Adnoj z temaŭ siońniašniaj prahramy «Kłub redaktaraŭ» na kanale «Biełaruś-1» stali pavodziny biełaruskich zaŭziataraŭ padčas futbolnaha matča Biełaruś-Ukraina.
«Zdaryŭsia kašmar. Nie ŭ projhryšy 0:2, a ŭ balelščykach», — zajaviŭ viadučy, staršynia Biełteleradyjokampanii Hienadź Davydźka.
«Hetyja raściažki i hetyja kryki byli nie na ŭsim stadyjonie, — udakładniŭ redaktar «Sielskaj haziety» Siarhiej Michovič. — Heta byli kryki z vusnaŭ asobnych biazvusych juncoŭ z fan-zony, jakija ni historyi, ni iściny nie viedajuć. I jany zusim ničoha nie viedajuć, ich niechta padbuchtorvaje».
«Treba surjoźniej da hetaha stavicca. — pierakonvaŭ Hienadź Davydźka. — U svoj čas kali «Chajl Hitler» — adkazvali «Zih chajl». U pryncypie «Słava hierojam!» — heta prykładna takaja fraza, takoj samaj jakaści. Suprać čaho pratestavali biełaruskija balelščyki, kali padtrymlivali vidavočna nacyscki vykryk z boku ŭkrainskich fanacikaŭ? Salidarnaść z čym jany vykazvali? Z tym, što tam idzie hramadzianskaja vajna?»
«Kali my chočam, kab našaje maładoje pakaleńnie, mieła svaje łozunhi, my pavinny pieršyja vykrykvać ich, — paraiŭ hałoŭny redaktar «Arhumientaŭ i faktaŭ» Ihar Sakałoŭ. — Kali b tam byli ludzi, jakija vykrykvali inšyja — nie viedaju, pra piva, pra hastranom, navat takija niesurjoznyja rečy, — tady hetyja łozunhi hučali b pieršymi».
«I ja kažu: «Słava Ukrainie». Ale my viedajem — vielmi mnoha epizodaŭ, — kali čałaviek na hety vykryk dzieści va Ukrainie nie adkazvaŭ «Hierojam słava», jaho i zabić mohuć», — padsumavaŭ Hienadź Davydźka.
