Kvadratny mietr u minskich navabudach — ad $1200 da $3900.
Budaŭničy bum u Biełarusi patrochu źmianiajecca zaciššam. Halina tak i nie ačuniała paśla ekanamičnaha kryzisu. Dastupnych kredytaŭ na nieruchomaść mała (najtańniejšyja kamiercyjnyja — pad 30% hadavych), a źmieny ŭ dziaržaŭnaj palitycy vyciskajuć pryvatnych zabudoŭščykaŭ z hulni.
Novyja ŭčastki pad budaŭnictva atrymlivajuć niamnohija kampanii. Zatoje ščyruje dziaržaŭny MAPID, uščylniajučy stalicu svaimi «panelkami». Biznes atrymlivajecca prybytkovy, i kampanija ŭvachodzić u piaciorku samych paśpiachovych AAT krainy.
U damach MAPIDa budujucca tyja, chto dačakaŭsia svajoj čarhi na palapšeńnie žyllovych umovaŭ.
Ale pry hetym sioleta atrymlivajuć kvatery minčuki, jakija stajać u čarzie z 1989 hoda! Jany płaciać pa $700—800 za kvadratny mietr.
Astatnija, nie hatovyja čakać čverć stahodździa, vymušanyja budavacca pa bolšych cenach. Jakija prapanovy jość na staličnym rynku?
Siarod samych tannych varyjantaŭ — kamiercyjnyja prapanovy ŭsio taho ž MAPIDa. Kvadratny mietr kaštuje ad $1200, i maleńkija kvatery źnikajuć z prodažu za niekalki dzion paśla apublikavańnia prajektnaj dekłaracyi. U pryvatnikaŭ cana pačynajecca ad $1300—1400. Takija damy taksama raspradajucca chutka, čaho nie skažaš pra darahija prapanovy, jakija čakajuć svajho kupca hod za hodam.
«Naša Niva» prapanuje piać samych darahich novabudoŭlaŭ Minska.
1. «Pory hoda» (Kisialova, 17)
Zabudoŭščyk — «Vytvorča-inviestycyjnaja hrupa»
Kvadratny mietr — $3000
Dom na vulicy Kisialova budujuć užo kala 10 hadoŭ! Biznesmien Siarhiej Dziamčuk uzvodziŭ u Minsku niekalki elitnych žyłych kompleksaŭ, ale hrošy dolščykaŭ prapali. U vyniku Dziemčuka niadaŭna prysudzili da vaśmi hadoŭ kałonii ŭzmocnienaha režymu z kanfiskacyjaj majomaści.
Zabudoŭščyk zapeŭnivaje, što sioleta dom narešcie budzie zdadzieny ŭ ekspłuatacyju. U im kala 50 kvater i pientchaŭsaŭ, ź ich zastalisia niepradadzienymi kala traciny. Pakolki mietražy kvater hihanckija (ad 164 m2), samaja tannaja kaštuje kala $500 tysiač. I heta za pustyja ścieny!
Što možna atrymać za takija hrošy? U «Porach hoda» svaja hazavaja kacielnia, a taksama śvidravina hłybinioj 480 m dla zaboru vady. Na abharodžanaj terytoryi, aproč doma, pabudujuć spartyŭnuju zału, basiejn i tenisny kort.
Čamu dom nazvali «Pory hoda»? Kožny z čatyroch padjezdaŭ afarmlajuć u adpaviednaści z adnym ź siezonaŭ.
2. «La Trajeckaha» (Staražoŭskaja, 6)
Zabudoŭščyk — «Trajpł».
Kvadratny mietr — $3000
25-paviarchovy dom byŭ zdadzieny ŭ ekspłuatacyju jašče ŭ 2012 hodzie, ale niekatoryja kvatery dahetul nie pradadzienyja. «Trajpł» šukaje jašče kala 20 novych haspadaroŭ.
U kvaterach ustalavanaja sistema «Razumny dom», jakaja kiruje elektryčnaściu, vodazabieśpiačeńniem i bieźličču inšych datčykaŭ.
Pra hety dom i jahonych žycharoŭ pisałasia nieadnarazova. Pa mierkavańni architektaraŭ, «La Trajeckaha» katastrafična psuje vyhlad histaryčnaj častki Minska. Zatoje zabudoŭščyku, kampanii miljaniera Juryja Čyža, dom prynios dobry prybytak. Pa viečarach dom vyhladaje čornaj ścianoj — u im usio jašče nie žyvie amal nichto z ŭłaśnikaŭ elitnaj nieruchomaści.
3. «Akvamaryn» (Filimonava/Parnikovaja)
Zabudoŭščyk — «Tapas»
Kvadratny mietr — $2350—3900
Kampanija «Tapas» pakrysie stanovicca najbujniejšym pryvatnym zabudoŭščykam Minska. Pośpiech źviazvajuć z asobaj Paŭła Biełaha — napadajučaha prezidenckaj chakiejnaj kamandy i namieśnika dyrektara «Tapasa».
«Akvamaryn» — adzin z žyłych kompleksaŭ, jakija budujucca niepadaloku ad Nacyjanalnaj biblijateki. Jaho źbirajucca zdać u trecim kvartale 2015 hoda.
U skład kompleksu ŭvachodziać dva damy vyšynioj 6 i 9 pavierchaŭ. Jany… duhapadobnyja. Aryhinalnaja zaduma architektaraŭ moža stać hałaŭnym bolem dla stvaralnikaŭ interjeraŭ.
Jašče adna admietnaść — vyhlad šaścipaviarchovika. Faktyčna, heta try asobnyja budynki, pakładzienyja na ahulnuju płatformu. Pad joj sprajektavany padziemny parkinh.
Hałoŭnaja pieravaha «Akvamaryna» — blizkaść da vady i lesu. Pryčym na rendarach navat bačny plaž na bierazie kanała.
4. «Słavianski kvartał» (Pieramožcaŭ, 27—29)
Zabudoŭščyk — «Źniešekanambud»
Kvadratny mietr — $2200—3400
Try viežy nasuprać novaha muzieja Vialikaj Ajčynnaj vajny rasiejcy pačali budavać jašče ŭ 2008 hodzie. Ciapier jahonyja 350 kvateraŭ patrochu zasialajucca, a apošnija niepradadzienyja vystaŭlenyja na prodaž.
Pakolki miesca dla stajanki aŭtamabilaŭ haspadaroŭ niama, vyratavańniem stanovicca padziemnaja parkoŭka, ale cana mašyna-miesca dasiahaje $33 tysiač.
5. Praśpiekt Niezaležnaści, 85B/V/H
Zabudoŭščyk — «Biełrekanstrukcyja»
Kvadratny mietr — $1800—3000
Heta typovy prykład uščylnieńnia starych minskich kvartałaŭ. U dvor pamiž vulicaj Kuźmy Čornaha i praśpiektam Niezaležnaści ŭlezła niekalki vaśmipaviarchovikaŭ. Pieršy ź ich zasieleny ŭžo daŭno, ciapier raspradajucca kvatery ŭ druhim i budujecca treci.
Dla bolš pryvabnaj rekłamy damy adniesienyja da centralnaha praśpiekta, choć znachodziacca i na adlehłaści ad jaho. Zatoje i šum ad darožnaha trafiku nie dalataje.
Ciapier čytajuć
Chto taki Maćviej Bialaj, jakoha nibyta departavali ŭ Biełaruś? Raskazvajem historyju dziŭnaha aktyvista z padazronym minułym5
Kamientary