U Łuninieckim rajonie znajšli piensijaniera, jaki 21 vieraśnia na rovary pajechaŭ u les u hryby i zabłukaŭ.
Jak paviedamili ŭ Łuninieckim RAUS, 75-hadovaha žychara vioski Brodnica šukali z 24 vieraśnia. U hety dzień u milicyju źviarnułasia jaho hramadzianskaja žonka. Viaskoŭka raskazała, što jaje sužyciel, jaki pajechaŭ try dni tamu u hryby, źnik. Pavodle słoŭ žančyny, raniej jon sychodziŭ u les na troje sutak i viartaŭsia dadomu.
U pošukach mužčyny byli zadziejničanyja supracoŭniki milicyi, MNS, leśniki i miascovaje nasielnictva. Adpracoŭvalisia prylehłyja lasnyja masivy i sielskija nasielenyja punkty.
U 7 hadzin ranicy 29 vieraśnia zabłukałaha ŭbačyŭ u lesie niedaloka ad vioski Dziatłavičy miascovy žychar. Jon pryvioŭ piensijaniera, u jakoha byŭ pakiet z hrybami, da siabie dadomu i pazvaniŭ znajomamu rabotniku milicyi. Toj paviedamiŭ pra znojdzienaha hrybnika ŭ rajonny adździeł unutranych spraŭ.
Supracoŭnikam Łuninieckaha RAUS mužčyna raskazaŭ, što zabłukaŭ 21 vieraśnia. Načavaŭ u lesie i niežyłych damach na chutarach. Jeŭ ščaŭje, jahady i jabłyki. Svoj rovar jon zhubiŭ.
Stan zdaroŭja piensijaniera nie vyklikaŭ aściaroh, i jaho dastavili dadomu. Lasny masiŭ, dzie znajšli viaskoŭca, znachodzicca za 12 km ad vioski, u jakoj jon žyvie.
Jak zaznačyli ŭ Łuninieckim RAUS, sioleta ŭ rajonie heta pieršy vypadak, kali čałaviek zabłukaŭ u lesie padčas zboru hryboŭ.
Kamientary