Aktyvist zaklikaje biełaruskija ŭłady departavać art-dyrektara kłuba Dozari

Hramadzki aktyvist Illa Dabratvor źviarnuŭsia ŭ prakuraturu i Mienharvykankam u suviazi z praviadzieńniem u mienskim klubie Dozari viečarynki «Russkim byť modno», nazvu jakoj jon ličyć zaklikam da mižnacyjanalnaj varožaści.

Pavialičyć

U interviju Radyjo Svaboda Illa Dabratvor zajaviŭ, što da mierapryjemstvaŭ takoha kštałtu, jak viečarynka «Russkim byť modno», treba stavicca surjozna, bo ŭ «Łuhansku i Daniecku ŭ svoj čas usio pačynałasia mienavita z takich mierapryjemstvaŭ».

«Mianie aburyła sama nazva mierapryjemstva. To bok, jany ličać, što «ruskim być modna», a biełarusam być nia modna. I pry hetym jany pravodziać hetaje mierapryjemstva ŭ stalicy Biełarusi. Kali b heta było ŭ Maskvie, to heta była b ich sprava. U Maskvie jany mohuć pravodzić mierapryjemstvy, jakija jany chočuć. Ale ja liču, što heta ździek — pravodzić mierapryjemstva pad lozunham «Russkim byť modno» tam, dzie bolšaść nasielnictva — biełarusy», — upeŭnieny Dabratvor.

«Jak ja ŭ svaim zvarocie ŭpamianuŭ, ahresiŭnaj reklamaj, to bok vykarystoŭvańniem aŭtamata, jany prosta pakazvajuć, jak jany źbirajucca pravodzić u žyćcio na terytoryi Biełarusi svoj lozunh «ruskija — heta modna». To bok dziejničać, jak u Łuhansku i Daniecku. Ja liču heta niebiaśpiečnym napiaredadni prezydenckich vybaraŭ 2015 hodu, bo my nia možam pradkazać, jak jany buduć dziejničać», — kaža aktyvist.

Dabratvor ličyć, što pradkazać reakcyju dziaržaŭnych orhanaŭ na hety zvarot ciažka. Na jahonuju dumku, ułady sami zaniepakojenyja prarasiejskaj imperskaj prapahandaj, jakaja pahražaje biełaruskaj dziaržavie.

Aktyvist taksama ŭzhadaŭ sytuacyju z pravaabaroncaj Alenaj Tankačovaj, jakuju źbirajucca departavać u Rasieju, i źviarnuŭ uvahu na asobu art-dyrektara Dozari Alaksandra Kraitara, jaki maje rasiejskaje hramadzianstva.

«Jana (Tankačova) nie pravodziła antydziaržaŭnaj dziejnaści. Jana nie kazała, što rasiejcy — heta takaja nacyja, jakaja staić vyšej za biełarusaŭ. Ale jaje vysyłajuć. Tamu ja liču, što jość taja nahoda, kab departavać hramadzianina Rasiei (art-dyrektara Dozari), jaki pravodzić antybiełaruskuju dziejnaść. Tym bolš ja liču, što jon na hetym nia spynicca i budzie praciahvać», — adznačyŭ jon.

Raniej u adnym z svaich interviju Alaksandar Kraitar zajaviŭ, što pamiž Biełaruśsiu i Rasiejaj niama miežaŭ i jon usprymaje Biełaruś jak rehijon Rasiei. Dabratvor bačyć u hetych vykazvańniach raspalvańnie separatysckich nastrojaŭ u Respublicy Biełaruś.

Aktyvist patrabuje ad uładaŭ pryniać miery, kab nie dapuskać nadalej praviadzieńnia mierapryjemstvaŭ takoha kštałtu, jak viečarynki «Russkim byť modno», a taksama prosić pryciahnuć da adkaznaści arhanizataraŭ viečarynki až da «departacyi z terytoryi Respubliki za antydziaržaŭnuju dziejnaść i raspalvańnie mižnacyjanalnaj varožaści».

• 0
• 0
• 0
• 0
• 0
• 0
• 0
• 0