Łukašenka — Pucin: apakalipsys nia siońnia
Na hetym etapie Maskva ŭziała kurs na finansavuju ekspansiju ŭ Biełaruś. Piša ŭ svaim błohu Alaksandar Kłaskoŭski.
Chacia infarmacyja pra pieramovy dvuch prezydentaŭ nadta skupaja, paru papiarednich vysnoŭ pra vizyt možna, badaj, užo zrabić.
Pa-pieršaje, jon, dziakuj bohu, maje ŭsie šancy abyścisia biez sensacyjaŭ što da farsavańnia "sajuznaha budaŭnictva". Ale heta nie aznačaje, što niebiaśpieki niama.
Znakavaja padzieja vizytu — supolny ŭdzieł dvuch kiraŭnikoŭ va ŭračystaj cyrymonii adkryćcia hałaŭnoha ofisu Banku ZHB (Biełaruś). Słova ŭ dužkach chaj nikoha nie padmanvaje. Rasiejcy biaz šumu j pyłu nabyli 64,9 % akcyj.
Jak miarkuje analityk Jarasłaŭ Ramančuk, zaraz Maskva ŭziała kurs na finansavuju ekspansiju. "Blickryh što da zachopu Biełarusi praz kanstytucyjny akt nia ŭdaŭsia, vidavočna, tamu rasiejcy sprabujuć uciahnuć biełaruskija pradpryjemstvy, finansavuju systemu va ŭłasnyja finansavyja płyni, kab zrabić jaje jašče bolej zaležnaj", — kaža ekspert.
Što ž da vynikaŭ zakulisnych pieramoŭ, to, sa słoŭ palitolaha Andreja Fiodarava, "pakul ciažka mierkavać, nakolki mocna vykručvali ruki". U pryvatnaści, tak i nie ahučanaja cana na haz. Ci išła havorka ab umovach prodažu "błakitnych fišak" i da t.p., jakija niehałosnyja preferencyi moža atrymać rasiejski kapitał – hetyja i jašče niekatoryja pytańni zastajucca visieć u pavietry.
U źviazku z hetym naściarožvaje dziŭnavataja zajava Pucina (pakul što nie detalizavanaja): maŭlaŭ, Rasieja nia budzie padvyšać košty enerhanośbitaŭ dla Biełarusi. Na jaki peryjad? Jak heta stasujecca z raniej deklaravanym rynkavym padychodam? I uvohule — viedama ž, dzie byvaje biaspłatny syr.
Ź inšaha boku, źviarnuła na siabie ŭvahu zajava Łukašenki pra hatovaść padtrymać Kreml u pytańni ab elementach amerykanskaj supraćrakietnaj abarony. Vyhladaje, adnak, na toje, što heta pijaraŭski krok. Dać "adekvatny i asymetryčny adkaz" ułasnymi vajskovymi srodkami Biełaruś nia ŭ stanie. "Nu a stavić tut, naprykład, taktyčnuju jadravuju zbroju rasiejskaje kiraŭnictva naŭrad ci ryzyknie", — skazaŭ mnie Fiodaraŭ. Pakazalna taksama, što BIEŁTA daje mierkavańnie Čarhinca: Biełarusi nia varta vychodzić z DZUSE, udzieł u jakoj prypyniła Rasieja.
Kali dapisvaŭsia hety postynh, stała viadoma, što prezydenty pryniali zajavu pra vyniki pieramoŭ. Źmiest nie pierakazvajecca, ale bolej šancaŭ na toje, što tekst składajecca z ahulnych frazaŭ. Kali tak, dyk i toje možna ŭžo ličyć niakiepskim dla Biełarusi vynikam.
Ciapier čytajuć
Chto taki Maćviej Bialaj, jakoha nibyta departavali ŭ Biełaruś? Raskazvajem historyju dziŭnaha aktyvista z padazronym minułym2
Kamientary