Rejtynh hipier- i supiermarkietaŭ Biełarusi: samyja darahija i samyja tannyja
Na pieršym miescy «Jeŭraopt», na apošnim — «Rubloŭski».
Štohod u śniežni «Naša Niva» paraŭnoŭvaje ceny ŭ biełaruskich sietkach kramaŭ: jakaja samaja darahaja, a jakaja — samaja tannaja? Sioleta ŭ našym spažyvieckim košyku 15 praduktaŭ — ad śvinoha faršu i makarony da šakaładu i piva.
Vybar praduktaŭ
Čamu mienavita jany? Hałoŭnaje, kab hety tavar pradavaŭsia ŭ absalutnaj bolšaści kramaŭ. Tamu niekatoryja pradukty daviałosia vykraślić z košyka. Naprykład, kaŭbasy. Pradukcyja Hrodzienskaha miasakambinata jość u bolšaści kramaŭ, ale hatunki časta adroźnivajucca. Niedzie voźmieš «Doktarskuju», a niedzie — tolki «Duchmianuju».
Inšaje patrabavańnie — kab cana ŭ roznych kramach adroźnivałasia. Vialiki «Śnikiers» amal paŭsiul kaštuje 9500 rubloŭ, tolki «Jeŭraopt» pradaje jaho na 250 rubloŭ tańniej, a «Vitalur» — na 200 rubloŭ daražej. Roźnica niepryncypovaja.
Naša daśledavańnie nie pretenduje na navukovy status. Naprykład, kulinaryja ŭ kožnaj kramie svaja. Niechta dadaje ŭ kuryny farš śviny špik, a niechta robić jaho tolki z kurynaha file. Składana acanić i jakaść fruktaŭ: u adnoj kramie banany pieraśpiełyja, a ŭ inšaj (časam toj samaj sietki) — jašče zialonyja.
Ale tendencyi na rynku navidavoku. I letaś, i pazaletaś samaj tannaj kramaj akazvaŭsia «Jeŭraopt». Što atrymałasia sioleta?
Pieramoha z adryvam
Lidar nie źmianiŭsia. «Jeŭraopt», jakim vałodajuć biznesmieny-emihranty Siarhiej Litvin i Uładzimir Vasilka, nabraŭ 135 punktaŭ sa 150 mahčymych (hladzi tablicu). Pryčym najmienš kaštujuć pradukty doŭhaha zachoŭvańnia. Hihancki abarot troch sotniaŭ kramaŭ dazvalaje sietcy zakuplać tavary pa nizkaj canie.
Sioleta «Jeŭraopt» zapuściŭ siervis biaspłatnaj dastaŭki praduktaŭ dadomu, praŭda, pakul tolki ŭ Minsku i pryharadach. U vypadku internet-zamovy cana stanovicca jašče na 5% nižejšaj, čym u kramach sietki.
Jak i letaś, druhoje miesca — «Hipa» miljaniera Aleha Baranoŭskaha, uśled za im «Prastor» Juryja Čyža. Samy bahaty biełarus zhubiŭ cikavaść da rytejłu, jahonyja kramy zastalisia tolki ŭ Minsku.
Jak ličyli
Jakuju mietodyku padlikaŭ my abrali? Naprykład, kiłahram ispanskaj churmy ŭ «Hipa» pradajecca za 18900 rubloŭ. Hetaja najlepšaja cana siarod kankurentaŭ, značycca, krama atrymlivaje maksimalnyja 10 bałaŭ. Najdaražej churma kaštuje ŭ «Biełmarkiecie» — 26850 za kiłahram. Hetaj kramie naličvajem 1 bał. Astatnija sietki atrymlivajuć pramiežkavyja bały praparcyjna roźnicy ŭ canie. Zdarajecca, što niekatoryja kramy pryncypova nie pradajuć toj ci inšy tavar. Naprykład, «Vitalur» nie pracuje z rybaj u vakuumnaj upakoŭcy ad «Santa-Bremara»: našto, kali jość takaja samaja ŭłasnaj vytvorčaści? A ŭ «Prastory» pry ŭsim žadańni nie kupiš sokaŭ i niektaraŭ «Sočny». U takich vypadkach my naličvali kramam siarednija piać bałaŭ.
Tajamnica
Na žal, nivodnaja ź biełaruskich sietak nie publikuje ŭ internecie katałohu svaich tavaraŭ. Tamu daviedacca ceny pakupniki mohuć tolki niepasredna ŭ kramach.
Asnoŭnyja handlovyja sietki Biełarusi
«Rodny kut» (Biełkaapsajuz) — tysiačy kramaŭ, pieravažna ŭ vioskach.
«Darors» (Biełčyhunka) — 74 drobnyja kramy Biełčyhunki ŭ Minsku (ahułam – bolš za 120).
«Rubloŭski» — 45 kramaŭ u Minsku (ahułam — 55).
«Jeŭraopt» — 43 kramy ŭ Minsku (ahułam — 290).
«Susiedzi» — 30 kramaŭ u Minsku (ahułam — 43) + 15 kramaŭ «Trapinka»
«Vitalur» — 24 kramy ŭ Minsku (ahułam — 33).
«Biełmarkiet» — 17 kramaŭ u Minsku (ahułam — 66).
«Hipa» — 8 kramaŭ u Minsku (ahułam — 10).
«Ałmi» — 8 kramaŭ (ahułam — 46).
«Rodnaja staronka» — 7 kramaŭ u Minsku (ahułam — 89).
«Mart Inn» — 6 kramaŭ u Minsku (ahułam — 25).
«Prastor» — 4 kramy ŭ Minsku.
«Karona» — 3 hipiermarkiety ŭ Minsku (ahułam — 8).
Kamientary