Źleva naprava: Iryna Mocnaja, Nadzieja Dudarenka i Alena Kašyna.
Siońnia ŭ Minsku adbyłasia pres-kanfierencyja Iryny Mocnaj i Nadziei Dudarenki — dźviuch pryjomnych maci, u jakich miascovyja ŭłady sa skandałam adabrali pryjomnych dziaciej.
Nadzieja Dudarenka.
Historyi Nadziei Dudarenki z Paryčaŭ Śvietłahorskaha rajona ciahniecca ŭžo dva hady. Miascovyja ŭłady abvinavacili jaje ŭ nieprystasavanaści jaje žytła dla ŭtrymańnia pryjomnych dziaciej: nibyta im nie chapała piśmovych stałoŭ, a padstaŭka dla zubnych ščotak znachodziłasia zanadta vysoka. Sama Dudarenka kaža, što heta pomsta čynoŭnikaŭ za jaje hramadskuju aktyŭnaść pry sprobie abaranić dziaciej ad nastaŭnicy, jakija ich źbivała ŭ škole.
Iryna Mocnaja demanstruje artykuł ź miascovaj haziety, u jakim jaje skarhi ŭ Kamitet dziaržkantrolu nazyvajucca pryčynaj zvalnieńnia staršyni Klimavickaha rajvykankama Vitala Hryšanava.
U Iryny Mocnaj z Klimavičaŭ uletku hetaha hoda adabrali siemiarych dziaciej. Jaje siamja ličyłasia adnoj ź lepšych u Klimavickim rajonie. Adnak u červieni muž Iryny niečakana skončyŭ žyćcio samahubstvam, i čynoŭniki, spasyłajučysia na nibyta «niezdarovuju atmaśfieru» ŭ siamji vyrašyły zakryć dziciačy dom siamiejnaha typu i adabrali dziaciej. Sama Iryna ŭpeŭnienaja, što heta zdaryłasia praz patrabavańnie pryvieści ŭ paradak žyły dom, jaki Mocnyja atrymali dla dziciačaha domu. Praz skarhi Iryny tady byli pakaranyja mnohija čynoŭniki, a staršyniu Klimavickaha rajvykankama Vitala Hryšanava źniali z pasady.
Ciapier na Irynu Mocnuju zaviali kryminalnuju spravu pa niekalkich artykułach: joj inkryminujuć źbićcio dziaciej. Adnak sama Iryna nazyvaje ŭsio heta nieprykrytaj karupcyjaj.
«Ciapier idzie śledstva pa kryminalnaj spravie suprać mianie. Ja sama dała padpisku ab nierazhałošańni tajamnicy śledstva. Adnačasova z hetym ja sudžusia z Klimavickim harvykankamam. Na papiarednim pasiedžańni suda maja advakatka paprasiła pradstaŭnicu vykankama Śviatłanu Buzu pieraličyć parušeńni, pavodle jakich mianie pazbavili apieki nad dziaćmi. Buza skazała, maŭlaŭ, usio ŭ dakumientach śledstva. Maja advakatka skazała, što vielmi dobra znajomaja z materyjałami śledstva i tam niama faktaŭ hetych parušeńniaŭ. Tady Buza prosta admoviłasia adkazvać na hetaje pytańnie.
Pryjomny syn Mocnych Vital byŭ navat uznaharodžany premijaj Śpiecyjalnaha fondu Łukašenki pa padtrymcy adoranych navučencaŭ. Akramia hetaj uznaharody Iryna Mocnaja pryviezła z saboju ceły stos hramat, jakija, pa jaje słovach, śviedčać, što ŭ siamji Mocnych dzieciam byli dadzienyja ŭsie mahčymaści dla ŭsiebakovaha raźvićcia.
Ale samaje cikaje zdaryłasia na nastupnym pasiedžańni, što było litaralna try dni tamu. Padčas sudovych sprečak Buza pačała začytvać materyjały śledstva. Tyja samyja, jakija ja abaviazałasia nie razhałošvać raśpiskaj. Heta adbyłosia na adkrytym pracesie, u sudovaj zale byli staronnija ludzi… To bok sam Śledčy kamitet razhałošvaje hetyja materyjały. Ale kali sudzia skazała dadać hetyja papiery da materyjałaŭ sudovaj spravy, Buza admoviłasia. Vidać, zrazumieła, što jana zrabiła», — pryviała Mocnaja ŭ jakaści ilustracyi svaich słovaŭ.
