U minskich kinateatrach startavaŭ vielmi nieadnaznačny film. Amatary ekšenu buduć u zachapleńni ad «Džona Uika». Tyja ža, chto šukaje ŭ kino sens, dobra vyśpiacca.
Stvaralnik lehiendarnaj kampjutarnaj stralałki Doom Džon Karmak kazaŭ: «Siužet u hulni – jak siužet u pornafilmie. Jon musić być, ale jon nie nastolki istotny». Peŭna, tym ža pryncypam kiravaŭsia režysior Čed Stachielski, kali zdymaŭ «Džona Uika». Siužet stužki nahadvaje typovuju videahulniu.
Trymajcie hieroja, voś vam paru chvilin jaho apisańnia. Usio, dalej ekšen z redkimi «ekranami zahruzki».
Žonka Džona pamierła ad nievylečnaj chvaroby. Jak uspamin pra siabie jana pakinuła Džonu razumnieńkaha ščaniuka – kab było kaho lubić. Džon u smutku, dy sabaka troški dapamahaje. Dy los zvodzić jaho z chulihanami: tyja ŭryvajucca ŭ jaho dom, kraduć mašynu i zabivajuć ščaniuka. Adzin z chulihanaŭ apynajecca synam mafijozi, ź jakim niekali pracavaŭ Džon.
Darujcie spojlery, ale heta ŭvieś siužet. Jon ścipła ŭkładajecca ŭ pieršyja 10 chvilin i sastupaje miesca bojkam dy pierastrełkam.
«Jaho lepiej nie čapać» – «Čamu?» – «Bo heta Džon Uik»
U filmie jaho nazyvajuć «Boogie Man», što našyja pierakładčyki pieratvaryli ŭ «Baba Jaha». Karektniej, peŭna, «Babajka».
Piersanaž Kijanu Ryŭza — supierhieroj biez supierzdolnaściaŭ, ab jakim viedaje ŭvieś horad. Jaho «biaruć» kuli, jaho mohuć pabić, jon nie ŭmieje lotać ci ŭvaročvacca ad kulaŭ. U astatnim heta toj ža Nea z «Matrycy», navat styl adzieńnia nie nadta źmianiŭsia.
Dy film zdymaŭsia vidavočna nie dziela dramy. Čed Stachielski niekali byŭ dubloram Ryŭza ŭ toj samaj «Matrycy», zatym zajmaŭsia pastanoŭkaj bojek u inšych filmach. Jaho režysiorski debiut na 90% składajecca z taho, što jon umieje rabić najlepiej – i jon robić heta dobra.
Kožny asobny kadr «Džona Uika» daskanały, choć rabi zastaŭkaj na rabočy stoł.
Što by nie trapiła na ekran, heta budzie vydatna padśvietlena i źniata z najlepšaha, chaj i dobra znajomaha rakursu. Stvarajecca adčuvańnie, što niedzie jość biblijateka lepšych kadraŭ z usich bajevikoŭ – i što Stachielski hetuju biblijateku abrabavaŭ dy ŭstaviŭ tudy Kijanu Ryŭza.
Toje ž tyčycca pastanoŭki pierastrełak, pahoniaŭ i bojek dy saŭndtreku. Usio daskanała, dy ŭsio znajoma. Bajavaja častka nie adnastajnaja – praktyčna nichto nie pamiraje ad adnoha ŭdaru ci adnoj kuli. Niekatoryja bai navat napružanyja.
Praŭda, peŭnyja zabojstvy vyklikajuć ščyry śmiech. Chacieŭ taho režysior ci nie, u zmročnaj stužcy bahata kamiedyjnych momantaŭ.
Nie padvioŭ i padbor aktoraŭ. Stary mafijozi musić vyhladać mienavita jak Michael Niukvist, jaho syn-abibok – mienavita jak Alfi Alen. Stary biaźlitasny zabojca – adnaznačna Uilem Defo, maładaja i nachabnaja dziaŭčyna-kiler – o tak, heta Edryjan Paliki.
Tolki adzin raz za baradoj Kijanu Ryŭza možna razhladzieć emocyju: kali napačatku jon uśmichajecca žoncy. Dziaŭčynki, nie prapuścicie toje imhnieńnie! Ryŭz – krasuńčyk, kali ŭśmichajecca.
Uvieś astatni film Ryŭz nie prajhraje Švarcenehieru-terminataru. Etałonny pokier-fejs.
Jaki tam Stetchem? Jon zanudny! Jaki Lijam Nisan? Jon stary płaksa! Kijanu Ryŭz – voś daskanałaja mašyna zabojstva 10-ch, jakoj Švarcenehier byŭ u 80-ch.
Zdajecca, i Čad Stachielski moža stać «novym Tarantyna». U adroźnieńnie ad «Horada Hrachoŭ» ci, skažam, «Zabić Biła», u «Džonu Uiku» niama kultu hvałtu i fantanaŭ kryvi. Kult pastanoŭki kadra, dyktat chareahrafii, matematyka rytmu – usio tak. Ale «kryvišča» tolki pa nieabchodnaści.
Heta i nie «karcinka dziela karcinki» a-la «Avatar». Nijakich pretenzij na hłyboki sens, nijakoha źlizanaha z «Pakachontas» maralizatarstva. Tolki babajka-Ryŭz, jaki tvoryć dabro naprava i naleva.
I heta pieramoha. Pry vielmi ścipłym biudžecie ŭ 20 młn dalaraŭ Stachielski źniaŭ etałonny ekšen. U kožnaha, chto braŭ udzieł u stužcy, heta budzie trojčy padkreśleny punkt u partfolijo.
Taki jon, «śfieryčny koń u vakuumie» žanra «bajavik». Lubicie bajeviki? Nie prapuścicie! Lubicie filmy z sensam? Kali łaska, nie chrapicie hučna na «Džonu Uiku».
Litoŭski viaskovy padvorak na miažy ź Biełaruśsiu vyhladaje, jak aŭtasałon pa prodažy premijalnych aŭto VIDEA1
Kamientary