Nichto dla Biełarusi nie budzie stvarać ilhotnych umoŭ dla ŭvachodžańnia ŭ Radu Jeŭropy. Ab hetym zajaviŭ dyrektar stratehičnaha płanavańnia RIE, pasoł Piotr Śviatalski 4 listapada na sustrečy ź biełaruskimi žurnalistami ŭ Strasburhu.
«U biełaruskaha kiraŭnictva pakul niama palityčnaj voli vykanać patrabavańni, źviazanyja z členstvam u Radzie Jeŭropy, ale lhotnych umoŭ dla Biełarusi nichto stvarać nie maje namieru. Jana budzie razhladacca jak i ŭsie astatnija krainy», — skazaŭ jeŭradypłamat.
Jon adznačyŭ, što sa śniežnia 2010 hoda niama nijakaha pazityŭnaha raźvićcia supracoŭnictva Biełarusi i RIE, pry hetym padkreśliŭ, što členstva ŭ arhanizacyi «karysnaje dla dziaržavy».
«Nie liču, što dla abličča dziaržavy dobra być adzinaj krainaj u Jeŭropie, jakaja nie ŭvachodzić u Radu. Heta drenna adbivajecca na imidžy, — upeŭnieny Śviatalski. — Ale vam treba samim bolš aktyŭna dziejničać u płanie raźvićcia supracoŭnictva z RIE. U Rady Jeŭropy vielmi šmat inšych prablem. Praca z krainami-nie členami idzie, ale jana daloka nie na pieršym miescy na paradku dnia.»
Palityk adznačyŭ, što ŭsie krainy — členy RIE razumiejuć, što stajać u adzinaj jeŭrapiejskaj siamji.
«Viadoma, Biełaruś maje prava na vybar i maje prava na pazicyju «my nie chočam być z usimi — my chočam adny stajać u kucie». Ale pytańnie, u imia jakoj stratehičnaj mety vybirajecca adzinokaje stajańnie ŭ kucie? Ja hetaha nie razumieju», — zajaviŭ Śviatalski.
Pry hetym jon padkreśliŭ, što vielmi mnohija ciapier miarkujuć, što ŭ Azierbajdžanie, jaki ŭvachodzić u Radu Jeŭropy, palityčnych svabod značna mienš. «Ale jany vyrašyli, što chočuć być členami RIE, i choć ich vielmi rezka krytykujuć, vychodzić z arhanizacyi nie majuć namieru. I ja nie mahu zrazumieć, čamu biełaruskija ŭłady ličać, što lepš nie być u Radzie Jeŭropy», — skazaŭ pasoł.
Jon adznačyŭ, što ŭ biełaruskim hramadstvie nikoli nie było adkrytaha abmierkavańnia vyhad i strat ad paŭnacennaha členstva ŭ RIE. Pradstaŭnik arhanizacyi miarkuje, što dziaržava ŭstrymlivajecca ad uvachodžańnia ŭ Radu Jeŭropy z-za najaŭnaści vialikaj kolkaści spraŭ u Jeŭrapiejskim sudzie pa pravach čałavieka.
Adnak, padkreśliŭ jon, va ŭsich krain pry ŭvachodžańni ŭ Radu Jeŭropy ŭ pieršyja 10 hadoŭ naziraŭsia vialiki rost kolkaści zvarotaŭ u JESPČ, ale potym ich stanaviłasia mienš.
«Liču, što bolšaść biełarusaŭ byli b «za» dałučeńnie da Rady Jeŭropy. Z usich mižnarodnych instytutaŭ mienavita jon, z punktu hledžańnia prostaha čałavieka, — samaja karysnaja arhanizacyja, bo praz svaje kanviencyi sočyć za vykanańniem pravoŭ čałavieka ŭ krainach-členach», — skazaŭ Śviatalski.
Jon nahadaŭ, što ciapier u adnosinach pamiž Biełaruśsiu i Radaj Jeŭropy stajać dźvie asnoŭnyja prablemy: prymianieńnie śmiarotnaj kary i najaŭnaść palitźniavolenych.
Ciapier čytajuć
Chto taki Maćviej Bialaj, jakoha nibyta departavali ŭ Biełaruś? Raskazvajem historyju dziŭnaha aktyvista z padazronym minułym1
Kamientary