Vybary Ua: tryumf prajeŭrapiejskich partyj, vializny davier Jacaniuku, adnosnaja niaŭdača Błoka Parašenki

Adrazu čatyry ekzit-poły pravodzilisia na vybarach u Viarchoŭnuju Radu Ukrainy. U ich vynikach niama vialikich razychodžańniaŭ.

Pieršaje miesca zajmaje Błok Piatra Parašenki. Ale jaho vynik daloka ad čakanaha. Zatoje vydatny vynik pakazaŭ Narodny Front Arsienia Jacaniuka.

Davier da premjera vialiki — i heta niahledziačy na balučyja reformy i niedachop hazu dla aciapleńnia haradoŭ. Ukraincy ceniać jahonyja jakaści jak ekanamista. Ale taksama i jahonuju rašučuju pazicyju pa Danbasie — jon u hetym pytańni našmat radykalniejšy za Piatra Parašenku.

Siurpryzam stała i treciaje miesca antyaliharchičnaha, hramadzianskaha śpisa «Samapomač» na čale ź intelihientnym meram Lvova Andrejem Sadovym. Pryčym u Kijevie «Samapomač» uvohule ŭpeŭniena pieramahaje.

Nasupierak pieradvybarčaj sacyjałohii, u Radu prachodzić nacyjanalistyčnaja partyja «Svaboda».

A voś kamunistaŭ u parłamiencie bolš nie budzie. Ich elektarat zastaŭsia ŭ DNR i ŁNR, dzie vybary nie pravodzilisia. Až u 27 akruhach z 225 vybary arhanizavać nie było mahčymaści.

Pa śpisie Błoka Julii Cimašenki ŭ Radu prajšła lotčyca Nadzieja Saŭčanka, jakaja zastajecca ŭ rasijskaj turmie.

Vyniki Nacyjanalnaha ekzit-poła apublikavała a 21-j Hramadskaje TB.

Zhodna ź im, pa partyjnych śpisach, pieramohu atrymaŭ «Błok Piatra Parašenki z vynikam 23,0%, u «Narodnaha frontu» Jacaniuka i Turčynava — 21,3%, «Samapomačy» mera Lvova Andreja Sadovaha — 13,2%, «Apazicyjnaha błoka» — 7,6%, Radykalnaj partyi Aleha Laška — 6,4%, «Svabody» — 6,3%, «Baćkaŭščyny» Julii Cimašenki — 5.6%.

Pavodle Nacyjanalnaha televizijnaha ekzit-poła

— «Błok Piatra Parašenki» — 24,3%, Narodny Front — 21.8%, Samapomač — 12,5%, Radykalnaja partyja Aleha Laška — 7,1%, Apazicyjny błok — 6.6%, «Svaboda» — 6.3%, «Baćkaŭščyna» — 6%.

Siarod partyj, jakija, pa dadzienych exit-poll, nie nabrali 5% hałasoŭ vybarščykaŭ i nie traplajuć u parłamient, — «Hramadzianskaja pazicyja» z 3% hałasoŭ vybarščykaŭ, Kampartyja Ukrainy — 2,6%, «Silnaja Ukraina» - 2,4 %, «Pravy siektar» - 2,3%, «Zastup» — 1,8%. Usie astatnija partyi nabrali mienš za 1% hałasoŭ vybarščykaŭ.

Na pazačarhovych parłamienckich vybarach va Ukrainie buduć abranyja 424 parłamientaryi: 199 u adnamandatnych mažarytarnych akruhach i 225 — pa partyjnych śpisach. U vybarach biaruć udzieł 29 palityčnych abjadnańniaŭ.

• 0
• 0
• 0
• 0
• 0
• 0