Pamočnica Alaksandra Łukašenki Natalla Piatkievič była adpraŭlenaja ŭ adstaŭku ŭ kastryčniku 2014 hoda.
«Naša Niva» ŭzhadała piać cikavych historyj z žyćcia adnoj z samych upłyvovych žančyn Biełarusi.
Ź niaprostaj siamji
Tata Natalli Piatkievič u 2010-m byŭ pryznany «minčukom hoda». Zasłužany doktar Uładzimir Akimavič Kraŭčanka ŭznačalvaje 7-ju stamatałahičnuju palikliniku ŭžo amal 40 hadoŭ!
Sam jon naradziŭsia ŭ Navasibirskaj vobłaści ŭ siamji nastaŭnikaŭ. Paśla Druhoj suśvietnaj baćka Kraŭčanki asieŭ u Biełarusi. A sam Uładzimir pačaŭ miedycynskuju karjeru. Jon staŭ samym maładym hałoŭnym doktaram u Minsku. Maleńkaj Natalli tady było try hady. Jaje mama, darečy, była nastaŭnicaj.
Kraŭčanka čatyry sklikańni byŭ deputatam Minharsavieta, zaadno ŭznačalvaŭ Biełaruski ruch miedycynskich rabotnikaŭ, jaki aktyŭna asvojvaŭ hranty AAN na dapamohu ŭciekačam.
Dva šluby i adno dzicia
Pieršym mužam Natalli Kraŭčanki staŭ Uładzisłaŭ Piatkievič. Heta adzin z hałoŭnych łatarejščykaŭ Biełarusi. Piatkievič uznačalvaje «Supierłato» (RUP «Nacyjanalnyja spartyŭnyja łatarei»). Z Natallaj jon raźviedzieny.
U šlubie naradziŭsia syn Filip. Chłopiec advučyŭsia ŭ Licei BDU – navučalnaj ŭstanovie, jakaja źbiraje samych adoranych dziaciej z usioj krainy. Siarod liceistaŭ dziasiatki pieramožcaŭ mižnarodnych alimpijad i konkursaŭ. Ciapier Filip pastupiŭ na jurydyčny fakultet BDU.
Filip Piatkievič.
Raniej staronka chłopca «Ukantakcie» mała adroźnivałasia ad staronak inšych padletkaŭ jaho ŭzrostu – maciernyja statusy, paŭaholenyja zdymki z «fakam» u kamieru… A voś ciapier akaunt vyhladaje bolš prezientabielna.
Padletak štohod adpačyvaje za miažoj. Naprykład, byŭ u Jehipcie, Izraili, jeździŭ u ekskursijny tur Bierlin-Amsterdam-Paryž. A voś jahonaja maci, nahadajem, u krainy Jeŭrasajuza patrapić nie moža praz sankcyi.
Filip razam z baćkam.
Druhim mužam Piatkievič staŭ televiadučy BT Alaksandr Martynienka. Kaliści jon vioŭ prahramu «Otvietnyj chod». U śniežni 2011 hoda jon byŭ zvolnieny pasady namieśnika staršyni Biełteleradyjokampanii, a praź niekalki hadoŭ uspłyŭ u «Biełahraprombanku. Tut jon uznačalvaje ŭpraŭleńnie infarmacyi.
Alaksandr Martynienka.
Čutki «razvodzili» Martynienku i Piatkievič, adnak paćvierdžańnia ich rasstavańnia tak i nie było.
Siadziba ŭ Drazdach i Mercedes Gelandewagen
Piatkievič trapiła ŭ pieršy «pryzyŭ» łukašenkaŭskich čynoŭnikaŭ, jakim u siaredzinie 2000-ch razdavali ziamielnyja nadzieły ŭ Drazdach. Cikava, što ź niekalkich dziasiatkaŭ haspadaroŭ minskaje miesca naradžeńnia mieli tolki jana i Ryhor Vasilevič.
Piatkievič atrymała dvuchpaviarchovy cahlany dom na vulicy Pakroŭskaj. Ahulnaja płošča składaje kala 350 m2. Jaje nadzieł miažuje z Aleham Pralaskoŭskim, byłym ministram infarmacyi, jaki niadaŭna taksama trapiŭ u niałasku. A praz darohu žyvie śviatar Fiodar Poŭny.
Vialikamu domu pasujuć vialikija mašyny. «Ja lublu vialikija mašyny, jak, skažam, vialikija piśmovyja stały — heta zručna. Padabajecca, kali na mašynie možna spakojna jechać, nie dumajučy pra hurby i bardziury, nieprachodnyja darohi. Z punktu hledžańnia utylitarnaha, mnie kamfortny mienavita džyp. U maim žyćci niašmat materyjalnych rečaŭ, jakija pryvodziać u emacyjny ŭzdym, adna ź ich — Mercedes Gelandewagen. Kali baču hetuju mašynu, mianie pranimajuć dryžyki. Heta nie mara, heta — emocyja», — raskazvała Piatkievič u intervju tut.by.
Karjera ŭ Administracyi
Ale heta ŭsio siamiejnyja i asabistyja spravy. A Piatkievič pieradusim prasłaviłasia svajoj karjeraj.
Paśla zakančeńnia jurydyčnaha fakulteta BDU ŭ 1994-m jana z nalotu ŭładkavałasia ŭ Administracyju maładoha jašče prezidenta. Spačatku była śpiecyjalistam, paśla darasła da načalnika ŭpraŭleńnia dziaržaŭnaha i mižnarodnaha prava. A ŭ 2001-m Piatkievič stała pres-sakratarkaj Łukašenki.
Takaja roznaja Piatkievič.
Praz try hady pracy kala kiraŭnika dziaržavy jaje pieraviali ŭ kiraŭnictva Administracyi prezidenta, spačatku namieśnicaj, a paśla pieršaj namieśnicaj. Z 2011 pracavała pamočnicaj Alaksandra Łukašenki — pasada vyklučna blizkaja.
Ź Piatkievič źviazany šerah skandałaŭ. Jana publična svaryłasia z tahačasnym kiraŭnikom Biełteleradyjokampanii Alaksandram Zimoŭskim. Narešcie, heta joj prypisvali ideju razyhryvańnia antypolskaj karty pierad vybarami 2006 hoda.
Urešcie, joj prypisvali žanočyja čary i luboŭ da intryhi, a taksama supiernictva z Uładzimiram Makiejem, tahačasnym kiraŭnikom Administracyi.
Razmaŭlała z Vavanam?
Samy apošni skandał, jaki, mahčyma, i pavaliŭ čynoŭnicu — historyja prankiera Vavana. Heta praź jaje, mahčyma, źviazvaŭsia z Łukašenkam internet-žartaŭnik — pad vyhladam syna Janukoviča. Hołas pamočnicy, ź jakoj razmaŭlaŭ Vavan, byŭ nadzvyčaj padobny da hołasa Piatkievič. Pryčym kali z historyi ŭžo śmiajałasia ŭsia Biełaruś, toj samy hołas znoŭ razmaŭlaŭ z Vavanam, navat nie zdahadvajučysia pra rezanans u internecie.
Piatkievič sychodzić z najradčejšaj dla prezidentury farmuloŭkaj «pa pahadnieńni bakoŭ». Heta nie pakidaje joj šancaŭ na viartańnie ŭ Administracyju. Ale i pasadka z takoj farmuloŭkaj nie pahražaje. Natalla Piatkievič, takim čynam, moža znajści siabie ŭ biznesie. Joj zastajecca dom u Drazdach i šmatlikija ŭspaminy.
Natalla Piatkievič biez hrymu.
