U Biełarusi źjaŭlajecca vialikaja kolkaść pradukcyi, jakaja ciešyć usich nas svaim nacyjanalnym kałarytam, pačynajučy ad kubkaŭ, skančajučy adzieńniem. Nie tak daŭno, pabačyli śviet aŭtarskija sakołki Vadzima Prakopčyka. My sustrelisia ź im i pahutaryli pra novy brend «Sakołka».
Naša Niva: Adkul uźnikła «Sakołka»?
Vadzim Prakopčyk: «Sakołka» ŭźnikła ad vialikaha žadańnia rabić aŭtarskija sakołki, svaje sakołki! Nie pachabnyja, nie pošłyja, biez nadpisaŭ «tvaja sałodkaja małyška». Chaciełasia zrabić sakołki, jakija niasoramna budzie apranuć i nacyjanalistu i absalutna indyfierentnamu abyvacielu. Hetaje žadańnie vyśpiavała zdaŭna, ale detanataram źjavilisia dźvie padziei. Pieršaja – lekcyja Michaiła Bajaryna ŭ Latučym Univiersitecie i jahonyja simvały, jakija prosta sami prasilisia na sakołki, a druhaja padzieja - «vialiki vyšyvanačny bum», jak ja jaho nazyvaju, na jaki tre było terminova dać svoj adkaz. Naprykancy lipienia ja zrazumieŭ, što ciahnik moža syści i treba ŭ jaho zaskočyć, navat kali valiza dla padarožža nie zusim sabranaja. Michaił daŭ zhodu, i kalekcyjaj «Kryvickija runy» my startavali.
NN: Jak naradziłasia sama nazva?
VP: Jana atrymałasia metadam vyklučeńniaŭ. «Futbołka» – zusim vuzkaja nazva čamuści tolki pra futboł, «cišotka» – zanadta zamiežnaja nazva (ad anhielskaj t-shirt), «majka» – padobnaja na majtki (pa-rasiejsku «trusy»). Zastałasia «sakołka». I, o cud Božy – svabodnaje damiennaje imia sakolka.by!
NN: Jaki asnoŭny kancept u brenda?
VP: Naš asnoŭny kancept – adzieńnie dla biełarusaŭ XXI stahodździa. Čałavieku, jaki žyvie tut i ciapier, karystajecca sučasnymi aŭto, kampjutarami i smartfonami, žyvie ŭ sučasnym rytmie i ŭ sučasnym asiarodku, patrebnaje novaje adzieńnie. Sučasnaje, prostaje, svajo.
NN: Što za simvały na sakołkach?
VP: Ciapier my ŭžo majem try kalekcyi ź simvałami «Kryvickija runy», «Patryk» i «Piktahramy». Kali razmova pra «Kryvickija runy», dyk heta simvały raspracavaŭ Michaił Bajaryn. Uziaŭšy luby ručnik ci biełaruski narodny stroj i ŭvažliva razhledzieŭšy, vy ŭbačycie takija simvały.
NN: Ci płanujecie vy vypuskać niešta jašče akramia sakołak?
VP: Užo ciapier jość razumieńnie, što prosta ŭziać sakołku i nadrukavać na joj znak – niedastatkova. Biezumoŭna, takija «prosta sakołki» zastanucca, i mahčyma buduć navat składać balšyniu asartymientu, ale buduć i pryncypova inšyja rečy «na bazie sakołak», skažam tak. Pakul nie budu raskryvać karty, pryjdzie čas, pabačycie. Taksama rychtujem śvitšoty, bo jak pačało chaładać, adrazu rynak zapatrabavaŭ niešta bolš ciopłaje. Idejaŭ proćma, ale ja ŭpeŭnieny, što navat samaja pieršaja kalekcyja z runami jašče daloka nia vyčarpanaja. Tut treba zachavać peŭny rytm i nie śpiašacca. Z adnymi tolki runami my majem užo ciapier čatyry novyja raspracavanyja kroki, jakija zrobim ciaham bližejšych miesiacaŭ. Ale akramia runaŭ šmat temaŭ, jakija čakajuć svajoj realizacyi pa pryncypie: jość zadača – jość admysłoviec, jaki zdolny jakasna jaje vykanać.