Alena Kašyna.
Juryst Alena Kašyna, jakaja zajmajecca takimi spravami, paćvierdziła, što vypadkaŭ, kali ŭłady pačynajuć cisnuć na apiekunoŭ za toje, što tyja abaraniajuć svaje pravy i pravy pryjomnych dziaciej, pa ŭsioj Biełarusi vielmi mnoha:
«U historyi Iryny, Nadziei i ŭ inšych vypadkach pracuje adna i taja ž schiema: ich zdymajuć z pasady apiakuna biez zakonnych padstaŭ. Źviarnicie ŭvahu: u Iryny była ščaślivaja siamja, jana prademanstravała nam kipu hramat i padziak. Ale zajava ŭ dačynieńni siamji Mocnych pastupiła 8 lipienia, a 12 lipienia rajvykankamam užo pryniata rašeńnie zabrać dziaciej. Navat u abaviazanych asobaŭ tak chutka dziaciej nie zabirajuć. To bok rašeńnie pryniataje biez usialakaha raźbiralnictva.
Ja aznajomiłasia z hetym rašeńniem. U samim rašeńni pryviedzieny adzin artykuł Kodeksu ab šlubie i siamji, a spasyłajucca jany na inšy. Rašeńnie samo sastaŭlena niadbajna, mahčyma jano i pryniata niadbajna?
Bolš za toje, na siońniašni dzień pravierka pa spravie Iryny Mocnaj nie zavieršyłasia, adnak dziaciej pavodle rašeńnia rajvykankama ŭ jaje ŭžo adabrali. Viadoma, kali b spačatku była pravierka, a na jaje padstavie — rašeńnie, ja b ź im navat pahadziłasia, pakul nie vyvučyła b ŭsie dakumienty. Ale ŭ spravie Mocnaj paradak parušany. U dadzienym vypadku ŭsia pravierka budzie abhruntoŭvać rašeńnie vykankama».
Kašyna źviarnuła ŭvahu, na toje, što pravierki pryjomnych siemjaŭ pravodziacca źnianacku, a akty pravierak nie pakazvajuć apiekunam — heta pazicyja Ministerstva adukacyi.
«Adanak takim čynam u akcie možna napisać što zaŭhodna. I mienavita na takich aktach bazujucca ŭsie rašeńni vykankamaŭ ab adabranńni dziaciej. Pakul na takim akcie niama podpisu asoby, jakuju praviarajuć, ci admovy ad podpisu, taki akt nielha ličyć zakonnym. My doŭha sprabavali danieści heta čynoŭnikam, ale rezultataŭ pakul niama. U mianie jość podpis Viktara Jakžyka [namieśnik ministra adukacyi — K.Ch.], što tak i pavinna być», — kaža Kašyna.
Jašče adnak prablema — niedarečnaść zakanadaŭstva, jakoje znachodzicca ŭ «kamiennym vieku».
«Klučavy prabieł zakanadaŭstva: apiekunoŭ nielha zvolnić. Možna tolki vyzvalić ci adchilić. Ale vyzvalić ad apiakunstva možna, kali dzicia vyrasła, jaho ŭsynavili ci viarnuli bijałahičnym svajakam. Kali ty nie padychodziš jak supracoŭnik, ciabie adchilajuć ad apiakunstva i dalej ty nie možaš być ni apiekunom, ni pryjomnym baćkam.
Pa-sutnaści, kali ich apiekunoŭ zvalniajuć z pracy, da ich prymianiajuć i siamiejna-pravavuju adkaznaść. Prykład — pryjomnaja siamja Zacharyčaŭ. Im inkryminavali prahuł, kali apiekuny źjechali, pakinuŭšy dziaciej svajakam. U vyniku abodvuch apiekunoŭ adchilili ad apiakunstva, choć tolki adzin ź ich byŭ naniaty adździełam adukacyi i prahulaŭ pracu. Pakažycie mnie, dzie jany ździejśnili praduhledžanyja artykułam 168 Kodeksu ab šlubie i siamji pravaparušeńni, za jakija adchilajuć ad apiakunstva?» — patłumačyła Alena Kašyna.
Iryna Mocnaja i Nadzieja Dudarenka źbirajucca zmahacca za svaich dziaciej i dalej razam z pravaabaroncami.
