Łukašenka: Padatkovy manieŭr Rasii pryviadzie da značnych finansavych strat dla Biełarusi

Padatkovy manieŭr Rasii pryviadzie da značnych finansavych strat dla Biełarusi, zajaviŭ Alaksandr Łukašenka 29 vieraśnia na sustrečy z členami Savieta Pałaty pradstaŭnikoŭ Nacyjanalnaha schodu.

«My adpravili hrupu śpiecyjalistaŭ na čale z Uładzimiram Siamaškam (pieršy vice-premjer urada Biełarusi), jaki viadzie pieramovy na hetu temu. Kali taki krok budzie zrobleny z boku Rasijskaj Fiederacyi, heta stanie vielmi vialikaj prablemaj u funkcyjanavańni ciapierašniaha Sajuza. Pa-pieršaje, tamu, što my damaŭlalisia ab inšym. Pa-druhoje, kali pravodziacca niejkija dziejańni ŭ adnym kirunku, značyć, treba, kab u inšym była kampiensacyja. Heta niemałyja hrošy, jakija ni ŭ jakim razie nielha hublać», — pryvodzić słovy Łukašenki pres-słužba prezidenta. 

«Kali nas pačyjuć paprakać, tady davajcie tak: my zadumali Mytny sajuz, zatym Jeŭrazijski sajuz — davajcie jaho pabudujem na kłasičnych pryncypach. Dzieści my hublajem, dzieści Rasija, Kazachstan. Ale takaja arhanizacyja naohuł kłasična nie cierpić nijakich vyklučeńniaŭ i abmiežavańniaŭ, — zaznačyŭ Łukašenka. — Zrazumieła — kamuści niavyhadna. Mnohaje kamuści niavyhadna. Ale my damaŭlalisia, i hetyja damoŭlenaści treba vykonvać. Heta naša pazicyja».

Jak paviedamlałasia raniej, u Dziaržumu Rasii pastupiŭ zakonaprajekt ab uniasieńni źmianieńniaŭ u Padatkovy kodeks, jaki praduhledžvaje praviadzieńnie hetak zvanaha padatkovaha manieŭru ŭ naftavaj halinie (rezkaje źnižeńnie ekspartnych pošlin na naftu i naftapradukty i adnačasova z hetym značnaje pavyšeńnie padatku na zdabyču karysnych vykapniaŭ). 

Biełaruskija NPZ miarkujuć, što padatkovy manieŭr moža pryvieści da istotnaha rostu ŭvachodnaj cany dla Biełarusi na rasijskuju naftu. Jak zaznačałasia ŭ vieraśni padčas pasiadžeńnia administracyi i prafkama AAT «Naftan», ciapier biełaruski ŭrad viadzie pieramovy z Rasijaj dla źmiakčeńnia nastupstvaŭ zhadanaha manieŭru dla Biełarusi. 

Rasijskija ekśpierty źviartajuć uvahu na toje, što rost cen na naftu, źviazany z padatkovym manieŭram, moža pryvieści da padaražeńnia naftapraduktaŭ dla spažyŭcoŭ. Razam z tym urad Rasii na minułym tydni paviedamiŭ, što dla niedapuščeńnia rezkaha rostu cen na paliva rasijski biudžet na 2015 hod praduhledžvaje značnaje źnižeńnie akcyzaŭ na naftapradukty. 

Razam z tym urad Biełarusi pry płanavańni biudžetu na 2015 hod, naadvarot, zakładvaŭ pavieličeńnie akcyzaŭ na naftapradukty.

• 0
• 0
• 0
• 0
• 0