Pradstaŭniki šerahu hramadskich ab`iadnańniaŭ i hramadzianskich inicyjatyŭ 28 vieraśnia ŭ Žodzinie pryniali rašeńnie ab padtrymcy vyłučeńnia kandydatam u prezidenty na vybarach 2015 hoda namieśnika staršyni Biełaruskaj sacyjał-demakratyčnaj partyi (Hramada) hienierała Valeryja Frałova.
Pra heta paviedamiŭ BiełaPAN kiraŭnik hramadzianskaj inicyjatyvy «Sajuz aficeraŭ i sałdat» Kirył Žyvałovič.
Z prapanovaj padtrymać namier Frałova ŭziać udzieł u vybarčaj kampanii vystupiŭ hramadski aktyvist, były deputat žodzinskaha harsavieta Alaksandr Vałčanin.
«Nastupnyja vybary na fonie ŭskładnieńnia ekanamičnaha kryzisu ŭ krainie, rostu karupcyi i ŭciokaŭ ź Biełarusi hałoŭnaha kapitału — kvalifikavanych kadraŭ vymušajuć nas nie być abyjakavymi. My nie možam bolš spadziavacca na štatnych zmaharoŭ za śvietłuju budučyniu naroda z apazicyjnaha asiarodździa, abciažaranych pracedurami vybaru adzinaha kandydata. Hety praces moža zaciahnucca nadoŭha, i ŭ vyniku jon pazbavić nas času na aktyŭnuju ahitacyjnuju kampaniju i pryviadzie da čysta farmalnych vynikaŭ, biez realnaha ab`iadnańnia namahańniaŭ», — skazaŭ jon.
Vałčanin padkreśliŭ: «Situacyja vymušaje vyłučyć na ŭdzieł u vybarach hienierała Frałova, hramadzianskaja pazicyja i palityčnyja pohlady jakoha nam dobra viadomyja daŭno».
Padtrymaŭ inicyjatyvu ab vyłučeńni Frałova kandydatam u prezidenty staršynia arhanizacyjnaha kamiteta pa stvareńni ruchu vieteranaŭ bajavych dziejańniaŭ «Abaroncy Ajčyny» Alaksandr Kamaroŭski.
«Viedajučy Valeryja Frałova jak sapraŭdnaha patryjota Biełarusi, čałavieka honaru, hodnaści i palityčnaha prafiesijanalizmu, prapanoŭvaju prykłaści ŭsie namahańni dla vyłučeńnia jaho kandydatam u prezidenty Respubliki Biełaruś», — skazaŭ jon.
Były deputat Pałaty pradstaŭnikoŭ Valeryj Frałoŭ ab rašeńni vyłučyć svaju kandydaturu na vybarach prezidenta ŭ 2015 hodzie zajaviŭ u červieni 2014 hoda.
«Adziny kandydat — heta nie panaceja. Daj boh, kab takoje adbyłosia, ale ja ŭ heta słaba vieru», — skazaŭ jon. Na dumku palityka, lepšaj pieradvybarnaj stratehijaj było b vyłučeńnie niekalkich kandydataŭ, «kampietentnych u roznych śfierach». «A potym napiaredadni vybaraŭ pahladzieć na rejtynhi, źniacca na karyść čałavieka z najvyšejšym rejtynham, zaprasić svaich prychilnikaŭ prahałasavać za jaho i takim čynam vyjści na realnaha adzinaha», — dadaŭ jon.
Frałoŭ užo vyłučaŭsia ŭ prezidenty ŭ 2006 hodzie, ale zmoh sabrać krychu bolš za 58 tysiač podpisaŭ pry nieabchodnych dla rehistracyi 100 tysiačach.
Sam Frałoŭ rastłumačyŭ heta niedachopam finansavańnia. Tady palityk padtrymaŭ kandydata ŭ prezidenty ad svajoj partyi Alaksandra Kazulina.
Kamientary