Biełaruskija banki, jakija nie vykanali da 2015 hoda patrabavańnie da vieličyni ŭłasnaha kapitału, mohuć być pieratvoranyja ŭ niabankaŭskija kredytna-finansavyja arhanizacyi.
Adpaviednuju pravavuju bazu dla stvareńnia niabankaŭskich arhanizacyj farmuje Nacbank.
Zhodna ź biełaruskim zakanadaŭstvam, z 1 studzienia 2015 ułasny (narmatyŭny) kapitał ŭsich kamiercyjnych bankaŭ Biełarusi pavinien składać nie mienš za 25 młn. jeŭra ŭ ekvivalencie.
Adnak pavodle apošnich spravazdačnych źviestak (na 1 lipienia), 11 kamiercyjnych bankaŭ Biełarusi nie adpaviadali hetamu patrabavańniu.
Kamiercyjnyja banki, jakija da kanca hoda nie zmohuć pavialičyć narmatyŭny kapitał da patrabavanaha narmatyvu, mohuć stracić status banka i być pieratvoranyja ŭ niabankaŭskija kredytna-finansavyja arhanizacyi (NKFA).
Pavodle infarmacyi bankiraŭ, u bližejšy čas pavinna źjavicca aficyjnaje rašeńnie ab vieličyni statutnych fondaŭ NKFA.
Miarkujecca, što statutnyja patrabavańni da NKFA buduć istotna nižejšyja, čym dla kamiercyjnych bankaŭ.
Razam z tym mahčymaści dla kamiercyjnaj dziejnaści ŭ niabankaŭskich arhanizacyj taksama buduć abmiežavanyja.
«Pierachod banka ŭ razrad niabankaŭskaj arhanizacyj maje na ŭvazie vyklučeńnie mahčymaści absłuhoŭvać rachunki klijentaŭ.
Dla klijentaŭ takija źmieny faktyčna aznačajuć, što bank začyniajecca, tak jak apošni, budučy pieranazvanym u niabankaŭskuju arhanizacyju, nie zmoža ažyćciaŭlać šerah finansavych apieracyj»,
— rastłumačyŭ BiełaPAN situacyju top-mieniedžar adnaho z kamiercyjnych bankaŭ.
Šerah bankaŭ pravodziać padrychtoŭčuju pracu dla taho, kab vykanać da pačatku 2015 patrabavańnie da vieličyni ŭłasnaha kapitału.
Kamientary