U listapadzie pałata pradstaŭnikoŭ u pieršym čytańni pryniała šerah źmien u Kryminalny, Kryminalna-pracesualny i inšyja kodeksy. Novaŭviadzieńni, kali jany buduć uchvaleny na ŭsich uzroŭniach, pryniasuć palohku dla złačyncaŭ i papoŭniać dziaržbiudžet. Za złačynstvy daviadziecca płacić bolš, a siadzieć mienš — voś što asnoŭnaje ŭ źmienach.
Dasudovyja pahadnieńni
Źmieny praduhledžvajuć padpisańnie dasudovaha pahadnieńnia: dapamohu śledstvu ŭ abmien na mienš žorstkaje pakarańnie. Pry šerahu ŭmoŭ. Abvinavačany (padazravany) pryznaje vinu i pahadžajecca raskazać pra złačynstva. Ale nie tolki pra svoj udzieł u im, ale i zdać padzielnikaŭ. Harantuje vypłatu naniesienaj škody. Rašeńnie pra damovu prymaje prakuror, kali jon admović, to abskardzić nielha.
Dasudovaje pahadnieńnie praduhledžvaje źmianšeńnie pakarańnia. Jano nie moža pieravyšać pałovu maksimalnaha terminu, a kali złačynstva źviazana z zamacham na žyćcio čałavieka — nie bolš za dźvie traciny. Dla tych, kamu pahražaje pažyćciovaje źniavoleńnie albo rasstreł, u vypadku dasudovaha pahadnieńnia pakarańnie turmoj mohuć zamianić na kałoniju.
Dasudovaje pahadnieńnie nie zaklučajecca z tymi, chto ździejśniŭ złačynstva ŭ nieadekvatnym stanie.
Adkupicca ad turmy
Ciapier dla vyzvaleńnia ad kryminalnaj adkaznaści patrabujecca ździejśnić złačynstva ŭpieršyniu, pakajacca, dapamahać śledstvu, spłacić škodu. A złačynstva nie pavinna ŭjaŭlać vialikaj hramadskaj niebiaśpieki albo być mienš ciažkim. Źmieny ž praduhledžvajuć jašče adnu ŭmovu: spłatu dadatkovaj sumy — pałovy ad sumy naniesienaj škody, ale nie mienš za 30 bazavych (4,5 miljona rubloŭ). Kali ž nie vyzvalać, hrošy viernuć.
Pry dziejnych normach sudździ krajnie redka vyzvalajuć ad kryminalnaj adkaznaści. Miarkujecca, što pry novaŭviadzieńni na heta buduć iści čaściej, kab papoŭnić dziaržbiudžet.
Siadzieć mienš, płacić bolš
Źmieny praduhledžvajuć u dadatak da asnoŭnaha pakarańnia jašče i štrafy. Heta budzie datyčycca, naprykład, niezakonnaj pradprymalnickaj dziejnaści, praviadzieńnia niezakonnych abortaŭ, prynuki da seksu.
Praduhledžvajecca i źmianšeńnie terminu źniavoleńnia. Za seks pa zhodzie z asobaj, jakoj mienš za 16 hadoŭ, pry pazbaŭleńni voli maksimalny termin źmianšajecca na hod — da 4, ale dadajecca štraf. A kali asoba ŭžo sudzimaja za zhvałtavańnie dziaciej albo na jaje ŭskładzieny abaviazki pa vychavańni niepaŭnaletnich, čakaje pazbaŭleńnie svabody ad 3 da 10 hadoŭ.
Novaje nakont prastytucyi
Za arhanizacyju i vykarystańnie prastytucyi źmieny taksama praduhledžvajuć štraf u dadatak da adsiedki. A voś za vyvaz čałavieka dla prastytucyi za miažu albo vykarystańnie niepaŭnaletnich — minimalny termin źniavoleńnia źmianšajecca z 7 da 5 hadoŭ. Maksimalny zastajecca 10. Razynka novaŭviadzieńnia ŭ tym, što pad vyznačeńnie «vykarystańnie prastytucyi» padpadajuć sami žrycy lubovi. Ciapier ich tolki štrafujuć pa administratyŭcy.
Za pahrozu zabojstvam buduć siadzieć bolš. U kałoniju mohuć adpravić na dva hady (ciapier źniavoleńnie nie praduhledžana).
Voźmucca za finansavyja piramidy
Časta kiraŭniki pradpryjemstvaŭ iduć na ryzyku pry zaklučeńni peŭnych damoŭ, pry praviadzieńni reform. Ale niaredka praharajuć. I tady traplajuć pad sud za paniesienyja pradpryjemstvam straty. Pry novaŭviadzieńni kiraŭnika nie buduć sudzić, kali jon niebiespadstaŭna ličyŭ, što zrabiŭ usio mahčymaje, kab papiaredzić škodu. A pastaŭlenaja meta mahła być dasiahnuta i biez ryzyki, ale ź mienšym ekanamičnym vynikam.
Źjaviłasia adkaznaść za arhanizacyju finansavych piramid — mohuć pasadzić da 5 hadoŭ i jašče aštrafavać. Kali ciapier karajuć najpierš zasnavalnikaŭ takich jurasob (jakija časta — vypadkovyja ludzi), to voźmucca niepasredna za arhanizataraŭ.
Rehulujucca internaŭty
Za brydkija kamienty ŭ internecie buduć karać užo aficyjna. U novaj redakcyi Kryminalnaha kodeksa praduhledžana pakarańnie za paklop u internecie. Nie kankretyzujecca, budzie heta aŭtarski artykuł na sajcie albo ananimny kamient pad im. Siadzieć daviadziecca da dvuch hadoŭ.
Za zakliki da zachopu ŭłady — u turmu
Buduć karać i za zakliki da zachopu ŭłady ŭ Biełarusi albo jaje hvałtoŭnaj źmieny, raźmieščanyja ŭ internecie — da 5 hadoŭ kałonii. Uzakoniać i paklop na prezidenta krainy ŭ internecie.
Za kradziež z vykarystańniem kampjutarnaj techniki ŭ bujnym pamiery daviadziecca siadzieć ad 3 da 7 hadoŭ (ciapier ad 3 da 10). Ale dadatkova moža vyznačacca štraf.
Aznačeńnie katavańniaŭ
U novaj redakcyi Kryminalnaha kodeksa źjavicca aznačeńnie katavańniaŭ. Heta naŭmysnaje naniasieńnie bolu, a taksama psichičnych pakut dla vykanańnia dziejańniaŭ suprać voli (u tym liku vyciahvańnie źviestak), kali takija dziejańni robić słužbovaja asoba.
Adkaznaść za parušeńnie praviłaŭ biaśpieki ŭ mietro
Uvodzicca adkaznaść za parušeńnie praviłaŭ biaśpieki ruchu albo ekspłuatacyi mietro, što paciahnuła škodu ŭ bujnym pamiery. Pasadzić mohuć na 2 hady, a kali jašče zahinuli ludzi — da 7.
Źniknie artykuł za padrobku marak
Źniknuć artykuły za niesumlennuju achovu majomaści, falsifikacyju srodkaŭ vymiareńnia, padrobku paštovych marak i prajaznych dakumientaŭ, samaŭpraŭstva.
Źmieny ŭ kodeksy čakaje jašče razhlad u druhim čytańni pałaty pradstaŭnikoŭ, u saviecie respubliki. I tolki tady jany nakiroŭvajucca na podpis kiraŭniku dziaržavy. Tamu pracavać źmieny pačnuć tolki ŭ nastupnym hodzie.
