Papa Rymski Francysk błasłaviŭ źjaŭleńnie ŭ Minsku Teałahičnaj akademii imia śviatoha Jana Paŭła II. Pra heta havorycca ŭ intervju mitrapalita Minska-Mahiloŭskaha arcybiskupa Tadevuša Kandrusieviča na aficyjnym sajcie Ryma-katalickaj carkvy ŭ Biełarusi.
Mitrapalit Kandrusievič u intervju raspaviadaje ab svajoj razmovie z pantyfikam, jakaja adbyłasia ŭ Vatykanie ŭ kułuarach III nadzvyčajnaj siesii Sinodu biskupaŭ. Jon paviedamiŭ Papie Francišku ab rašeńni zasnavać u Minsku teałahičnuju akademiju, jakaja pryznačana jak dla padrychtoŭki śviataroŭ, tak i dla śvieckich ludziej. «Papa vielmi zacikaviŭsia hetym prajektam i skazaŭ, što błasłaŭlaje hetu spravu», — adznačajecca ŭ intervju.
Tadevuš Kandrusievič ličyć, što ŭ cełym ŭdzieł u siesii Sinodu daje mahčymaść kantaktavać z kiraŭnikami roznych vatykanskich viedamstvaŭ.
Jak paviedamlałasia, na pazačarhovym pasiadžeńni Kanfierencyi katalickich biskupaŭ Biełarusi byŭ pryniaty tekst statuta vyšejšaj duchoŭnaj navukovaj ustanovy «Teałahičnaja akademija imia śviatoha Jana Paŭła II». Hałoŭnaj metaj akademii źjaŭlajecca padrychtoŭka śpiecyjalistaŭ z vyšejšaj adukacyjaj roznych stupieniaŭ i navukovych rabotnikaŭ vyšejšaj kvalifikacyi, u tym liku śviataroŭ, dla relihijnaj dziejnaści Rymska-katalickaj carkvy ŭ Biełarusi. Havorka idzie pra navučańnie ŭ śfiery teałohii, a taksama kananičnaha prava, historyi, fiłasofii, relihijaznaŭstva, ŚMI, zamiežnych moŭ i inšych dyscyplin u adpaviednaści z normami RKC.
Kanfierencyjaj katalickich biskupaŭ Biełarusi pryniata rašeńnie źviarnucca da adpaviednych dziaržaŭnych orhanaŭ dla dziaržrehistracyi novaj vyšejšaj duchoŭnaj navučalnaj ustanovy.
Ciapier čytajuć
Chto taki Maćviej Bialaj, jakoha nibyta departavali ŭ Biełaruś? Raskazvajem historyju dziŭnaha aktyvista z padazronym minułym2
Kamientary