Biełaruś hatova vykonvać damovu ab JEAES tolki pry źniaćci «barjeraŭ, abmiežavańniaŭ i vyklučeńniaŭ»

Biełaruś abumović vykanańnie damovy ab Jeŭrazijskim ekanamičnym sajuzie (JEAES) zdymańniem barjeraŭ, abmiežavańniaŭ i vyklučeńniaŭ «ŭ dačynieńni da enierhanośbitaŭ, pradukcyi zboračnych vytvorčaściej, libieralizacyi aŭtamabilnych pieravozak i inšych adčuvalnych pazicyj».

Pra heta havorycca ŭ zakonaprajekcie ab ratyfikacyi Damovy ab JEAES, jaki pastupiŭ u pałatu pradstaŭnikoŭ. Jaho tekstam vałodaje TUT.BY.

Artykuł 1 zakonaprajekta ab ratyfikacyi Damovy ab JEAES vyhladaje tak: «Ratyfikavać damovu ab Jeŭrazijskim ekanamičnym sajuzie, padpisanuju ŭ h. Astanie 29 maja 2014 hoda (dalej — Damova), z nastupnaj zajavaj:

«Respublika Biełaruś zajaŭlaje, što sumlenna budzie vykonvać svaje abaviazacielstvy ŭ ramkach Damovy i raspačnie inšyja miery pa jaje realizacyi pry ŭmovie, što da hetaha momantu na trochbakovaj abo dvuchbakovaj asnovie buduć dasiahnutyja kankretnyja damoŭlenaści ab źniaćci barjeraŭ, abmiežavańniaŭ i vyklučeńniaŭ u handli asobnymi vidami tavaraŭ i akazańni asobnych vidaŭ pasłuh, u pieršuju čarhu ŭ dačynieńni da enierhanośbitaŭ, pradukcyi zboračnych vytvorčaściej, libieralizacyi aŭtamabilnych pieravozak i inšych adčuvalnych pazicyj.

Pry hetym hetyja damoŭlenaści pavinny ŭtrymlivać pałažeńni ab niedapuščalnaści ich paharšeńnia ŭ nastupny pieryjad da poŭnaj likvidacyi vyklučeńniaŭ i abmiežavańniaŭ u Jeŭrazijskim ekanamičnym sajuzie».

Adznačym, što parłamienty Kazachstana i Rasii ŭžo ratyfikavali Damovu ab JEAES biez takich ahavorak.

Prajekt damovy ab JEAES byŭ padpisany prezidentami mytnaj «trojki» 29 maja ŭ Astanie.

Raniej biełaruski bok nastojvaŭ na vyklučeńni z 2015 hoda vyniatkaŭ, jakija tyčacca handlu naftapraduktami.

U hetym vypadku z budučaha hoda Biełaruś vyzvaliłasia b ad vypłaty ŭ rasijski biudžet vyvaznych pošlin na ekspartavanyja naftapradukty (kala 3,5 młrd dalaraŭ u hod). Adnak u krasaviku było zajaŭlena, što ŭ 2015 hodzie takija kanfiskacyi zachavajucca, a adziny rynak nafty, naftapraduktaŭ i hazu ŭ ramkach JEAES budzie stvorany z 2025 hoda.

Łukašenka ŭ svaich intervju i kamientarach taksama nieadnarazova vykazvaŭ svaju niezadavolenaść hetymi abmiežavańniami i vyniatkami.

Pry padpisańni damovy Rasija pahadziłasia dać Biełarusi prava pakinuć va ŭłasnym biudžecie ŭ 2015 hodzie ekspartnyja pošliny na naftapradukty na sumu $ 1,5 młrd.

Paźniej u ŚMI źjavilisia paviedamleńni ab padrychtoŭcy ŭ Rasii padatkovaha manieŭru, jaki ŭ vypadku realizacyi źnizić patencyjnyja prybytki Biełarusi ad zaličeńnia ŭ svoj biudžet naftavych pošlin, a taksama pavysić košt na naftu dla biełaruskich NPZ.

«Heta nienarmalna: nie paśpieli ŭvieści ŭ dziejańnie damoŭlenaści, tut ich admianiajem faktyčna druhoj rukoj, i ŭ vyniku Biełaruś moža stracić vielizarnuju sumu srodkaŭ, bolš za $1 młrd», — zajaviŭ Alaksandr Łukašenka 2 kastryčnika, prymajučy z dakładam premjer-ministra Michaiła Miaśnikoviča.

Raniej Łukašenka paprasiŭ deputataŭ «stajać na varcie intaresaŭ Biełarusi» pry farmiravańni damoŭna-pravavoj bazy Jeŭrazijskaha ekanamičnaha sajuza.

6 kastryčnika staršynia kamisii pa mižnarodnych spravach Pałaty pradstaŭnikoŭ Mikałaj Samasiejka zajaviŭ, što Biełaruś uviazvaje ratyfikacyju damovy z urehulavańniem pytańnia, što datyčycca padatkovaha manieŭru Rasiei ŭ naftavaj śfiery.

• 0
• 0
• 0
• 0
• 0
• 0
• 0
• 0