavacca Mikałaj Karyšaŭ i Leanid Dubanosaŭ. Kola sprabavaŭ praź biržu pracy: na «Hranicie» było šmat vakansij pa jaho śpiecyjalnaści. Ale jamu admovili. Lonia taksama ad centra zaniataści tudy pajechaŭ — uziaŭ nakiravańnie. Ale admovili i jamu. Ja nie chadziŭ. Daroha ŭ Łuninieckim rajonie čałavieku z proźviščam Stachajevič paŭsiul zakryta: ni małodšy brat uładkavacca nie moža, ni jaho žonka. Ale śviet nie zamykajecca ŭ miežach rajona.

Mnie inšaha škada! Usio, čaho my dasiahnuli tady, ciapier stračana. A dasiahnuli pavyšeńnia zarobkaŭ u piać razoŭ i bolš, źjaviłasia kampiensacyja za charčavańnie, źmiena ŭ śviatočnyja dni pačała apłačvacca tak, jak nidzie da hetaha ŭ Biełarusi — u čatyrochrazovym pamiery (na «Biełaruśkalii» ŭ trochrazovym atrymlivali), u 5 i bolš razoŭ pavialičyłasia premija za ekanomiju materyjałaŭ i paliva. Ciapier zastalisia tolki bolš­mienš dobry zarobak, zastałasia nadbaŭka za charčavańnie. Rabočyja dazvolili navat zabrać u siabie paŭhadziny z pracoŭnaj źmieny.

— Aficyjny prafsajuz padčas pratestaŭ niejak prajaviŭ siabie?

— Jany ŭziali bok dezynfarmacyi.

— I jakija vysnovy ty dla siabie zrabiŭ?

— Kab dasiahnuć maksimumu, rabočyja pavinny dziejničać družna, u poŭnym adzinstvie. Tady možna ŭ razy padniać i zarobki, i bonusy.

• 0
• 0
• 0
• 0
• 0
• 0
• 0
• 0