Viadomy biznesmen i palityk, były ministr ekanomiki Hruzii Kacha Biendukidze pamior u adnym z hatelaŭ Łondana. Pavodle papiarednich dadzienych, pryčynaj śmierci stała sardečnaja niedastatkovaść. Raniej paviedamlałasia, što pradprymalnik naviedaŭ Šviejcaryju dla lačeńnia chvaroby serca. Pra heta paviedamlaje ahienctva «Naviny-Hruzija».
Michaił Chadarkoŭski napisaŭ u svaim tvitary, što niezadoŭha da śmierci Biendukidze pieranios apieracyju: «Bačylisia z Kacham try dni tamu. Jon tolki pačaŭ chadzić paśla apieracyi. Syšoŭ dobry čałaviek i dobry siabar. Baluča i horka. Ziamla jamu pucham».
Bijołah pa adukacyi, Biendukidze pačaŭ zajmacca biźniesam jašče ŭ SSSR, zaroblenyja srodki dazvolili jamu paŭdzielničać u pryvatyzacyi. Jon nabyŭ 17% akcyj «Urałmaša» na čekavym aŭkcyjonie ŭsiaho za $500 000. Zatym na bazie «Urałmaša» Biendukidze stvaryŭ chołdynh «Abjadnanyja mašynabudaŭničyja zavody» (OMZ). Da 2004 hoda jon byŭ vice-prezidentam Rasijskaha sajuza pramysłoŭcaŭ i pradprymalnikaŭ (RSPP), adnak paśla «revalucyi ružaŭ» u Hruzii źjechaŭ u Tbilisi, a praz hod pradaŭ svaje akcyi ŭ OMZ.
Jon staŭ ministram, jaki zakłaŭ asnovy hruzinskaha ekanamičnaha rostu.
«U niejki momant ja zrazumieŭ, što ŭsio žyćcio zajmacca biźniesam mnie asabista niecikava», — raspaviadaŭ pradprymalnik pierad svaim adjezdam u Hruziju. 42% akcyj OMZ, jakija naležali Biendukidze i jaho partnioram, byli pradadzienyja za $ 50—70 młn.
U 2014 hodzie jon padtrymaŭ Ukrainu. «Jak Ukrainie pavodzić siabie z takim susiedam, jak Rasija?» — spytali ŭ jaho.
«Razvaročvacca śpinoj, — adkazaŭ jon. — Ale heta nie značyć, što treba stavić pieraškody rasijskim praduktam i kapitału. Niaścipła tak kazać, ale mnie padabajecca palityka Hruzii ŭ dačynieńni da Rasii. Kali Rasija zakryła miažu dla našych tavaraŭ, my nie zabaranili ŭvoz rasiejskich. Rasija ŭviała vizy, my spačatku taksama ŭviali, ale potym admianili».
Zatoje, raiŭ jon: «Treba rvać kulturnyja suviazi. U pieršuju čarhu admovicca ad rasijskaha telebačańnia — heta krynica atruty».
Stała viadoma pra śmierć 22-hadovaha chłopca, jakoha asudzili pa palityčnaj kryminałcy2
Kamientary