Słuchańni pa spravie padmanutych dolščykaŭ žyłoha kompleksu «Samaćviety» pačalisia ŭ Frunzienskim rajonnym sudzie stalicy. Na łavie padsudnych byłyja top-mieniedžary budaŭničaj kampanii «Antas», ich abvinavačvajuć adrazu pa 5 artykułach: machlarstva ŭ asabliva bujnym pamiery, padrobka dakumientaŭ, złoŭžyvańnie słužbovym paŭnamoctvami i kradziež. 54 tamy kryminalnaj spravy, 29 paciarpiełych, ź jakich adzin žychar Kalininhrada, i zvyš 2,5 miljarda rubloŭ uronu.
Heta historyja pačałasia ŭ 2009-m. Pryvatnaja kampanija «Antas» abvieściła pra budaŭnictva žyllova kompleksu z šmatspadzieŭnaj nazvaj «Samaćviety». Zabudoŭščyk zapeŭnivaŭ — klučy razdaść praz hod, zatym jašče praz hod, i jašče. Kali ŭsie mažlivyja i niejmaviernyja terminy skončylisia, kampanija ŭ čarhovy raz zajaviła pra niedachop srodkaŭ i prapanavała dolščykam raskašelicca. Arhumienty zabudoŭščyka ludzi znajšli niepierakanaŭčymi i źviarnulisia ŭ milicyju. Rasśledavańnie doŭžyłasia nie adzin miesiac. I voś, narešcie, sud.
Byłych menedžaraŭ abvinavačvajuć adrazu pa piaci artykułach. Praŭda, svajoj viny jany nie pryznali. Miž tym śledčym udałosia sabrać dokazy taho, što abvinavačanyja naŭmysna zaciahvali terminy ŭźviadzieńnia žyłoha kompleksu. A hrošy dolščykaŭ išli zusim nie ŭ budaŭnictva, a na rachunki słužbovych asob arhanizacyi. U doŭhim śpisie rastrataŭ — darahija aŭtamabili, katedžy i navat załatyja źlitki.
«Abvinavačanym inkryminujecca ździajśnieńnie złačynstvaŭ, praduhledžanych niekalkimi artykułami kryminalnaha kodeksa Biełarusi. Da prykładu, abvinavačvany Małaševič, aproč inšaha, ažyćciaŭlaŭ budaŭnictva dvuch kvater dla svajoj maci Małaševič, i budaŭnictva hetych kvater išło pa koštach, nižejšych za rynkavyja, i ažyćciaŭlałasia za košt finansavańnia kvater inšych dolščykaŭ. Adpaviedna, heta taksama pryniesła istotnuju škodu», — paviedamiła Alena Krupienina, pamočnik prakurora Frunzienskaha rajona Minska.
Častku škody, a pieršapačatkovaja suma była bolš za 6 miljardaŭ rubloŭ, abvinavačvanyja pakryli, pakul išło śledstva. Darečy, złapomny dom paśla zaviadzieńnia kryminalnaj spravy ŭsio ž udałosia dabudavać. Praŭda, niekatoryja navasielcy adrazu ž paśpiašalisia pazbavicca ad svaich kvater. U razmovie paciarpiełyja prosiać nie nazyvać ich imionaŭ i nie pakazvać tvaraŭ, spasyłajučysia na toje, što im da hetaha času pastupajuć pahrozy.
Tym časam śpiecyjalisty sprabujuć rabić i aptymistyčnyja prahnozy, miarkujučy, što padobnyja budaŭničyja schiemy, a značyć, i kryminalnyja spravy, nadalej stanuć vyklučeńniem z praviłaŭ. Prynamsi, paśla pryniaćcia novaha budaŭničaha kodeksa (dzie realizavany pryncyp «spačatku dom — potym hrošy») dziaržava zakanadaŭča vybiła ziamlu z-pad noh niadobrasumlennych zabudoŭščykaŭ.
Vidavočna, što prostym i chutkimi hety sudovy praces nie budzie. Svajoj viny kiraŭniki budaŭničaj firmy nie pryznajuć i admaŭlajucca ad dačy pakazańniaŭ. Adnak kali ich vina ŭsio ž budzie dakazanaja, kožnamu ź ich pahražaje da 10 hadoŭ pazbaŭleńnia voli.
Ciapier čytajuć
«Jany čamuści dumajuć, što ich zaraz zhvałciać». Prapahanda kinułasia tušyć abureńnie biełarusaŭ 150 tysiačami pakistancaŭ23
Kamientary