NN: Kolki čałaviek pracuje nad brendam?
VP: U nas niama niejkaha «štatu supracoŭnikaŭ». Jość zadačy, jakija mahu vykanać ja, a jość tyja, što lepiej vykanaje admysłoviec u svajoj śfiery. I tady ja źviartajusia da jaho. Kampietentnyja admysłoŭcy i pracujuć nad brendam. Siońnia ja chaču padziakavać i adznačyć Dzinu Daniłovič, jakaja stvaryła cudoŭny łukbuk, kansultuje pa ŭsich pytańniach mody, i natchniaje nas na novyja padychody ŭ tvorčaści; Alaksandru Bajarynu, jakaja dapamahaje i šturchaje nas napierad, jak mator, Jaŭhiena Horana, jaki cudoŭna i tonka nakiroŭvaje i jaki upryhožyŭ svaim vobrazam našy fota, Karynu Momat, jaskravuju i talenavituju madel, što pracavała ŭ Miłanie i Paryžy i pahadziłasia paŭdzielničać u našym prajekcie, Emu-Maryju Čarnych za vialikuju dapamohu ŭ zdymkach, Valeru Krasnahira za pijar. I biezumoŭna, aŭtara runaŭ – fiłosafa Michaiła Bajaryna, ź jakoha ŭsio i pačałosia. Biaz hetych ludziej nijakaj «Sakołki» paprostu nie było b.
NN: U vas vielmi cikavaja padača łukbukaŭ, biełaruski simvał padajecca ŭ takim sučasna-brutalnym farmacie(što biezumoŭna jamu na karyść).
VP: Dziakuj, ale darujcie, ja nie baču tut ničoha brutalnaha. Niaŭžo piaščotnyja ruki, adkryty, jaskravy, pryhožy biełaruski tvar, zahadkavy pohlad Karyny Momat paviedamlaje ab niejkaj brutalnaści?
Łukbuk, pa zadumie aŭtara musiŭ davieści dźvie dumki. Pieršaja – pakazać jak i z čym možna nasić sakołki, kab vaš łuk byŭ łukam XXI stahodździa. Druhaja – krychu praściabać hety absalutna nienarmalny pohlad na siabie vačyma susiedziaŭ. Hetyja biaskoncyja bulby, bulbašy, heta ahidna.
Z taje pryčyny i źjavilisia kapusta, kukuruza, jabłyki. Dzina ŭ łob nie havoryć hledaču pra bulbu, pakidajučy prastoru dla razvažańniaŭ.
NN: Dla jakich ludziej hetaje adzieńnie?
VP: Hetaja pytańnie ja staviŭ pierad saboj na samym pačatku. Azirniciesia navokał — usie nosiać sakołki. Ad maładych da starych, ad haładrancaŭ da «załatoj moładzi» — amal usie. Heta biaźmiežny rynak. Jak na charčavańnie, budaŭnictva ci pachavańnie, tut zaŭsiody budzie popyt. Nosiać prosta sakołki, sakołki pad pinžaki, pad śvitšoty, pad kurtki, płaščy, švedry — usie zaležyć ad taho, kudy vy ich apranajecie i što vy chočacie paviedamić. Darečy, mnie padajecca, u łukbuku vielmi ŭdała pakazana, što sakołki možna spałučać nia tolki z džynsami, što sakołki mohuć być na šmat pamieraŭ bolej, padbiarycie aksiesuary, abutak, bižuteryju i zvyčajnaja sakołka adrazu pieratvarajecca ŭ niešta inšaje.
NN: Jakija košty na sakołki?
VP: Ciapier my trymajem košty na minimumie dla pradukcyi takoha ŭzroŭniu — 200.000 amal na ŭsie sakołki. A naprykancy hoda dla tych, chto zamoviŭ šmat sakołak, my rychtujem siurpryzy – heta abaviazkova.
NN: Ci jość užo popyt na pradukcyju?
VP: Sakołki razychodziacca, jak haračyja piražki i heta naša hałoŭnaja ŭznaharoda.
