Pahadnieńnie ab pieramirji z ukrainskimi ŭładami budzie padpisanaje 9 śniežnia, zajaviŭ kiraŭnik samaabvieščanaj «Łuhanskaj narodnaj respubliki» Ihar Płatnicki na pasiadžeńni ŭrada «ŁNR» 6 śniežnia, paviedamlaje internet-resurs www.novorossia.su.
«Učora tut byli pradstaŭniki Ukrainy. Uzhodniena, papiarednija damoŭlenaści dasiahnutyja. Pahadnieńnie budzie padpisanaje 9 śniežnia», — skazaŭ Płatnicki. Z hetaha dnia, dadaŭ jon, u respublicy pačniecca «etap cišyni».
Pavodle słoŭ Płatnickaha, pahadnieńnie budzie składacca ź niekalki punktaŭ, jakija praduhledžvajuć spynieńnie ahniu, vyvad techniki i dalejšyja dziejańni pa ŭrehulavańni kanfliktu.
Akramia taho, u dakumiencie buduć prapisanyja ŭmovy, pry jakich budzie adkryty ahoń u adkaz u vypadku parušeńnia pieramirja.
Aficyjny pradstaŭnik Savieta nacyjanalnaj biaśpieki i abarony Ukrainy Andrej Łysienka 7 śniežnia zajaviŭ RIA Novosti, što nijakich razmoŭ ab pieranosie daty pieramoŭ u Minsku, pryznačanych na 9 śniežnia, nie viadziecca.
Pry hetym Łysienka adznačyŭ, što «9 śniežnia źjaŭlajecca papiaredniaj dataj». «Try baki — Rasija, Ukraina i ABSIE — rychtujucca da praviadzieńnia hetych pieramoŭ, a biełaruski bok hatovy zabiaśpiečyć usie nieabchodnyja ŭmovy dla pieramoŭ trochbakovaj kantaktnaj hrupy», — dadaŭ pradstaŭnik SNBA.
Nahadajem, pra sustreču kantaktnaj hrupy pa ŭrehulavańni situacyi na Danbasie 9 śniežnia ŭ Minsku paviedamiŭ u minułuju piatnicu, 5 śniežnia, na bryfinhu ŭ Charkaŭskaj vobłaści prezident Ukrainy Piotr Parašenka.
Pry hetym jon adznačyŭ, što «sa strymanym aptymizmam» hladzić na mahčymaść spynieńnia ahniu paśla sustrečy.
«Zadača — zaćviardžeńnie płana-hrafika realizacyi minskich damoŭlenaściaŭ, majecca na ŭvazie, kab z 9 śniežnia pačaŭsia dzień artyleryjskaj cišyni, i na praciahu 30 dzion vyjści na liniju sutyknieńnia, jak adznačajecca ŭ minskim pratakole», — skazaŭ prezident Ukrainy, padkreśliŭšy, što heta pavinna karespandavacca z advodam ciažkaha ŭzbrajeńnia i techniki i z zabieśpiačeńniem pracy misii ABSIE pa nazirańni za režymam spynieńnia ahniu. Zatym, zajaviŭ Parašenka, pavinien adbycca palityčny dyjałoh z admienaj vynikaŭ niezakonnych miascovych vybaraŭ i praviadzieńniem novaj vybarčaj kampanii na Danbasie.
Vybary kiraŭnictva samaabvieščanych Łuhanskaj i Danieckaj narodnych respublik prajšli 2 listapada, adnak ukrainskija ŭłady ličać ŁNR i DNR terarystyčnymi arhanizacyjami.
Pieramovy pa ŭrehulavańni situacyi va Ukrainie adbylisia ŭ Minsku 5 i 19 vieraśnia.
Padčas pieršaj sustrečy byŭ padpisany pratakoł ab spynieńni ahniu na Danbasie, pavodle vynikaŭ druhoj — miemarandum ź dzieviaci punktaŭ. Niahledziačy na heta nieŭzabavie ŭzbrojenyja sutyknieńni na Danbasie adnavilisia.
